O LA’U TALA FO’I

09 April 2016, 12:00AM

1. Matauina i Tala Fou le faaaogaina e le atalii o Kofi Annan  o le igoa o se kamupani Samoa o le Sapphire Holding Ltd-e tusa ai ma  Pepa Faamaumauina a le Panama-na te faatauina ai  se meatotino i le 2004 mo le tau e 400,000 Pauni.

O lea la alii o lona igoa  o Kojo Annan e 42 tausaga lona matua-ma ona pau lava lea o le atalii o le Failautusi muamua a Malo Aufaatasi. Ia -a tatou tilotilo la i lenei mataupu-o le upu moni lava-ua na o se amataga lea o se mea mata’utia o le a tupu i Samoa i se taimi e le o toe mamao.

O le a lea mea? Afai ua mafai e lea alii ona faaaoga le igoa o se kamupani Samoa e saili ai ona manuia-e faapefea la ona le mafai e ia tagata mai fafo- ona pulea ma faoa o tatou eleele ma meatotino? E leai la se aoga e saili ai poo ai e ana lea kamupani-tusa foi pe aumai ni pepa faamaumauina mai fea ma fea-e le mafai lava ona tatou maua ai se tala moni ma le faatuatuaina e uiga i nei mataupu.

A faapefea ona tatou maua se tala moni mai o tatou ta’ita’i-pe na o tagata faigaluega foi ia o le Malo-ua pisia uma lava i faiga pi’opi’o ma taupulepulega leaga-ae leai se mea o faia e le Malo e saili ai le amiotonu?

Ia atonu ua faatiga taliga ia te outou le ta’ua so’o o nei faiga pi’opi’o-ae afai o manuia ia e mafai ona maua e tagata uma o le atunuu-ae o lea ua faa-lima poto e le faigamalo-e faapefea la ona faagalo pe afai o manuia nei na mafua ai ona tafetotoi matua i le sailiga o le Malo Tuto’atasi o Samoa? Na fai ‘ea le Malo Tuto’atasi o Samoa e tafili saunoa ai ta’ita’i faatautala i le atunuu lea ua matua matitiva masaesae? O le a sou taofi? 

2. Matauina foi i Tala Fou se ulutala fai mai o “Tuuaiga tau Faiga Pi’opi’o i le Faiga Palota Lautele  talu ai nei-ua le mautinoa ai se lumana’i o le Fofoga Fetalai! O le uiga la o lea ulutala e faapea-afai ae faamaonia ia tuua’iga-o le a fesiligia loa le lumana’i o le Fofoga Fetalai i le taimi nei.

Ia –o le lalolagi lava lenei tatou te i ai-ma e pei lava o le natura o le tagata soifua-e amulī lava ona manatunatu loloto i le taunuuga o ana faiga-ae peiseai e faamuamua lava le maua o le mea o loo tauivi ai-ae mulimuli ane fo’i pe leai-ua leai se afaina o ia faiga! O le fesili la ua tulai mai e tusa ai ma le upu a le atunuu-“Aisea ua naunau ai i le ufi ae le faautagia muamua le papa poo le tulafono? Ae afai lava o Sui o loo finau nei-e mai le Itumalo o se Aiga Tofia o Samoa-o le a tosotoso ai lava faa-manu ua mate (tulou) lenei mataupu-ona o polokiki leaga! O le a sou taofi?

3. Matauina i aso uma lava le tautalagia o se tama’ita’i talu ai nai faaaliga e faapea na ia vaaia ma faalogo ai, aemaise ai o nisi o faailoga o loo vaaia pea i lona tino! O le fesili la-o le a le pogai e saga fesiligia ai fua lea tamaitai ae ua uma lelei ona ia faamatala mai le mea na tupu ia te ia! O le tulaga la ua le malamalama ai-o le a le pogai e te su’esu’e ai fua ma fesiligia le mea na tupu i lea tamaitai? Afai e leai se mea faapena na tupu ia te oe -ona e malolo lelei lava lea i le pese a le Faaili-ae le o le fesili so’o ua pei o se faamasinoga le mea o loo fai nei!

Afai tou te le’i faalogoina se si’ufofoga faapea ma leai ni faailoga o maua i outou tino- ia onosa’i atonu o le Aso Maliu o le 2017-o le a o’o atu ai ni faailoga faapena ia te outou-ae soia ona tautala fua ae leai se mafuaga e tatau ai ona fesili! Afai o se mea mai le Atua-aisea la ua outou le fesiligia ai le Atua? Ia manatua lelei le itu lenei-e le faaali le Atua i tagata-se’ia vagana ai ua finagalo e faailoa mai se mea i le lalolagi-ona faatoa faailoa mai lea e ala i se tagata faatauvaa ma le agamalu-ae le o le ‘au-loto fefete ma le fia amio Atua. O le a sou taofi? 

4. Ua matauina i le TV1 i le Polokalame o le Lali le manaia o suiga ua fai nei-ae peitai- e alualu lava le manaia  o faasilasilaga o maliu ma aso fanau ma faaaliga faalaua’itele-ae pa’ia oe le mea lea ua faaigoaina o le “Fola Lautele” -ona oti loa lea o le Polokalame.

O le uiga o se faamatalaga-e manania manaia lava se sologa lelei o le faasilasilaga i le gagana Samoa-ae oso mai loa le mea lea e igoa o le Fola Lautele-ona oti lea o le polokalame atoa! O le uiga o se manatu-e oso mai le Fola Lautele-ua faa-Peretania atoa le polokalame-leaga o tala o ia polokalame e faa-Peretania. A faapefea le mamalu o le atunuu o faafogafoga mai tuā ma Savaii- e le malamalama i le faa-Peretania?

O le fautuaga la-e manaia lava le Fola Lautele pe ana faapeaa e faa-Samoa! E pei ona fai atu-o le a leai se aoga o lea polokalame-pe afai e le o malamalama ai le atunuu o loo faafogafoga mai i leitio! O le a la sou taofi? 

Matauina foi i Tala Fou fai mai se ulutala ua matua sasa pala e le Palemia le faatalale-ma o lea faaupuga e faasino i le tane suau’u lea na mu i luga o le uafu i Matautu-tai. Fai mai le Palemia- ana faapea e pa lea tane-e mafai ona mu ai le Fale Talimalo o le Tusitala, le fale tele o le Malo ma faasolo atu ai lava i fale o le Palemene i Mulinuu ma isi fale talu ai-o Sogi lea e teu ai le penisini. Ia afai la ua sasa pala e le Palemia le faatalale-o le fesili-e faapefea le tagata e ona lea fuafuaga e ave lea tane suau’u e faatu i le Uafu i Matautu-tai?

O lona uiga-o ai e ana lea fuafuaga e faatutū ia tane i le uafu-o le Malo poo se Kamupani? O i latou tonu na e tatau ona matua sasa pala-talu ai o le tele lava o atunuu e pei o NIu Sila ma Ausetalia-ta te le’i vaai lava i ni tane suau’u ma ni tane penisini o faatutu i luga o latou uafu! Tailo foi i isi atunuu o le Pasefika e pei o Fiti ma isi pe i ai ni a latou tane suau’u ma penisini i luga o latou uafu? Ae o le mea sili lava-poo ai lava e mafai ona tuua’ia i le faatalale-ae o le Malo lava na te faia le faaiuga mulimuli! O le a sou taofi? 

09 April 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>