Fa’afetaia e le Faipule-tama’ita’i o Fiti, tagata Samoa
Sa matua talisapaia ma le agaga fiafia e tagata-nu’u o Fiti, le agalelei na fa’aalia e tagata Samoa.
O le alaga-fiafia lea na fa’aalia e Ro Teimumu Vuikaba Kepa, o se Sui Faipule mai le Palemene a Fiti o lo’o i Samoa nei, mo le Fono Lona 4 a Sui-Tama’ita’i o Palemene a le Pasefika o lo’o fa’agasolo i lenei vaiaso.
I se talanoaga ma sui o le Samoa Observer, na fa’aalia ai e Kepa, o le Ta’ita’i o le Itu Agai o le Malo o Fiti, o lo’o fa’ananau lava tagata o lona atunu’u e momoli mai le fa’afetai ia Samoa, ona o mea-alofa ‘ese’ese uma sa ‘auaina atu mo latou, talu le fa’atama’ia ai o lo latou atunu’u e le Afa o Uinisitone.
Na ta’ua, sa fa’atama’ia lo latou atunu’u e le Uinisitone ma ina ua mo’omia e tagata-Fiti se fesoasoani, o Samoa le isi atunu’u na muamua lava tu’u-tu’u atu o latou a’ao lavea’i.
“Na afaina Fiti i le Afa o Uinisitone - le afa aupito malosi i tala-fa’asolopito ua lavea fa’afuase’i ai matou, ae maise ai le tulaga malosi na o’o iai, le Vaega 5 o afa,” o lana fa’aaliga lea.
“Leai se isi na mafaufauina se mea fa’apea ina ua a’afia matou i le afa.
“O le mea moni lava, e to’aititi lava tagata e malamalama i le malosi lea, le vaega lona 5 o afa, ae na matua tete’i tagata uma ina ua malosi mai le matagi. E ‘ese le ‘auala na valo’ia e ala mai ai le matagi, nai lo le mea lea na ui mulimuli mai ai.”
I lana saunoaga, na ta’ua ai e Kepa, e le’i nofo-sauni le atunu’u i se a’afiaga malosi fa’aleNatura fa’apea ma o le lagolago mai o atunu’u ‘ese’ese, sa fesoasoani malosi tele mo latou i taimi faigata.
“O le mea na matou iloa mulimuli ane, e matua le-gafatia lava e le malo o Fiti ma ona tagata ona feagai ma le malosi o le Afa ma e fa’afetai tele ai lava, i malo ‘ese’ese uma, e aofia ai ma le malo o Samoa, sa lavea’i mai ma fesoasoani tele mo matou,” o lana saunoaga lea.
“Na vave lava ona taunu’u atu i Fiti, fesoasoani mai Niu Sila ma Ausetalia ae na matou iloa lava fesoasoani e maua mai ai atunu’u ia e lua peita’i, o atunu’u tua’oi fa’aPasefika e pei o Samoa, sa gafatia lava ‘auala e ‘auina atu ai a latou fesoasoani, ui e ‘uti’uti fo’i o latou puna’oa ma le tamaoaiga.”
Na momoli fo’i le fa’afetai a le Tama’ita’i Faipule, ona o taumafaiga a tagata Samoa e fai sa’iliga-seleni aua lava latou i Fiti.
“E ‘ese ai la mai le Malo, ae fai a’u ma fofoga o le matou atunu’u atoa, e momoli atu le fa’afetai tele, i fa’alapotopotoga ‘ese’ese sa sa’ili-fesoasoani ma agalelei atu, e ala i mea-alofa tupe, o taumafa, lavalava ma isi mea-taugata sa outou a’ao iai,” o lana fa’aaliga lea.
“E tutusa-pau lava Fiti ma Samoa, o atunuu e matitiva, ma e tausia fo’i ma va’aia lelei o outou tagata peita’i, o lea lava ua ‘outou fa’asoa atu a tou ‘oa ma le malosi mo matou, ua na o le fa’afetai tele ai ona o le agalelei tele o tagata Samoa.”