Fa’atuatua i le Atua, e umi ai lou soifua
“Ia e ava i lou tama ma lou tina, e fa’alevalevaina ai ou aso.”
O le metotia lea e finagalo le tinā ia Leiviivia Malifa e fa’afualoaina ai le soifua o so’o se tagata.
O Leiviivia ua 73 le matua o lona soifua mai le alalafaga o Tuana’i.
“E le sese lava upu a le Tusi. E fa’amanuiaina lava le ola o le tagata e tausi ma usita’i i ona matua fa’atasi ai ma le fa’atuatua i le Atua.
“O le olaga lenei, e tumu i faigata ma fa’afitauli, ae a fa’atuatua i le Atua, e foai mai lava e le Atua le malosi e fa’atinoina ai ana feau.”
E afea e le Fofoga o Samoa le tina ia Leiviivia, o lo’o faitau lana Tusi Paia i lona moega.
“O la’u lea fautuaga i le tupulaga aemaise foi o la’u fanau. A aunoa le tagata ma le Atua, e na te le maua foi fa’amanuiaga ma e fetaia’i foi ma fa’afitauli o le ola.
“E tele lava suiga o le olaga ua tatou vaaia i le vaitau lenei. Ae o le fa’anaunautaiga lea o le loto, ina ia iai ni tupulaga e ola matata’u i le Atua.
“O le Atua e aumai ai le malosi ma le ola. A fa’amuamua le Atua i mea uma tatou te faia, e le taumate foi le iu manuia.
“O le tatalo e o fa’atasi ma galuega. E le fa’apea na’o le tatalo i le Atua ae le’o savali i upu ma fetalaiga a le Atua. Pei ona faiatu i le amataga, e tele fa’afitauli o lo’o tatou feagai ai pea. Ae a pipii ma fa’alagolago i le Atua, e fa’apena foi ona tatou maua manuia mai le Atua.”
E ui lava ua loa le soifua o le tina ia Leiviivia, na ia ta’ua o lo’o maua lava lona malosi e faia ai nisi o feau i totonu o lona aiga.
“O lo’o alofagia lava e le Atua ma foa’i mai le malosi e faia ai nai fe’au masani i totonu o le matou aiga. E le’o ni feau mamafa foi.”
Na ta’ua e Leiviivia, o lana galuega lea sa faia a’o talavou ma malosi, o le tausiga lea o ona matua ma lona aiga.
“Na iu lelei la’u tausiga i nai ou matua. Na fa’apena ina fa’asolosolo mai ai ina ua fai le aiga ma fai fanau.
“O la’u lava lea fe’au i la’u fanau, e fa’amuamua le Atua ma ia alolofa i matua.
“Leai lava se isi manuia e sili atu i lo’o le manuia o le tagata e alofa ma tausi lelei i matua, e le gata i lea o le fa’alagolago i le Atua.”
E ui foi lava ina maua le tina ia Leiviivia i ma’i o le tino i nisi o taimi, e le taitai mate ai lona fa’atuatua i le Atua, o lana a’upega malosi lava o le tatalo.
“Ua sau foi le matua ia ua le toe tutusa le malosi. Ae peita’i e le taitai tu’ua ai le tatalo pea i le Atua e foa’i mai le malosi e auauna ai mo ia ma mafuta ai ma le fanau.
“E tausi foi lava e si a’u fanau au i meaai e maua ai le soifua maloloina.
“Ae o le fa’atuatua lava i le Atua lea e maua ai le malosi ma maua ai le ola maloloina ma le fiafia.”