E ui o le faigata ma fa’afitauli o le soifuaga, ae  na fa’ailoa e le tamā i a Paul Asau o Faleula ma Faleasi’u - o so’o se aiga lava e nonofo fa’atasi  o lo’o i ai ma le fiafia.

I le fa’atalatalanoaga ma le Fofoga o Samoa i le aso ananafi na ia ta’utino ai o le lau’ele’ele ma le sami o lo’o ua fesoasoani tele mo lo latou aiga i le taimi lenei.

 “Ia o a’u na ou fagota mai lava  i le 18 ai o o’u tausaga,” o lana tala mai lea.  

“E pei e pau lava le o le auala na mafai ona fesoasoani ai i si o matou aiga i aso uma aemaise ai lava le tausiga.

 “Ia e mo le silafia ai e pei e maua lava tupe ae le taitai ona a’ua’u le fa’asoa mai le tele o vaega e mana’omia i totonu o si o matou aiga.

 “O lo’o ua tatou i ai i nei vaitau i le taugata o le soifuaga, ma ua alu i luga le tele o tau o oloa o lo’o mana’omia ia ma avea ai lava ma avega mamafa i le taimi lenei.

“E pei o fa’afitauli nei o lo’o ua tatou i ai le taimi lenei.

Na ia ta’ua o nei vaitau e le’o toe faigofie mea uma ma ua tele mai ai ma le mau fa’afitauli o lo’o ua i ai nei.

 “E pei ona fa’ailo atu le taimi ua alu, e pei o le sami lava o lo’o fa’alagolago ai le tele o taimi ae pei o le tau lava o lo’o fai ma fa’afitauli i le tele o taimi.

 “Ia e ta’utino atu lava le faigata o lo’o ua feagai ma si o matou aiga i le tele o taimi, ia ae taumafai lava e galue, ia o nisi o taimi ua sau fo’i le le fia auai ae taumafai lava.  “Ia o nei vaitau, ua tele lava vaega  o lo’o ua fai ma avega, ma e leai lava nisi o le atunu’u e le’o o’o ai lea tulaga.  “Ia o lea fa’atoa taunu’u i le fale mai le sami, ia o le taimi lenei o le a sauna atu mo le ma’umaga aua le umu o le Aso Sa.  “Ia na’o a’u lava ona e ausage lava si o matou aiga.

E ui i fa’afitauli ae na ia ta’ua o le galulue lava.

“Ia ua tele lava nai aiga o lo’o mana’omia le fesoasoani lenei taimi, aemaise tupe mo le atina’eina o aiga.

 “Ia o le taumafai lava.

E mafai ona feso’ota’i Paul Asau i le  7269239.