Amata le Fofogaina o le Tagi e faasaga i le Ekalesia

19 February 2016, 12:00AM

Tusia - Lanuola Tusani Tupufia 

Faaliliu e Seagaitumua Tupuola

 

O le fofogaina o se tagi na faaulu e Reverend Kerita Reupena e faasaga i sui o le Komiti a le ‘Au Toeaina a le Ekalesia Faapotopotoga Kerisiano i Samoa (C.C.C.S.) na amata i le Faamasinoga Sili ananafi. 

O lea Komiti e aofia ai le Taitaifono o le Ekalesia Faapotopotoga Kerisianoi Samoa, o Rev Elder Tavita Roma, le Sui Taitaifono o le Ekalesia Faapotopotoga Kerisiano i Samoa, o Rev Elder Tautiaga Senara ma Rev Elder Kerisiano Soti ma Rev Elder Peleti To’ailoa.

Ua molia i latou ona o le latou faaiuga ina ia aveese mai ia Rev Reupena ni tofi sinia se lua i totonu o le ekalesia e aofia ai lona tofi o le avea ma Faatonu o le Itumalo o Kuiniselani i Ausetalia.   Na matua faatumulia le potu Faamasino i Faife’au o le ekalesia ma isi lava sui auai o le ekalesia faapea foi ma sui auai o le ekalesia na malaga mai Ausetali mo le fofogaina o lea mataupu. 

O se loia e faamautu i Niu Sila, o Leulua’ialii Olinda Woodroffe, o le loia lea a Rev. Reupena. O le Queen’s Counsel, o Francis Cooke, le loia o Leota Tima Leavai ma Semi Leuna Wai-o loo fai ma sui o le Komiti a le ‘Au-Toeaina. O loo taiulu i lea Faamasinoga le Faamasino Sili, Lana Afioga Patu Tiava’asu’e Falefatu Sapolu. 

O ananafi na tuuina atu ai e Rev. Reupena ni tusi samani se lua na fai ia Mati ma Aperila 2015. Ae ui o lea, na teena e Mr. Cooke se vaega o ia tusi ma fai mai ua na o se tala na faalogo ai.  

E le’i talia e Leulua’ialii lea mau. O lana finauga e faapea sa fai o ia ma sui o lana paaga i totonu o se fono, ma na ia faaoo atu mea na talanoaina ai ia Rev Reupena-talu ai- “o lana aia tatau lona iloa o ia mea.”  Ae peitai-o le faaiuga a Lana Afioga Patu-na teena ai lenei tulaga. Na ia faamanatu atu ia Leulua’ialii –e le o ia o se tagata molimau ae o se Loia Faufautua. Na ia poloaiina le aveeseina o ni vaega o ia moliaga na finauina. I le faagasologa o se suesuega e ala i fesili ma tali, sa fesiligia e Mr. Cooke Rev. Reupena e uiga i lana faaiuga ina ia “faaleaogaina le Southern distric”i Kuiniselani.  

Sa fesiligia e Mr. Cooke le Faife’au pe na ia silafia le “popole” o ‘aulotu ona o le aofai o le tupe na talosagaina i latou ina ia tuuina atu e AUD$1000 i le AUD$2000, e fai ma sao i le faatauina o se fasi eleele.

O le tali, sa finau mai pea Rev. Reupena e faapea o le aofai na fufuaina na faamaonia i le faagasologa o se fonotaga a le komiti laititi a Faife’au o le Ekalesia o Kuiniselani. Fai mai a ia o le aofaiga aupito itiiti e AUD$500 ma le aofai aupito i tele e $2000. Na toe tuu atu e Mr. Cooke lea fesili ia te ia.

”E toatele ‘aulotu na fai mai latou te le maua lea tupe.” O le tali, fai mai Rev Kerita: “O le atugaluga lena na lāgā e se tagata matua mai le itumalo i Saute, ae peitai-ua uma ona matou sainia pepe mo le fanua. O le tupe aofai na faamaonia i se fonotagata….o se fono faanatinati lea na talo ma e na o nisi o sui auai na auai.”

Na toe taua e Rev. Reupena e faapea o se fono a le Komiti a le ‘Au-Toeaina i Samoa na talanoaina ai le mataupu tau le vaevaeina o le itumalo o Kuiniselani.   Sa ‘ou talosagaina ina ia toe aumai i tua le mataupu e talanoa ai i se isi aso,” o lana faaaliga lea. 

O lona toe foi atu i Perisipani, fai mai le Faife’au na toe feiloa’i ai ma le itumalo o Kuiniselani.  “Sa ‘ou faailoa atu ia i latou e leai se vaevaega e faia o le itumalo,” o lana faaaliga lea. Ona fesiligia loa lea e Mr. Cooke le faaiuga a Rev. Reupena ina ia vaevae le Itumalo i Saute. 

O le tali, fai mai a ia o lea faaiuga na fai e tusa ai ma le tonu na fai i le faagasologa o se fonotaga faanatinati ma sa faavae foi lea faaiuga i luga o le Faavae o le ekalesia.

Sa toe fesiligia foi e Mr. Cooke le Faife’au pe o le uiga o lana faaiuga  e faape o tulaga-tofi uma lava o tiakono, faife’au toeaina ma faife’au o aulotu e 14 e aafia ai o le a aveeseina. “Ioe o le faaiuga lena na ‘ou faia e faavae i luga o lo’u tulaga faa-toeaina ma e faavae i luga o le Faavae o le ekalesia,” o le faaaliga lea a Rev. Reupena. Na fesiligia e le loia le Faife’au pe aisea na ia le logoina ai le Komiti a le ‘Au-Toeaina i Samoa e uiga i lana faaiuga ina ia faataape le itumalo i sauté.

