O LA’U TALA FO’I

09 March 2016, 12:00AM

1. Matauina i Tala Fou se faaletonu tau Faiga-Palota i le Itumalo o Faasaleleaga Nu.1 e tusa ai ma le faaupuga sa’o o le ulua’i faitauga-ma o lea la faasa’oga ua tulai mai ai Pauli Ivan Williams. E ui lava la ina leai se mea e sa’o atoatoa- ae atonu e fetaui lena faaupuga ma isi lava mataupu laiti! Ae a pa’ia loa mataupu e aafia ai le atunuu atoa- e le tatau la ona toe tulai mai ni mea sese, se’ia vagana ai ua mana’omia le faia o ni mea sese!

Afai la o le Palota e aafia ai le atunuu atoa-ailoga e tatau ona tulai mai ni mea sese faapenei? E mafai ona fesili atu pe na faapefea ona faitau ae o ai na faitauina! Afai e aliali mai ni mea sese faatauvaa faapenei- o lona uiga- e le’i lava ona tapena lelei le aufaigaluega ma le Ofisa o Faiga Palota mo lea faamoemoe. Ae ui o lea-o le mea sili lava ua tini ma taunuu ma le manuia le faamoemoe o Samoa! O le a sou taofi? 

2. Matauina foi i Tala Fou se ulutala fai mai o le “matua i tausaga-ua na o se numera lava.” O lea la faaupuga e faasino i se tasi o laui’a o le Palemene i aso ua leva-le Fetalaiga a Faaso’otauloa Taulapapa Pati-ma o se tasi foi o Minisita o loo manatua pea talu ai lona fesoasoani tele i le toatele o tagata o le atunuu i lona taimi-i le itu tau fanua ma meatotino. Afai la o le Fetalaiga ia Faasootauloa o se tasi lea o tama matutua i aso ua alu-o lona uiga- e le mafai lava ona oge i sao aoga mo le atunuu ma lona manuia! Ia alo ane ia Faasootauloa i ou faiva –manaia ma ia lele malie lau Ti’a mo se manuia o Samoa! O le a sou taofi? 

3. Matauina foi i Tala Fou nisi o faipule tamaitai ua tulai mai mo lenei lima tausaga! Ia- afai la e moni upu a le ‘au-matutua fai mai e uiga ese lava le alofa o le teine i lona aiga ma ona tagata-ia talosia ia faapena o tatou sui faipule tamaitai ia ua tulai mai! Aisea? Leaga foi o le aganuu ma le faa-Samoa o le mea lava e finagalo ai le Tama Sa-o le mea lena e fai! Aisea? Leaga latou te iloa lelei mea ta’itasi uma e manaomia e aiga uma o Samoa! Latou te malamalama i mana’oga faa-Tina; latou te mafai ona teuteu faaletonu i totonu o aiga-ma o le upu lava a le atunuu-“E au le faamalaia a le Tama Fafine! O lea e momoli atu ai o matou moomooga lelei ma alofaga-ina ia manuia outou faiva mo le atunuu atoa! O le a sou taofi? 

Matauina foi i Tala Fou se ulutala fai mai-“Ua sauni Palusalue Faapo II-le Taitai o le Tautua Samoa Party- e faailoa mai mea uma lava i le asŏ- e uiga i le Faiga-Palota Lautele na se’i mavae atu nei. Talu mai le faato’ilaloina o ia e le H.R.P.P.i le Faiga-Palota Lautele talu ai nei-ua le o toe fia talanoa o ia ma nusipepa.

Ina ua fesootai atu ia te ia le Samoa Observer i le Aso To’ana’i-fai mai a ia e le o sauni mo ni talanoaga. Peitai- o ananafi na ia faaalia ai o le a fai sana upu i le atunuu- pe a faatino le feiloaiga a le Tautua Samoa Party i Matautu.  O le Vaega Faa-Upufai a Palusalue e le gata ina faia’ina i le faiga-palota i se aofa’iga itiiti-ae ua na le toe maua foi le nofoa o Safata lea na ia umia mo le 15 tausaga talu ai. Ae ui o lea- ua faamaonia o loo i ai lava isi sui faipule fou o le a auai i le Tautua Samoa Party! O le a sou taofi? 

09 March 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>