Fa’atau popo aua le su’eina o se vai
A fa’apea ua e maua mea uma, ia e maua le agaga fa’afetai.
Aua o lo’o iai pea tagata o lo’o latou mafatia i le su’eina o lesi oa taua na o le olaga.
O le fa’atalatalanoaga a le Fofoga o Samoa, sa ta’ua ai e Umili Faitala lona le mana’o e ola i se olaga e leai se suavai maua.
E 59 le matua o lona soifua ae o lo’o taumafai pea o ia, e fa’amalosi e alu i le ma’umaga aua le su’eina o meamata e fa’atau atu mo se seleni.
“E iai ala paipa i luma o le matou fale ae e le mafai ona toso atu ai ma se vai aua e tatau ona totogi le $200 ona fa’ato’a mafai la ia, o le mafua’aga lea o lo’o taumafai atu ai ia popo,” o lana tala lea.
“E faigata lava ona sefe le tupe aua e tele lava mea e mana’omia ai.
“ E laitiiti fo’i se tupe maua aua ua to’atele tagata ia e fa’atau meamata i totonu o le tatou atunu’u.
O Umili e nonofo fa’atasi ma se tasi o ona tei ma e le iai uma ni a la’ua galuega.
“O ma vai a la sa maua mai le timu i le vaiaso ua te’a lae tau fa’asoasoa, pei o le tele a na o taimi, o ma vai e maua mai le timu.
“A fa’apea ua le iai a se vai ona fa’ato’a fai le i isi tua’oi ae faigata lava lena itu i le tele o taimi aua e totogi fo’i vai a na aiga.
“Talosia ia maua se vai i se taimi lata mai aua tatou uma lava e mana’omia le suavai.”