FAASILASILAGA O LE TU’UMALO O LE AFIOGA I LE SUI O LE FONO A SUI TOFIA LE TOFA TUILOMA, PULE, UNASA, ALAIMOANA, LAMEKO GAEE.
O le a moe malū ia le aupeau i ou paia Samoa o le atunuu ua uma ona tofi, e afua mai le Matasaua seia pāia Fili ma Puletuu, O paia Faaletalalelei aua le nofo a Ekalesia e fia i Samoa, o Mamalu Faalemalo aua le Afio o lau Afioga i le Ao Mamalu o le Malo Tutoatasi o Samoa, lau Afioga Tuimalealiifano Vaaletoa Sualauvi le II, Afio le Sui o le Fono Sui Tofia, Afio lau Afioga i le Alii Palemia ma le Kapeneta, lau Afioga i le Faamasino Sili ma le Vasega o Faamasinoga, lau Afioga i le Fofoga Fetalai ma sui mamalu o le Palemene. O ou sā Faaleaganuu aua le afifio o Tama ma Aiga o Aiga foi ma Tama, le Mamalu i le Usoga ma tulatoa o aiga.
Tulou, Tulou, Tulouna lava.
Ue, ua o se afa fo’epapa le tui o le faavauvau, ina ua tuua le lepa nai Lata; talofa ua tofa i le aliti le tunamoevai. Ua ōia ai le vao i Fagalele, ma ua peia ai le taualuga o Manua, aua ua tu'ua le malo e le Afioga i le Sui o le Fono a Sui Tofia, le Tofa Tuiloma Pule Unasa Alaimoana Lameko Gaee, i le Maota Gasegase i Ulumotootua i le Aso Sa, 01 Aperila 2018.
Ua to ai nei le timu, ua tata faalia auā ua lagia Faleulū ma Tulāsoō e alalata’i ai Tuiloma ma Ta’itu’uga, o manu ole tuasivi e fagogota i tai e lua, ae tainane le laoa o Lotoā, e alalatai ai Leāvasā ma Ma’aelopa, o to’oto’o ole aava. Ua lagia Paepaefoa auā le Alalatama ia Patea ae tainane le usoali’i. O le usuia foi lea o le fono i Falepunaoa auā le mamalu o lo outou to’afā ma le Lotoifale o Manusamoa. O le lagi lava lea auā le afio o Alalagafa, ao ni fue lafo ma ni tootoogausia i la lua nofo tulafale ma le tauaga eseese ia Faleālili.
Tulouna ia lagi ma ni usugafono
Aua ona suafa Pule, Unasa ma Alaimoana
Tulouna le to o le timu
Tulouna le tafea o le tauofe
Tulouna le Gasolosolo o ao
Tulouna le taape o papa
Tulouna le mafuli o le masina
Tulouna le gasetoto o le la
Tulouna le taatiu ma le Matagitogaina
Tulouna le gaugau o auta
Tulouna lagi aua tama ma aiga o aiga foi ma tama.
Tulouna le malepe o le faasau ma le gausia o atipouniu aua le Usoga ma Tulatoa o aiga
Tulou, Tulouna lava
E faatulou atu foi aua le Tapuaiga a le Faigamalo a Tutuila ma Manua
Le Afio o le Kovana Sili Le Peresetene o le Senate ma le Fofoga o Maota Sui ma le Famasino sili.
Ni lagi aua le Faleagafulu ma le Nofo a Maopu, afifio Faatui ma Tootoo ma upu i le Manuatele.
Aisea ?
Aua ua tuumalo le Sui o le Fono a Sui Tofia o le Malo Tutoatasi o Samoa.
Le Tofa Tuiloma, Pule, Unasa, Alaimoana Lameko Gaee
O le Polokalame o ona toe Sauniga
O le Aso Lua 10 Aperila i le itula e 3.00 i le afiafi o le faia ai lona sauniga faaleaiga, i le malumalu o le Ekalesia Faapotopotoga Kerisiano i Samoa i Alafua.
O le maea ai o lona sauniga faaleaiga ona toe molimoli atu lea o lona sa i le maota maliu o Pa'u Sefo Pa'u ma tofa ai.
O le Aso Tofi 12 Aperila 2018 i le itula e 3.00 i le afiafi o le a aumaia ai lona Sa mo tapuaiga Faale-Ekalesia i le Malumalu EFKS, Alafua ona mapu atu lea i lona aiga i Alafua mo leoleoga o le po.
O le Aso Faraile 13 Aperila 2018 i le itula e 8.30 ile taeao o le a aumaia ai lona Sa mai le maota maliu o Pa’u Sefo Pa’u mo le Maota Fono o le Palemene o Samoa i Tuanaimato. O le itula e 9.00-11.00 taeao, o le a taoto ai lona Sa i le Maota fono o le Palemene i Tuanaimato, mo le faatinoina o tulaga mamalu faalemalo (lie in State). Ona sosoo ai lea ma lona Sauniga aloaia Faale-malo (State Funeral Service) i le itula e 11.00 i le taeao, i le Maota fono o le Palemene i Tuanaimato.
I le maea ai o lona sauniga faale- malo, ona molimoli atu ai lea o lona Sa mo lona oliolisaga tumau i Alafua.
O le Aso Lulu 10 Aperila 2018, o le a amata ai ona faavaeloto tagavai i soo se tafa o le atunuu, seia oo atu i le goto o le la i le Aso Faraile 12 Aperila 2018, o le aso malolo foi lea mo tagata uma o Samoa.
Ia faamaise le Agaga Paia i le Aiga loto favauvau, o paolo foi ma gafa o aiga na lua. Le tapuaiga i le Ao Mamalu o le Malo, Afioga i le Sui o le Fono Sui Tofia, le tafatolu fefaatauagai o le Malo tutoatasi o Samoa, ma le tapuaiga a Samoa i tafa e fia o le atunuu, ma le lalolagi.
Le Atua e, o lē Pule Aoao, ua e manumalo i le oti ma le tuugamau. Mapu atu ia lau auauna i le tuugamau e tofā ai, seia oo i le aso e te afio mai e siitia lau fanau, e nofotupu faatasi ma Oe i le Ola e faavavau.
Faafetai
Sainia lenei faasilasilaga
Agafili Tomaimanō Shem Leo
(Faailautusi o le Kapeneta.)