Tautuanā le fanau
O lea le vala’au o le tinā i a Luaiva Misikupa i le atunu’u ina ia se’i toe silasila i le saogalemu o fanau teinei i le taimi lenei.
I le fa’atalatalanoaga ai ma le Fofoga o Samoa na ia fa’ailoa ai le tulaga mana’omia tele o le mafai ai lea ona tutū fa’atasi mo lea tulaga ina ia mafai ona fo’ia ai le mau fa’afitauli o lo’o ua i ai nei.
“Ua le’o toe po se lilo i le tele o le mau tulaga le manaia se fa’alogo ua alia’e mai totonu o aiga i mafutaga a matua ma fanau.”
“Ua mafua lea tulaga ona ua le mafai ai lava lea ona soalaupule lelei fa’afitauli aemaise o le fa’atamala lava o tinā i o latou tiute tauave.”
“O tinā lava ia o la latou lea tiute o le va’aia o fanau aemaise lava i fanau teine.”
Na ia fa’ailoa o lea lava le tulaga na sa’u ai Samoa i aso ua alu.
“E ola ane le tama teine ua uma ona a’oa’o lelei i le tu, savali ma le tautala, a alu i le fale o isi tagata ia sulu lelei le ie.”
“A o’o ina matua, ia iloa ona fai lelei lavalava e atagia ai le teine Samoa na ola mai totonu o aiga, ma o lo’o iloa o so’o se tulaga.”
O lona finagalo o totonu lava o aiga e amata mai ai fanau.
“Ia ua tu’u le sasa o fanau i aoga, ma o lea lava la ua tatou va’ava’ai ai le mata’utia o le tulaga ua o’o ai nei fanau.”
“A le usita’i atu a i matua e o atu i potuaoga o le mea lava lena e fai, ae manatua o le faiaoga e a’oa’o tamaiti i le poto salalau, ae o matua lava ma le aiga o la latou galuega lea e fai mai le laititi o le tamaititi se’ia o’o lava ina matua.”
“Ua o tatou iloa uma lava o fanau o le tofi mai le Atua, ma e ao lava ona o tatou malolosi ma ia tausi lelei i ai.”
“Aua a o’o ina matutua ia e le toe tau tigaina e fa’asino ma fa’atonu...ia aua ne’i ave’esea o tatou tiute ae ia tatou apoapo i ai.”