Faia mea uma mo le manuia o aiga

By Deidre Fanene 07 February 2017, 12:00AM

O Leitu To’ala o se taule’ale’a e 25 tausaga mai le alalafaga o Faga i Savaii. 

O se taule’ale’a galue malosi ma le fa’amaoni i lana taleni ua tu’uina mai i le Atua. 

Na ta’ua e Leitu, o lona fa’anaunauta’iga, o lona galue malosi lea ina ia maua se fesoasoani mo lona aiga i Savai’i. 

“O a’u, ou te sau mai Savai’i,” o le fa’aaliga lea a Leitu. 

“E pei ona silafia, ua faigata lava nei aso ona tau saili ni auala e maua ai ni tupe ma faigaluega ai tagata. 

“Ma o la’u taleni o lo’o faia nei, o le elei-ina lea o lavalava ma fa’atau atu e maua ai se seleni e fesoasoani lea i le tausiga o le aiga.”

Na ia fa’ailoa mai i le Fofoga o Samoa, e ui ina faigata le tu’ua ai o lona aiga ae aumau ai i Upolu nei, e le’o avea lava lea ma ala e taofia ai lona ola finau. 

“E fai lava si faigata o le galuega lea oute faia, ae ao lava ina fai ona ou te iloa olo’o maua mai ai le fesoasoani mo lo’u aiga. 

“E ui foi lava ina itiiti le tupe ma se mea ua ou maua, e malamalama lava si ou aiga, aua e le’o faigofie nei aso.

“E ta’u sa’o atu lava, ua lima nei tausaga talu ona ou fa’atinoina lenei auaunaga. 

“E ui foi lava ina laititi le seleni e maua, ae o lo’o iai sina fesoasoani mo lo’u aiga e fai ai mea o lo’o fai i totonu o le aiga. 

“O nisi aso, ou te alu ai i le fa’ai’uga o le vaiaso, ma ou nofo ai i Savai’i. Ona toe usu mai ai foi lea i le va’ausu o le aso Gafua.”

Na ta’ua e Leitu, a maua lava lana mea mama i le vaiaso e tusa lava ma le $200 tala le tupe e maua.

“O le tupe lena ou te mauaina ina ua uma ai ona fa’atau isi ie e vali mo le isi aso. O le tupe foi lena e maua ina ua uma ona ave se tupe i si ou aiga i Savaii. 

“E manaia lava le tupe e maua mai, na pau lava le mea o lou poto lea e fa’asoasoa lelei le fa’aaogaina o le tupe lea.”

Ae peita’i na ta’ua foi e Leitu, e iai foi fa’afitauli e feagai ai pea lava ma ia.

“O le isi fa’afitauli tele lava, o le taumafai ai lea e fa’atauina atu ie ina ia maua ai se seleni. 

“Aua po’o le a lava le manaia i fea o ata ie e fa’atau, e pule lava le tagata fa’atau pe fa’atau sana ie pe leai.

“O le auala la e masani ona ou faia, o le fa’atosina mai lea o tagata e ala i ata upu malie ma le malu ina ia fa’aosofia ai lo latou agaga o le fia fa’atau. 

“A lelei lava ona e tago e fa’alauiloa atu ai mamanu ma au ie, o le tele foi lena o tagata e fa’atauina.”

By Deidre Fanene 07 February 2017, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>