Saili galuega mo aiga
O le faamuamua lava a matua i lenei vaitaimi o lo’o ave lava i e tausiga o aiga aemaise lava fanau ma lo latou ola tuputupu a’e ai i aso uma.
O le manatu faaalia le ao le tama ia To’oloa Meki ma ii le afioaga o Fasitoo-uta.
O ia o se tama fai-faatoaga ma ua na’o ia lava o lo’o faamoemoe iai lona aiga mo le tausiga ai o le ola i aso uma.
O lana faamuamua o lo’o ave lea mo lona aiga.
‘Toatolu la’u fanau o lo’o ao’oga o leisi toalua o lo’o matou nonofo i le fale ua na’o le faatoaga lea o lo’o faamoemoe iai lo matou ola a ii aso uma” o lana tala lea i le Fofoga o Samoa.
O le manaoga o le tama o le mea e silisili ona lelei mo lana fanau. Ma o lona manaoga o le sailia lea o sana galuega i le lumanai.
“O pili aoga lava o la’u fanau e faapopoleina ai au aua i le taimi nei ua maualuluga foi tulaga ua oo iai vasega a le fanau.
“Mo au lava ia ia mafia ona ou faia se galuega aua la’u fanau e le’o le nofonofo ae ia galue aua se manuia o fanau.
‘E leai seisi o maua e faigaluega, o nisi o taimi ua faatau fua o le faatoaga aua sina tupe maua mo le aiga o le manaoga a ia mo le lumanai ina ia vave maua se galuega. E le gata i mea fai a le aiga ao le nuu ma le Ekalesia.
“Aua o faalavelave i totonu o nuu ma ekalesia ma aiga e tau fai tutpu uma i le taimi e tasi ma o tupe uma lava mea uma e le mafia ona ‘aloese mai ai.
E talitonu le tama ia To’oloa ua taugata lava le soifuaga ua iai nei.
“A faatusatusa atu i lenei vaitaimi ma aso ua alu e tele lava le eseesega pe a fua iai i le tau o le soifuaga ua iai nei ua fai lava sina taugata ae e leai se mea e mafia ona fai.
“O le faalogo lava ma faatino ae faitalia ia le Malo ma a latou faaiuga fai, ae e taua ia au le galue malosi aua lo’u aiga.
E talitonu le tama, e omai faatasi lava suiga ma luitau o le olaga, ua masani ai lava o tatou tagata.
“E faafesagai lava le tagata soifua ma le mau faafitauli o le olaga ae mo matua lava ia e tatau lava ona faamuamua fanau mo se lumanai manuia. “Rusa lava po o le a le faigata o le olaga nei, ae o le naunautaiga o fanau ia manuia.
O lona manao o sana galuega mo le lumanai.
“O le a lava le galuega e maua pe ofoina mai e se tasi o le mea taulia ia te au ina ia maua se tupe mo le fafagaina o fanau ma pili aoga o fanau.
“Ma fai ai mea faale-aiga aua o tupe lava mea ua tatou talanoa iai i lenei vaitaimi.