O le olaga lenei, e le asa ma ni fa’afitauli. E fetaia’i foi lava ma fa’afitauli i le tele o taimi.

Ae o le finagalo o le tina ia Filomena Letia Sagato mai le afioaga o Levi Saleimoa, po’o a lava fa’afitauli, e tatau lava ona fa’amalosi ma taumafai 

O le tina ia Filomena e 64 ona tausaga ma ua toe nei o ia ma le fanau le latou aiga ona ua vala’au le Atua i le tama o le aiga. 

“Na maliu le tama o le aiga i le tausaga ua te’a,” o lana fa’aaliga lea. 

“O lea toeititi atoa le tausaga talu ona maliu.  O se tulaga lea sa fa’afaigata mo i matou, ona o le tama o le aiga sa ta’ita’ia le aiga. 

“O ia sa fa’amoemoe uma iai a’u nei ma le fanau. O ia sa tele ina faia fe’au a le matou aiga. Ae ina ua maliu le tama o le aiga, sa telē lava le misia o le tama o le aiga i totonu o si o matou aiga. 

“Ae peita’i o le olaga lava e fa’apena. E le tumau pea i lalo o lenei fogaelele.”

Na ta’ua e le tina ia Filomena, o si o latou aiga e le’o se aiga e lima malosi. E utiuti lava le fa’asoa ma o le lauele’ele lava e fa’amoemoe iai le tausiga o le aiga. 

“E tiga lava le lima vaivai, e taumafai lava e fai nai atina’e laiti e fesoasoani mai i le vaivai o lo’o iai. 

“Ia na’o le pau lava le tagata o lo’o maua mai ai le fesoasoani o se tasi o le fanau o lo’o alu i Ni’u Sila i le tauga apu. 

“Ae o aso lava, e taumafai lava o le a le mea e maua o lena lava e tausi ai le aiga nei.”

Na ta’ua e le tina ia Filomena, o le fa’anaunautaiga o lona aiga o lo’o iai i le taimi nei, o le faia lea o se fale mautū e mafai ai lea ona nonofo ai ma si ana fanau.

“E pei ona tagataga’i atu i si o matou fale, o lo’o iai lava le tulaga fa’aletonu o lo’o iai. 

“O lea foi le fa’anaunautaiga, ina ia fa’aleleia le fale mo lo matou aiga.”

 “E lelei lava mea uma, ae pei na pau lava le fa’afitauli o le utiuti lea o le tala tau seleni.

“O le togā koko lava o lo’o fa’amoemoe iai lenei aiga i le tele o taimi. O le to’atele lava o tagata e su’e koko mai ii i lo’u fale ma e fa’atau lava o isi a taimi e ave fua foi i nisi o aiga.

“E iai foi togā fa’i ma le ma’umaga e maua mai ai meaai mo le aiga. E lava ma totoe lea mo’i matou.”

E le gata i lea, na ta’ua foi e le tina ia Filomena, o le taimi nei o ia o lo’o ua fa’auluulu iai lona aiga, ma o le ala lea e tinou ai lava e faia so’o se atina’e aua se manuia o lona aia. 

“O le taimi nei, ua tau le faia ni feau mamafa. Na’o le lalagaina lava o fala, a lelava foi nofonofo i totonu o le fale, ia ua alu atu i fafo ma velevele nai vao o iai. 

“A leai foi, ua ou alu ma fealualuai ma savalivali atu agai i luma o le auala. O lea ua ou faia le tiute uma o le tama ma le tina o le aiga.  “O lona uiga, e ui lava ina faigata, e tatau lava ia te au ona fa’amalosi ma taumafai aua le manuia o si o matou aiga.”