 “O le faaiuga ina ia faataape se itumalo o se faaiuga tele lea ae tatau lava ona mulimuli-tu’i i taualumaga talafeagai,” o le faaaliga lea a le loia. “Aisea na e le faailoa atu a ii le komiti a le ‘au-toeaina e faapea ua tonu ia te oe e (faataape le itumalo)? 

 “O loo i ai lava ta’iala e faatino ai lenei tulaga (le faataapeina o le itumalo) ma ou te malamalama lelei i ai,” o le tali lea a le Faife’au. “E le tatau ia te a’u ona ‘ou aumaia le mataupu i le komiti a’o lei mae’a….E tatau ona ‘ou aumaia i le komiti pe a uma ona latou faia lea o le tonu pe latou te taliaina pe leai.”

O le taimi lea fai mai Mr. Cooke ia Rev. Reupena pe sa ia te ia se pule e faataape ai se itumalo. Na ia talosagaina o ia ina ia faasino tonu atu pe o gafea o le Faavae o le Ekalesia o loo tuuina atu ai le pule ia te ia e faataape ai le itumalo.“E le o oe foi o se tasi o le Komiti a le ‘Au Toeaina poo se komiti laititi a Faife’au,” o le faaaliga lea a Mr. Cooke. “E leai se paoa o ia te oe e fai ai ia faaiuga. O le mea moni e leai se mea na iloa e le komiti a le ‘au-toeaina e tusa ai ma le mea na e faia.”

Ae peitai-fai mai Rev. Reupena o ia o se sui o Komiti. “O soo se mataupu lava e faasino i le itumalo e tuuina atu i le Fono Tele-o le mea lea e le mafai ai ona ‘ou faailoa atu i le Komiti le tonu ua ‘ou faia pe afai matou te lei feiloa’i ma le itumalo.  

 “O a’u ou te i totonu o le komiti laititi a Faife’au, o la’u matafaioi lena ma le tiute.”

Sa finau atu pea Mr. Cooke e faapea e leai se aia tatau a Rev. Reupena e faataape ai le itumalo.  

 “O le mea na e faia e mo i latou e le lagolagoina oe.” O le tali a le Faife’au e le moni lea tulaga. O le isi itu, sa fesiligia e Mr. Cooke le Faife’au pe o lana mau e faapea e leai se pule o i le Komiti a le ‘A-Toeaina e aveese ai o ia mai lona tulaga.

O le tali, fai mai Rev. Reupena ioe. Fai mai a ia o loo tumau pea lona le malamalama pe o le a le mea sese na ia faia. I le faagasolo atu i le Taitaifono muamua a le Komiti a le ‘Au-Toeaina, o Rev, Elder Peleti Toailoa, sa fesiligia e Mr. Cooke Rev. Reupena pe aisea na ia teena ai se fono na talo e le Taitaifono e talanoaina ai lea mataupu. “E le o se mea talafeagai ‘ea mo le Taitaifono ona alu atu ma toe fofō faalelei mea? “ o le fesili lea a Mr. Cooke. 

Sa le auai Rev. Reupena i lea mataupu.. Sa fesili Mr. Cooke pe o le faamatalaga molimau a le Faife’au e faapea o le ‘Au-Toeaina e le mafai ona latou talanoaina se mataupu taua a’o lei faia se fono aloa’ia a le Komiti. “ E le o se mea talafeagai ‘ea le faapea a fia alu atu le Taitaifono o le Komiti a le ‘Au-Toeaina i Perisipane e talanoaina lenei mataupu?”o le fesili lea ia Rev Reupena.

O le tali-fai mai a ia e leai.

Sa faailoa atu foi e Rev. Reupena sa i ai le isi fono a le Komiti a le ‘Au-Toeaina lea na latou malilie ai ina ia toe faalelei le itumalo ae le’i manuia-ma ua vaeluaina ai. Fai mai a ia sa i ai se fono na talo mo le itumalo ina ia fono ae na o atu le itumalo i Saute ma se “tusi faamavae”ma momoli atu ki uma if ale ma isi lava mea. “Na latou faamavae ma sa le manana’o e avea ma vaega o le itumalo.”Sa faailoa atu e le Faamasino Sili o Patu ia Rev. Reupena e faapea o le faaiuga mai le Komiti a le Au-Toeaina ia faataape pe a le mafai ona latou toe faalelei. “Ae peitai-ina ua e taunuu i Perisipane-ua uma ona latou faamavae o lona uiga e te lei faatioina le faaiuga mai le Au-Toeaina ina ia toe faalelei, ua e tuu atu i latou e o,” o le faaaliga lea a le Faamasino Sili o Patu..  Na ioe Rev. Reupena ma fai mai sa fai se faaleleiga i luma atu o lea tulaga i luga o le Komiti a le ‘Au Toeaina-ae sa i ai pea lava isi mataupu.

Sa fesiligia e Mr. Cooke Rev. Reupena pe na te lei iloa e faapea o sea faaiuga sa le talia e le ekalesia ma lona tulaga.  Sa finau atu pea le Faife’au o le faaiuga a le itumalo ia talia le faamavaega a le itumalo i Saute. Ae faapefea tagata o le aulotu e tapuai i le Atua?” o le fesili lea a Mr. Cooke. 

Fai mai Rev. Reupena o loo latou lava lea sa’olotoga ma le filifiliga na o ese ai, ae le o sana tonu.

O loo faaauau le faamasinoga i le asō.

 

19 February 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>