O LA’U TALA FO’I

04 February 2016, 12:00AM

1. Matauina i Tala Fou nisi o faiga mata’utia ua faatinoina i totonu o Samoa e ni tagata mai fafo.

E ui la ina aliali mai le suafa o lea alii o ia o se tagata mai fafo, ae peitai-e le o mautinoa pe o le tamaitai lea o loo aafia faatasi ai ma lenei alii mai fafo ona o ni faiga tau faasese-o se tamaitai Samoa pe leai! A e afai la o se tamaitai Samoa lea tamaitai-o lona uiga-ua matua tulaga ese lava lenei mataupu. O le uiga ese-afai o se tamaitai Samoa moni lea tamaitai-o le mea la lea ua na faia-ua na toe faalata lava lona atunuu!

Ae o le fesili lava e fia maua muamua i ai se tali-e faapefea ona o mai nei tagata ese mai fafo –fai nei faiga mataga i totonu o Samoa? O ai a’o fea i latou tonu ia o loo totogi i tupe a le atunuu- e gafa ma nei faafitauli? O le tulaga lea ua aliali mai-o le alu, alu lava o lea Papalagi-sau fai ana faiga mataga iinei- ae ta’uvalea ai ma Samoa! O le a la le faasalaga e tatau ona fai i nei ituaiga o tagata? O le mea tonu lea e ta’u i le faa-Samoa o le ‘fitifiti pute’!

A fua la i le tele o faamatalaga e aumai nei e le faigamalo e uiga i lea mea ma lea mea-ae leai se faiga ua faata’oto e tali atu ai i tagata faapenei! Afai la e fiafia tagata mai fafo e o mai i Samoa nei e fai ai a latou faiga tau faasese ma le pi’opi’o-o lona uiga-ua iloa lelei lava e ia tagata- e le mafai ona faa-falepuipui i latou-talu ai –e le o falepuipui foi taitai o le malo ma tagata faigaluega ia na faia faiga tau faasese ma le pi’opi’o-ia na maumau ai le faitau miliona ma miliona o tupe a le atunuu-lea ua pogai ai ona matitiva tagata o le atunuu! O le a sou taofi? 

2. Matauina foi i Tala Fou fai mai e sili atu i le 300 tagata o le a feagai ma moliaga tau faiga-palota-o lona uiga-o i latou ia e le’i resitalaina mo le faiga-palota o loo loma nei! Ia-afai la o le tulaga lea o le a i ai-e moni lava o loo fai mai le Tulafono e tatau ona resitala uma tagata mo le faiga-palota ua aulia le matua e 21 tausaga-ae faapefea pe afai ua tonu i lea tagata lava ia- e le fia palota? Afai la e le palota-o le a leai foi sona sao i le filifiliga o ta’ita’i o le atunuu.!

Afai foi ua le fia palota tagata- e tatau ona i ai se mafuaga! Afai ua fiu le atunuu e taumafa palapala (tulou) talu ai faiga faatautala a lenei faiga-malo-o lona uiga la-e i ai le mafuaga ua le toe fia palota ai tagata! Ae faamata o se mea tatau le faamalosia o se tagata e palota ae le o fia palota? E le o le aia tatau ‘ea lena a le tagata palota lava ia? O le a le pogai e faamalosi ai tagata pe  a ua mumusu e palota ae leai se manuia o vaaia? O le a sou taofi? 

3. Matauina foi i Tala Fou se tagi talatala a se tama –ona ua poloaiina ina ia o ese mai lea fanua sa nonofo ai ona ua uma ona faatau atu i le isi tagata! Ia-e leai se tasi e faa-talatu i ia tulaga-ae o le mea taua lava-o le faamoemoe ma tuu atu i le Atua mea uma lava!

Afai lava e moni lona taofi-e leai se mea e faamamafa ai lea tulaga, ae faamoemoe i le faamasinoga tonu a le Atua. E ui foi ina tele tupe ua alu ai-ae malosi lava le mea moni! Ia silafia foi o le lalolagi lea tatou te soifua ai- ma poo le a lava lo tatou taumafai e tausi i le mea moni-e tofotofoina lava i tatou i taimi uma-leaga o le taua o loo fai nei- o le taua a le lelei ma le leaga! E ui lava la ina pei e foliga mai e peiseai e tele taimi e manaumalo ai le mea sese-ae maua loa le amiotonu-ona uma loa lea ma mou atu na mea faatiga ulu! O le a sou taofi? 

4. Matauina foi i Tala Fou fai mai ua tu’ipala se alii aisi i Apia-o lea la tu’ipala- e le faapea na fasi-ae ua le fiafia I ai tagata o le atunuu sa alolofa ia te ia ma ave i ai tupe.

Ae o le itu lea ua faailoa mai e tagata o le atunuu-fai mai o tupe lava ia e maua i aisiga a le alii i aso uma i Apia-e le faatauina ai se mea’ai a lona aiga poo se mea aoga-ae maua loa tupe pe a uma lea aso ma lea aso-“ona alu loa lea inu pia ai!

O lea la ua fai mai tagata o le atunuu-‘AUA TOU TE TOE TALITONU I AI’ o tupe uma lava e maua- e liu-suavai uma lava! Ia-e uiga ese foi le poto o lea alii- e avatu tupe a tagata o le atunuu ona o le alolofa-ae nofo ia ma faa-liu-suavai! Afai la e aisi ae le alu e fai se ma’umaga pe saili se galuega-ae avatu tupe o le alofa ae alu inu pia ai-o lona uiga la-o le matua tau faavalea lava lea mea. Poo fea lava o Upolu poo Savaii e sau ai lea alii-o le upu moni- ua ala ona alu ese mai ai ona o le fia ta’ata’a solo ma faamoemoe i le alofa o tagata e inu ai ana pia-ae le faia ai se mea aoga! O le a la sou taofi i nei ituaiga o tagata?

04 February 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>