E manuia pe a galulue fa’atasi

By Ilia L Likou 07 November 2016, 12:00AM

 “Ia o lenei olaga ua le o toe faigofie ae a na’o le tomumu ma nofonofo ia ua afea loa i mala.” Le tinā i a Fa’ai’u Visesio, 31 le matua o le soifua o Sale’imoa.

Na maua le avanoa e fa’atalatalanoa ai e le Fofoga o Samoa a’o aga’i atu ai  i lona aiga ma lana uilipaelo e tumu i esi pula e fa’amoemoe e fa’atau aua se tupe fa’asili a le aiga.

 “Ia ua le usu le tamā o le aiga i lenei aso i le ma’umaga ona e le’o atoatoa le malosi ma o le mafua’aga lea ua ou sau ai na’o a’u i lenei aso mai la ma’ua ma’umaga.

 “Ia e leai lava nisi o le aiga, ua na’o a’u lava, o lo’u to’alua ma la ma fanau e to’alua.

 “Ia na ou faigaluega muamua i le Yazaki ae na alualu ua ou toe nofo e va’ai la ma fanau ae alu le tamā e taumafai le ma’umaga.

 “Ia sa le faigofie le amataina ai o si o ma’ua aiga, sa tele lava fo’i nai itu na fa’alavelaveaina ai ae na taumafai lava i le malosi ina ia aua ne’i o ma fa’avaivai ai.

 “Ia  e le na’o lo’u to’alua e galue , ou te alu fo’i toto a’u esi lea e pei ona ua fua mai nei.

 “Ia o lo’u iloa i ai i le soifuaga nei pe a fua atu i le tele o le tupe lea e maua i lenei taimi i le fa’atauina o esi , lea na’o le $10 ia o lona uiga o le a matua’i faigata lava le soifuaga o lo’o fa’atali mai i le isi sefulu i le sefulu lima tausaga o lumana’i.

Na ia fa’ailoa o lenei olaga e tumu i lu’itau ese’ese.

 “E ui i le mau fa’afitauli ae le’i fa’avaivaiina ai lava le ola e taumafai o’i ma’ua nei, aua o lea lava e va’ava’ai atu i le Atua o Ia e filemu ma sologa lelei ai so’o se atina’e.

 “Ia o lo ma’ua aiga o lo’o o ma galulue fa’atasi lava ona o lo’u iloa i ai o le ki lava lea o se aiga manuia.

 “E pei e va’ai mai tagata ma fa’apea e le tagolima i le tele o taimi ae o lo’o i ai le lototele  i o ma loto e mafai ai so’o se mea e ala i le tatalo i aso uma.

 “O lea fo’i le fa’amoemoega tele i le fanau i le taimi lenei, ina ia taumafai e a’oa’o lelei i auala e latou te mafaia ai ona atia’e i latou pe a o’o ina matutua.

Na ia ta’ua e leai lava se paga o le fa’ato’aga i itu tau pisinisi.

 “Ia e leai se isi o ma’ua o faigaluega ae o le taimi lenei o lo’o o ma mauaina lava tupe mai fa’ato’aga.

 “O le agaga fa’afetai i le Atua ona o le oa ma le tamaoaiga o lo’o ia aumaia i aso uma.

 “Ia o le taimi nei e le’o tele ni  fuafuaga i le fa’atauina atu o ese ma la’au nei ae o lo’o ave lava le fa’amuamua i aoga a le fanau i a latou a’oa’oga.

 “O si o matou pitonu’u nei, ia o lo’o sologa lelei lava mea uma i le alofa o le Atua, aemaise o le malu o faiganu’u o lo’o o matou i ai nei.

By Ilia L Likou 07 November 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>