O LA’U TALA FO’I

25 May 2016, 12:00AM

1. Matauina i Tala Fou e faapea ua tuuina atu se Tusi Saisai mo se alii sa i le vaega-‘au. O lea la Tusi Saisai e faapea  na poloa’ina e le Afioga i le Faamasino Sili o Patu Tiava’asu’e Falefatu Sapolu. Ua mafua ona fai lea Tusi Saisai ona ua le ‘auai Mualia Salamo i le Faamasinoga ananafi. O lea la alii e faapea sa auai muamua i le vaega-‘au a le Iunaite Setete o Amerika. 

O le tala la e faapea sa teena muamua e lea alii ia tuua’iga e faapea na ia aumaia i totonu o le atunuu fualaau faasaina ma nakoti-faatasi ai ma lona umia o ni ‘auupega e le faatagaina e le Tulafono. 

Ia afai la o loo i fafo lenei alii-na faapefea ona faataga e toe fo’i atu i fafo pe afai na molia i ia soligatulafono? O ai na faatagaina lea alii ina ia tuua le atunuu ae o lea e molia i ni faiga tau solitulafono? 

E faapefea la pe afai e le mafai ona aumai lenei alii e tali i ona moliaga? E mafai ona fai se tulaga faapea i se isi lava tagata o le atunuu? O se mea amiotonu lea mea? O le a sou taofi? 

2. Matauina foi i Tala Fou e faapea e to’atolu ni sui faatutu mo le Faiga-Palota talu ai nei ua faate’a e se nuu! E tusa ai ma Tala Fou-fai mai o le pogai o le faate’aina o ia tamaalii-ona o lo latou le aloa’ia o le finagalo o le nuu ina ia a’uai i se fono a le nuu. O ia la sui faatutu mo le Faiga-Palota-o Sala Iose McCarthy maTuala Iosefo Ponifasio. 

Fai mai sa talosagaina i la’ua ina ia auai i fono na talo e le nuu-ona o le taumafai o le nuu e saili se faiga e toe faa-fealofani ai ia itu. 

O lea na fai ai se fono faanatinati a le afioaga mo tagata uma ina ia ‘auai e aofia ai Sala Iose, Sala Vaimili ma Tuala Iosefo. 

Fai ma la- o soo se fono lava e talo e tamaalii matutua o le nuu- e tatau lava ona aloa’ia ma faaaloalogia e tagata uma-ae ua latou teena le finagalo o le nuu. O le mau la a Tuala Iosefo o loo taumafai le nuu e toe faalelei itu o loo auai! Ia o se tala umi lenei tala-ae afai ua amata ona manunu faavae o nuu-“e pogai uma nei faafitauli-ona ua faoa le pule mamalu a nuu ma itumalo- e filifili ai e i latou o latou lava sui faatutu e pei o le mea masani-ae ua pule ai polokiki leaga a vaega faa-upufai! O le a sou taofi? 

Matauina foi i Tala Fou fai mai o lea ua tulai i luma o le Faamasinoga le pagota lea e sola so’o i tua o Filipo Pesamino! Fai mai Tala Fou-o pagota e to’alua ia na molia i le fasi o se alii Saina faipisinisi o Kuan Hui San-ua toe foi atu i le Faamasinoga. Fai mai o Lauitiiti Tualima ma Filipo Pesamino-ua toe avatu i luma o le Faamasino Sili-o Patu Tiavaasu’e Falefatu Sapolu. O ia pagota e to’alua ua molia faatasi i le taumafai e fasi faamo’amo’a-ma faao’o ni manu’a matuia i se tagata-faatasi ai ma le talepe o le fale ma ulufale i totonu. 

Na teena e Tualima le moliaga tau le solitulafono o le taumafai e fasioti se tagata-ae na ioe i lona faao’o o ni manu’a matuia i se tagata.Na teena foi e Pesamino le moliaga o le fasioti tagata-ae na ioe i le moliaga o le talepe fale ma le gaoi…!  Ia-afai la o nei pagota ua matua fai ma o la vaisu le sosola soo i tua-o le a le pogai o le le faaaogaina o ni filifili e saisai ai-pe afai ua fai ma o la vaisu le sosola soo i fafo? Faamata e le o lava ma totoe le sosola so’o i fafo o nei pagota ma talepe fale o tagata-gaoi ma fasi tagata-ma faailoga maumautu e faamaonia ai i le malo-le matua leaga o le pulea o le Falepuipui? 

Afai o nei pagota ua fai ma o latou vaisu le sosola so’o i fafo-o le fesili-O LE A LE POGAI? Afai nei la e toe sosola i tua ia pagota ma faaauau pea a la faiga masani-ae fasioti mai ai e nisi –o ai e tatau ona tuua’ia? O le a sou taofi?

25 May 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>