Mo aso nei ma le lumana’i
O le fa’atalatalanoaga a le Fofoga o Samoa ma Fa’aloloa Va’a Ah-Soon sa ia ta’ua o ia o se tagata galue malosi.
E 44 le matua o lona soifua ma o ia o se tāma i se fanau e to’atolu, faifa’ato’aga ma o ia fo’i o se fai pisinisi.
“O le tele o aso ou te galue ai i lo’u ma’umaga,” o lana tala mai lea. “Ou te galue a a’u ia i aso uma i le ma’umaga ae o le tina o le aiga e gafa i le va’aiga o le fanau fa’apea fo’i le mā’ua faleoloa.”
“E lelei a le fai o le fa’ato’aga aua e tau fa’apaleni atu ai aitalafu ia e fai mai le faleoloa i isi taimi.”
Na maua le fa’atalatalanoaga a Fa’aloloa a’o aga’i atu e aumai se meaai a le aiga mai le ma’umaga.
“O aso la a ia ta te galue ai ae a o’o fo’i aso timu ona malolo lea ae o aso uma lava e fa’aaoga i le fa’ato’aga.”
“Aua a e le galue, ia e leai foi sau mea e maua ma e fia aai solo le aiga. E le gata foi lena ae ola ifo foi le fanau e le iloa ola galulue.”
“O a’u a ia e sili atu ai le ola galue fa’apea aua e faigofie, ae e toe sili atu foi ia au le faigaluega iinei nai lo le faigaluega i isi pisinisi.”
“E pei o nai meamata a ia lea e maua ai se seleni aua le tausiga o le aiga ma o se atina’e fo’i o lo’o lelei mo le matou aiga.”
“E mo’i a e i ai tagata e fa’apalapala i le fa’ato’aga ae e tele lava le aoga o le fa’ato’aga mo tagata uma o Samoa.”