E i ai lava popolega
E galo tigā pe a tali mai fanau.
O lea le saunoaga a le tamā i a Eti Heather o Lepuia’i Manono i le fa’atalatalanoaga ma le Fofoga o Samoa i le aso ananafi.
Na ia fa’ailoa o le tele o le mau galuega fa’atino o lenei tausaga aua lava le una’ia o fanau i aoga o se itu fa’afiafiaina ua i’u ma le manuia taumafaiga a le fanau.
“Ia o le itu mautinoa lava o le tausiga lava ia a le Atua i le tagata e selaupasene ae o tatou lava e afua ai ona o tatou tigaina.
Na ia ta’ua o se itu popole tele ai lenei taimi ona o le taugata o le tau o le soifuaga ua i ai nei Samoa ma o se itu ua matua’i faigata lava.
“O lo’u ia iloa i ai le taimi lenei, o le tau o le soifuaga o se itu fa’apopoleina tele lea i a te a’u ia i le taimi lenei.
“Ua o tatou va’ai ai le tele o le mau mea ua alia’e mai ona ua le gafatia e nai o tatou tagata le soifuaga.
E fiu lava fo’i e taumafai le atina’eina o aiga, ae pei e matele lava nai o tatou tagata i le taugata o le tulaga ua i ai nei Samoa.
Na ia ta’ua o se itu e ao lava ona silasila i ai le malo i le taimi lenei.
“O se itu e ao lava ona toe va’ava’ai i ai, ua tele nai o tatou tagata ua le gafatia le tau o le soifuaga.
O le isi itu na ia ta’ua o le maualuga lea o tau o oloa ae ua maualalo totogi maua a le to’atele.
“E pei o le itu pito sili lea ona faigata lea ua i ai nei Samoa, ma o se itu e ao lava ona o tatou va’ava’ai i ai aua le aga’i atu ai le lumana’i.
“Talosia ia ia alu alu maua sina fa’amama avega i le tele o nai o tatou tagata.