Valo’ia le magoto o Lonetona ma Niu Ioka

By Ilia L Likou 24 March 2016, 12:00AM

O le maoa’e o suiga o le tau o lo’o ua vavalo ai le tele o nisi o saienitisi i le tulaga e pei ona fa’ailoa atu i luga ma e le’o toe mamao lea tulaga.

Fai mai la latou mau o le a le toe mamao ona va’aia lea o tulaga nei ma o le va’aia ma le si’isi’i o le suasami i le ova atu i le 50 fa’asolo atu le 150 i le tausaga.

O le mafanafana o le tau e pei ona i ai i tausaga e 120,000 talu ai o le a o’o i se tulaga fa’aletonu tele e pei ona ua i ai nei.

E le fou nei valoaga e pei ona fa’ailoa mai pea e le gata i atunu’u tetele nei ae o le Pasefika e pei ona lau silafia ai.

O se mataupu fo’i o lo’o laualuga i talanoaga ma saunoaga o le tele o nisi o ta’ita’i o malo, Ekalesia ma totonu o atunu’u ta’itasi.

O le tausaga ua mavae sa tu’uina  mai ai e le Tama Pa’ia, se fe’au fa’a’umi’umi mo le 1.2 piliona o tagata Katoliko o le lalolagi, ae le gata i lea o sana saunoaga i le Fono Tele a Malo ‘Aufa’atasi ma vala’auina se fono a Ekalesia ‘autu uma i le lalolagi, e uiga lava i Fesuia’iga o le Tau. 

E pei ona fa’ailoa muamua atu ai i ripoti na ta’ua e le Fa’auluuluga o A’oa’oga Fa’aSaienisi a le Vatikana, o Epikopo Marcelo Sorondo e fa’apea, o le mafuaga o ia fa’atinoga, ona o le mana’o o le Pope ina ia una’ia le fono a Malo ‘Aufa’atasi i Paris i le tausaga fou, lea o le a taumafai ai atunu’u e fa’amautu talanoaga (ua 20 tausaga o lē fa’atinoa) mo le fa’aitiitia o le gaosia o kasa e afaina ai le lalolagi atoa. 

 “E lagolagoina e a matou tagata popoto le tofa a le Tama Pa’ia, lea o le a taumafai ai mo se fa’ai’uga ogaoga i le tausaga a sau,” o le fa’aaliga lea a Sorondo i le Cafod, le Vaega mo Atina’e a le Katoliko, i se  fonotaga i Lonetona. 

“O le mafaufauga lava lea, ia faia o se fono ma ta’ita’i o ekalesia autu ma fa’ailoa ai i tagata uma le tulaga o lo’o iai le tau ae maise a’afiaga o le soifua.”

Ina ua mae’a lana asiasiga i Tacloban ia Mati, le a’ai o Filipaina na fa’aleagaina e le typhoon o Haiyan i le 2012, na fa’alauiloa ai e le Pope se tusi e seasea fa’atinoa, e uiga i suiga o le tau ma le soifua fa’aleTagata.

O lea tusi o lo talosagaina ai Katoliko uma ina ia faia fa’atinoga ma ‘auala fa’aSaienitisi, ma o le a tu’uina atu lea tusi i le 5,000 Epikopo i le lalolagi ma le silia i le 400,000 patele, mo le tufatufaina atu i sui uma o le Ekalesia. 

I le tausaga ua mavae atu, na finau atu ai fo’i le Pope mo se faiga talafeagai fou o tulaga tauTupe ma Vaega o le Atina’eina o le Tamaoa’iga, ina ia tutusa ai tagata uma ma le fa’aleagaina o tulaga masani.

I le masina o Oketopa, na saunoa ai i se fonotaga a e ua leai ni nofoaga e nonofo ai i Amerika i Saute ma Asia mo isi mana’oga: “O Atina’e e fa’amoemoe i le atua o tupe, e tatau ona fa’a’autū i le natura o mea, ina ia o gatasi lona fa’aaogaina, ma le tulaga manuia sa iai.   

 “O lo’o fa’apena lava ona le suia, talu ai, o lo’o ‘autu i fa’atinoga o se tamaoaiga ma tulaga tauTupe e leai ni ta’iala. Ua le toe fa’alagolago i fa’atinoga a tagata, a’o tupe. Ua pulea e le tupe.

“O le fa’alagolago tasi i le fa’aaogaina o ‘ele’ele, le fa’alaloina o la’au, fesuisuia’iga o le suavai mau, le so’ona fa’aaogaina o vaila’au o’ona e fa’ato’aga, o nisi ia o fa’afitauli ogaoga o lo’o fa’aleagaina ai tagata mai ‘ele’ele na fananau ai.

O suiga o le tau, o le fa’aitiitia o ola ‘ese’ese o i le si’osi’omaga ma le fa’alaloina o la’au, lea ua va’aia ai nei ona a’afiaga mata’utia pei ona molimauina,” o lana saunoaga lea. 

Sa fa’aalia ai atugaluga o Epikopo mai konetineta ‘ese’ese, ona o talanoaga o tulaga o le tau ma talosagaina ai, mo le ulua’i taimi, atunu’u tamaoaiga, ina ia fa’atinoina loa se galuega. Na ta’ua e Sorondo, o se tasi mai Argentina ua iloa e latalata tele ia Pope Faranisisi:

“Pei o aso sa finau atu ai le lalolagi i suiga ogaoga sa iai i le Seneturi 19, o le asō, ua tele lo tatou suia o le si’osi’omaga. A fa’aauau ai i le tulaga o iai nei, o le a molimauina i lenei seneturi se suiga tele o le tau ma le fa’aleagaina o le si’osi’omaga, e matua mata’utia.”  

Na ta’ua e Neil Thorns, o le Fa’auluuluga o le Vaega o Atina’e a le Katoliko, le Cafod: “O le fa’anaunauga o Pope Faranisisi i lana tusi ua ta’ua, e le ma-iloa. A ua matou va’aia le afe ma afe o e lagolago, ua ta’utino ia fa’amalamalama i a latou faipule tulaga o le fesuia’iga o le tau, ma le afaina e o’o iai atunu’u matitiva.

” Peita’i, o  le pulunaunauina e le Pope o lea mau, e mautinoa, o le a fa’aalia iai se tete’e mai isi Ekalesia ae maise ai le Iunaite Setete o Amerika – e aofia ai e tete’e pei o John Boehner, le Ta’ita’i o le Vaega a le Republican i le Maota o Sui ma Rich Santorum, le sui o lea Vaega sa finau fo’i mo le tofi Peresetene.

By Ilia L Likou 24 March 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>