Apulu-o-tofaga a le Manamea – finau maua’i ma le kanesa

05 February 2016, 12:00AM

Ripotia e Deidre Fanene

Fa’aliliu e Maiava

 

Ua fa’ailoa fa’alaua’itele nei mo le ulua’i taimi, e le tama’ita’i sa avea muamua ma Tausala o le Pasefika i Saute fa’apea le Tausala Samoa, o Manamea Apelu-Schwalger, ana finauga ma le fa’ama’i, o le kanesa o le susu.

Na fa’aali e Manamea – ua 13 nei masina talu ona iloa ua a’afia – ona atugaluga ma popolega, a’o alo le atunu’u i le fa’amanatuin o le Aso Fa’apitoa o le Kanesa i le Lalolagi, lea sa faia i Moto’otua ananafi.  

Na saunoa Manamea e fa’ala’ei’au i le mamalu o le atunu’u, ina ia tausisi le soifua i aga-fa’asoifua maloloina lelei, e ‘alofia ai le fa’ama’i ua tele ina maliliu ai nisi o le atunu’u. O le a fa’aauau fo’i e finau malosi, a’o soifua pea.

“O lo’o feagai nei ma le kanesa (o le susu) i le tulaga ua televave tele,” o lana fa’aaliga lea, ma fa’ailoa atu ai fo’i i ana uo, o aiga ma le to’atele o le atunu’u, na te le mo’omia se isi lava mea, vagana la latou lagolago ma le fa’amalosi’au atu.

Sa toe to-manatu i le taimi na ia maua ai le tala.

“Sefulutolu masina talu ai, na ‘ou o’o mai ai i le Falema’i e fa’atino su’esu’ega o lo’u susu-agavale, lea sa ‘ou maua ai se patu,” o lana fa’aaliga lea. “A o le fa’anoanoaga tele ia te a’u, ona e uma lo’u ta’otoga ae iloa ane ai, ua televave tele le ma’i ma amata ai loa ona avea o se tasi e ma’i i le kanesa.” 

Sa ta’oto i le Falema’i (Acute Seven) e to’aono gasegase sa iai, e to’atolu e afaina i le kanesa. 

 “O le ma’i muamua na mana’o e alu i le fale e ta’oto ai,” o lana fa’aaliga lea, “o se filifiliga ‘ou te matua le-malamalama ai i lena taimi, aua sa aga’i e sa’ili fesoasoani i taulasea fa’aleAganu’u. 

“O le tagata lona lua, o se tina e 35 tausaga ua leva ona finau ma le kanesa, ae na fa’ataga e alu i lona aiga mai le falema’i. Pei a ‘ou te iloa, ua fa’amavae ma si ona aiga ma lana fanau.

“Na fa’amanuiaina i lena taimi ma maua ai le avanoa e ala i le lagolago a le malo, e malaga ai i Niu SIla mo le isi ta’otoga ma le ono masina o togafitiga masani. 

O le malaga lena na maua ai se mapusaga. 

 “E fa masina talu ona uma a’u togafitiga mulimuli, na ‘ou fo’i fiafia mai ai Samoa. Sa ‘ou manatu lava ua uma le kanesa, ua ‘ou le toe a’afia ai.

“Ia Novema, na fai ai lo’u ta’otoga lona tolu ona ua toe maua le patu ma ua vave tele le sosolo i le taimi lea.”

O nei, na ta’ua e Manamea, e faigofie lava lana fe’au e uiga i le gasegase o le kanesa.

“E le fa’ailoga-tagata le kanesa,” o lana fa’aaliga lea. “Fai mai la’u Uo-foma’i, ‘togafiti le mafuaga, ‘aua le togafitia fa’ailoilo, va’aiga ma auga.

 “Ae ‘aua le fetagisi mo a’u. ‘Ou te fai lava tala-malie i a’u uo, “’aua le fetagisi mo a’u Argentina, ‘ou te le mo’omia le mea lena, ‘ou te mana’o i tou fa’anoanoaga, a ‘ou te mo’omia lou malosi.

“Soso tele mai ia te a’u, o le saunoaga lea a le faife’au i le taeao nei, ‘ou te mo’omia lou alofa aua a ‘ou maua, ua tatou maua uma.”

Ua fautua mai Manamea i tagata Samoa uma, ina soifua i aga ma taga fa’aSoifua maloloina lelei.

“’Ou te tatalo atu, ia fai le filifiliga sa’o ma lelei, ia ola soifua maloloina o ‘Oe ma lau fanau,” o lana tima’i mai lea i le atunu’u. “Ia soifua maloloina.

“E leai se fofo o le kanesa ae mafai ona fa’ateteleina ma ua manuia ai fo’i nisi ona o vaila’au malolosi ua iai nei.”  

Ua silafia lelei lava e Manamea, o aso ta’itasi uma o se meaalofa mo ia ma o lo’o taumafai e fa’afiafia lona mafaufau fa’atasi ma le fesoasoani malosi a lona to’alua, o Alan ma lona aiga.

“’Ou te alu e fa’amalositino nei – Zumba aua ‘ou te mafaia. E faigofie lava lena mea,” o lana faa’aliga fiafia lea.

“Pau o’u mo’omo’oga mulimuli, o lo’o iai fuafuaga mamana a Le Atua mo tatou uma ma ‘ou te lototele lava ma fiafia, pe sekone, minute, se aso pe tausaga fo’i Na te foa’i mai ia te a’u. “‘O le a ‘ou ola pea ma finau ma lo’u fa’amoemoe o sa’u fa’amatalaga ma so’u malosi o le a lu’itauina ai le isi tagata ina ia taumafai e soifua manuia ma fai le filifiliga tonu.”

05 February 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>