Ola fa’alagolago i fua o fa’atoaga
E ala ese’ese mai lava fa’amanuiaga a le Atua i so’o se tagata.
Mo le tina ia Seira Tuipea, 39 tausaga mai le afioaga o Malie, o le fa’amanuiaga tele a le Atua i lona aiga o le foa’iina lea o eleele lelei ua fa’aaogaina lelei mo fa’atoaga.
O Seira ma lona aiga o lo’o fa’alagolago nei i fa’atoaga o fuala’au aina. E le gata i le tausiga o lona aiga, ae fa’apea foi i le itu tau seleni.
“E to’aono si a’u fanau, ma o teine uma lava. Ou te galue malosi lava la e tausi si a’u fanau.
“O le fa’atoaga fuala’au aina o lo’o tou tagataga’i atu i ai, o le mea lena o lo’o fa’alagolago iai le manuia o le matou aiga.
“E le gata ina fa’aaogaina mo meaai a le aiga, ae ta’ilua foi aso o le vaiaso e fa’apena ona fa’atau atu ai fua o le fa’ato’aga aua foi se seleni mo nisi mea e fai i totonu o le aiga.
“O le taimi lenei, e leai se isi o faigaluega o le matou aiga, ae fesoasoani uma le matou aiga i le faiga o le fa’atoaga.”
Na ta’ua e le tina ia Seira, o lona fa’anaunautaiga o lo’o iai i le taimi nei, o le fa’atele lea o lana fa’atoaga ina ia fa’apea ona tupu ma ola ma maua ai se fesoasoani tele mo lona aiga.
“O le taimi lenei o lo’o iai le manatu ina ia toto le pinati i totonu o le fa’atoaga lava lea ina aua o le mea lea sa amata mai ai le matou aiga.
“O lo’o toto a matou pinati i le pito i tua, ae o le togā pi ma kapisi o lo’o toto i le isi pito.
“O le atina’e lea o lo’o maua mai ai se fesoasoani mo si o matou aiga.
“E galulue foi lava le matou aiga atoa i le fa’atinoina o lea fa’atoaga auā e maua mai ai se fesoasoani mo si o matou aiga.”
E le gata i lea, na ta’ua e Seira, e sili atu ia te ia le faima’umaga nai lo’o se isi lava galuega.
“E sili atu ia te a’u lea nai lo’o ituaiga galuega ia e amata i le 9 i le taeao ae uma i le 5 i le afiafi.
“O le tele o tagata faigaluega, e faigaluega i le tele o itula i aso uma ae fa’atoa maua le totogi i le aso Faraile.
“Ae o matou, e maua lava le tupe pe’a fa’atau fuala’au aina i so’o se aso o le vaiaso.
“A maua mai fo’i se tupe i le fa’atauga o fuala’au aina, e silia lava ma le $100, e aumai ona fa’asoasoa loa lea mo meaai a le aiga.
“E fa’amoemoe ma fua foi lava le tupe e maua mai i le tele o fuala’au aina e fa’atau atu.”
Na ta’ua e Seira, ua silia nei ma le fitu tausaga o ia fa’atinoina lenei atina’e.
“Ua fai lava sina leva o matou fa’alagolago i fa’atoaga aua le tausiga o matou aiga.
“Na matou me’i mai loa mai i le pitonu’u i tai ma nonofo i tua inei, amata loa ona faia le fa’atoaga lea.
“Ua masani foi la le fanau i le faiga ma le fa’atinoina o le fa’atoaga, ma e fesoasoani malosi foi la i le totoina ma le fa’atauina o fualaau aina.
“E mo’i foi lava e iai sisi aferika e fa’aleagaina le togala’au i nisi o taimi, ae o lo’o sologa lelei pea lava mea uma.”