Tautuana o tatou tofi
Ua tele ina galo e le to’atele o tagata la latou matafaioi tausi.
O lea le finagalo o le tinā i a Sina Faleao i le fa’atalatalanoaga ma le Fofoga o Samoa i le aso ananafi.
Na ia fa’ailoa o le tele o le mau fa’afitauli ua ‘a’afia ai Samoa e mafua mai ona ua galo e tagata a latou feau ma tiute fa’atino.
“Ia e pei o lea lava le tulaga o lo’o ua i ai le taimi lenei, ma o se itu e ao ai lava ona fa’atino aua le lelei alu i luma o le atunu’u o le toe va’ava’ai lea i tulaga e tatau ona i ai si o tatou atunu’u.”
“O se itu e ao ona silasila lelei ai lava le tele o nai o tatou tagata.”
“I lo’u ia lava manatu na’o a’u ia, ua tauau ina galo e le to’atele o nai o tatou tagata tu ma agaifanua na masani ai.”
“O lea lava fo’i le tulaga e pei ona ua i ai nei ua tauau ina galo i matua le mafutaga vavalalata ma fanau.”
Na ia ta’ua o se itu e ao lava ona silasila lelei i ai le taimi lenei.
“Ua tele le mau fa’a’lavelave ua alia’e mai nai fanau, ma ose fa’anoanoaga tele lea i a te a’u ia.”
“Ua maitauina ua fa’atupula’ia ma ua pei ai o se tulaga fo’i lea ua faigata lava ona fai i ai se fuafuaga le taimi leneui ona ua fa’atupula’ia.”
“O lea fo’i na o tatou fa’alogo i le taimi lenei i se tasi o fa’alavelave e pei ona i ai se tamā matua, ia ua tatou va’ava’ai i ai.”
“Ua galo i tagata le ala tatau ona ui ai, ua galo le Atua, ua leai ma se ola matata’u e fa’atino ia tulaga, ma fa’apea ifo i o latou loto e leai se isi o va’ai atu.”
‘Ae galo ai le Atua, ma e ao lava ona va’ava’ai lelei i ai, aua lava le aga’i atu ai le lumana’i.
O lona finagalo e ao i tagata Samoa ona se’i toe to manatu.
“Ia o tatou galulue fa’atasi e tete’e atu nei faiga e ‘a’afia ai fanau aemaise o le lautele o le atunu’u i le aga’i atu ai le lumana’i.”