Pulenu’u Agalelei

By Fa’aliliu e Maiava 28 April 2016, 12:00AM

Toe mafaufau tasi lava…O le Ali’i o Fiorello Le Guardia sa avea ma pulenu’u o le A’ai o Niu Ioka i le taimi faigata o le Taua Lona Lua a le Lalolagi. Sa alofagia tele ma fa’aaloalogia o ia e tagata Niu Ioka.

O le pulenu’u lea, o se tagata loto-alofa tele, o se tagata fiafia ma sogasoga. E masani ona alu i loli a le ‘Au-Tinei-mu i le taulaga, ma ‘ave tamaiti o lo’o tausi i nofoaga mo tamaiti ua leai ni matua, i  ta’aloga pesipolo. Ina ua alu le solo-tete’e a le ‘Aufai-Nusipepa, e nofo faitau i luga o le leitio, tala-komi mo tamaiti i Aso Sa ta’itasi.    

I le tasi po-malulu ia Ianuari 1935, na alu ai le Pulenu’u o La Guardia i le fa’amasinoga na faia i le po i se nofoaga matitiva i le A’ai o Niu Ioka. Sa ia vave fa’amalolo le fa’amasino i le po lea, ae tau’ave e ia le galuega fa’aFa’amasino.

O le po lea na avatu ai i luma o le fa’amasinoga se tina-matua, na molia i lona gaoia o se falaoa-vela. Na fa’ailoa e le tina lea ia La Guardia, o ia e to’alua lana fanau (o fanau a lana fanau) o lo’o tausi, sa matua fia-a’ai lava peita’i, e leai sana tupe na iai, nofo loa gaoia le falaoa lea e tasi.

O le mea na tupu, na matua musu mai-o le fa’atauoloa e fa’amagalo moliaga o le ‘olomatua lea. Fai mai a ia: “Lau Afioga a le Fa’amasino, e tatau lava ona fa’asala le tina lea, e fai ai fo’i se a’oa’oga-lelei mo isi tagata o lo’o fa’alogologo. A leai, e ono fa’apea ai e le-leaga le gaoi.”  

Na liliu atu le Fa’amasino i le tina-matua lea ma fa’apea atu:

“’Ou te iloa na e faia lenei mea ona o fanau a lau fanau, ae le-mafai ai lava ona e solia o le tulafono, ua e gaoi. O lou fa’asalaga, e $10.00.” A’o saunoa atu le fa’amasino e fa’ailoa lona fa’asalaga, na a’apa ifo i lana taga ma fa’apea atu i le tina lea,

“O le a ‘ou totogia lau sala ona ‘ou te iloa, e le-mafai ona e totogia. Ua e sa’oloto nei e tu’ua le Fa’amasinoga.” Tatou te iloa uma le agaga-fa’afetai na o’o i le ‘olomatua lea ona o le agalelei ua na maua, e ui o lea lava na faia le mea amiotonu ma le fa’asalaga tatau. Toe mafaufau tasi lava…                                                         

By Fa’aliliu e Maiava 28 April 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>