O pulega fa’amatai, o le malosiaga o le nofolelei o nu’u

By Ilia L Likou 07 November 2016, 12:00AM

O le malosi o pulega fa’amatai, e fesoasoani tele lea i le nofo lelei o se nu’u. 

O lea le finagalo o le tamā ia Faumuina Muti mai le afioaga o Saleimoa. O le tamā ia Faumuina o ia lea ole pulenu’u o le afioaga o Lotoso’a Saleimoa. 

Ina ua fesiligia e le Fofoga o Samoa le tama mo sona finagalo i le olaga i lenei vaitau, na ia ta’ua mai ai, o lo’o sologa lelei pea le olaga. 

“O lo’o lelei lava mea uma,” o lana fa’aaliga lea. 

“Ua matou masani ai lava i le ituaiga olaga lea e iai i le vaitau lenei. 

“Ia o au o le pulenuu o le matou nu’u. Ma ou te ta’utino atu lava, o le malosi lava o le fa’amatai e mafua ai ona to’afilemu se nu’u. 

“E fa’amoemoe lava fa’aiuga fai ma amioaga a tagata i tulafono ua uma ona fa’ata’atia e savavali ai. O le nu’u a matai latou te faia fa’aiuga o ni mea e tutupu mai totonu o le nu’u ma o i latou foi e fa’atonutonuina amioga a fanau.

“O le ala foi lena e faigofie ai lava le olaga iinei, aua foi e leai lava se isi e fa’atuese i pulega mamalu a alii ma faipule.”

E le gata i lea, ae na ta’ua foi e Faumuina, o le tiute lava o le pulenu’u o le fa’amalosia lea o asiasiga ma’umaga a aiga ta’itasi o le nu’u e fesoasoani i le tausiga o aiga. 

“E faia lava a matou asiasiga i masina uma ina ia fa’amautuina ai o lo’o iai uma ma’umaga e fesoasoani i aiga. 

“Aua e le’o aiga uma e iai ni ma’umaga. E iai tagata e le’o iai ni galuega, o le ma’umaga la e fa’amoemoe iai le tausiga o aiga. 

“E fai foi a matou asiasiga aai. E mafua ona faia lea tulaga ina ia fa’amautuina ai le matagofie ma le mama o le nu’u ma le aai.”

By Ilia L Likou 07 November 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>