Fa’asa’o le sese, e malo Pauli

08 March 2016, 12:00AM

Ripotia e Sarafina Sanerivi

Fa’aliliu e Maiava

 

Ua iai nei se faipule fou mo le Itumalo o Fa’asaleleaga Numera 1, e tusa o ulua’i  faitauga o i’uga o palota. O ia lea o Pauli Ivan Williams.

E ‘ese ai mai fa’ai’uga na fa’ailoa i le taeao o le Aso To’ona’i o le ulua’i faitauga le-aloa’ia o Faiga Palota Aoao, o ananafi lava na toe tu’uina mai ai le fa’asa’oga e le Komesina o Faiga Palota Aoao. 

O le fa’ai’uga na ripotia mai i le po o le Aso Faraile, na fa’aalia ai e manumalo Sili Epa Tuioti i palota e 475, e fa palota e sili ai i palota e 471 a Pauli.

A’o lea ua fa’amanino mai e le Sui Komesina o Faiga Palota, Faimalomatumua Mathew Lemisio, o le faitauga sa’o sa tatau ona iai, e 503 palota a Pauli ae 483 palota a Sili ae o lo’o fa’atalia pea le aofa’i o palota-fa’apitoa.

E le na o le Itumalo o Fa’asaleleaga Numera 1 na iai lea fa’aletonu. Ua toe suia fo’i fa’ai’uga o palota mo Faleata i Sisifo. O fa’ai’uga na fa’ailoa muamua, mo Lealailepule Rimoni Aiafi e 857, o ‘Ale Vena e 853, ‘Ulu Bismark Crawley e 836 ma Panoa Moala Tavita e 441. 

A’o fa’ai’uga le-tumau fou ua iai nei, ua fa’aailoa ai le mamao o le manumalo o Lealailepule i palota e 963, pito iai ‘Ulu e 886, ‘Ale e 853 ma Moala e 308 palota na maua. 

 “Ua sasi le matou va’ai i palota a itumalo ia e lua,” o le fa’amalulu mai lea a Faimalo, e ala mai i le Samoa Observer ananafi.

“Mo Faleata i Sisifo, ua fela’ua’i e le Ofisa Faipalota na lauina fa’ai’uga,  palota a sui-fa’atutu ia e to’alua.

“ Ae talu ai e le-mafai ona matou toe tatala pusa-palota ia, na matou toe siakia ai fa’amaumauga aloa’ia o faitauga le-tumau muamua o fale-palota uma ma fa’amautuina ai, ua fela’uai i’uga o palota.” 

Ua mae’a nei la ona toe fa’asa’o e le Ofisa o Faiga Palota ia fa’ai’uga i luga o upega-tafa’iLagi.

Na ta’ua e Faimalo, o le fesasia’i i le palota a Fa’asaleleaga Numera 1 i Sasa’e, o se fa’aletonu fo’i fa’apena.

“O le taimi lava na matou iloa ai le sasi lea i le taeao o le Aso To’ona’i, na faia ai loa suiga talafeagai,” o lana fa’aaliga lea.

O lona uiga, ua avea nei Pauli ma sui fou o Fa’asaleleaga Numera 1 mo le Palemene, a’o talia pea e le atunu’u fa’ai’uga aloa’ia mulimuli. 

E le’i manuia taumafaiga a lau nusipepa i ni feiloa’iga ma Sili po’o Pauli i le aso ananafi. E le’i ‘auai i la’ua uma i le Maota o Petesa a le HRPP, ina ua o’o atu iai sui o le Samoa Observer.  

O le po na faitau ai palota, na tupu ai fo’i se fa’aletonu fa’apea i palota a le Itumalo o Falelatai ma Samatau, e ui sa vave lava ona toe fa’asa’o.

Na ta’ua e Faimalo ananafi, ua amata nei ona fa’atino e lo latou Ofisa, le faitauga o palota-fa’apitoa na aoina mai Upolu ma Savai’i. 

“E 6,765 le aofa’i o palota-fa’apitoa na faia i le Aso Faraile,” o le fa’aaliga lea a Faimalo.

“O se numera e matua tele tele,  ua fa’ailoa mai ai le to’atele o le atunu’u sa fa’aaogaina fale-palota fa’apitoa i itu ‘ese’ese o Samoa, nai lo le tau malaga mamao mai i le taulaga e fa’atino a latou palota. Atonu e ono fa’aluaina ai fo’i le u’umi o laina if ale-palota i le taulaga.” 

E vaiaso atoa e fa’atinoina ai le faitauga-aloa’ia o palota.

O lo’o naunau le Ofisa o le Komesina o Faiga Palota, e fa’alauiloa i’uga o faitauga-alo’ia o palota i le Aso Gafua, ia fetaui ma le ulua’i fonotaga a le  Palemene lea ua fuafua mo le Aso Lua, 15 o Mati, 2016. 

O le taimi lava e fa’amaonia aloa’ia ai i’uga o faiga-palota, o le a fa’ase’e atu ai loa i Lana Afioga a le Ao Mamalu o le Malo, Tui Atua Tupua Tamasese ‘Efi, e fa’amaonia ma fa’alauiloa fa’alaua’itele ai loa i le atunu’u. 

08 March 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>