E le afaina le matua o tausaga…
Ripotia e Lanuola Tusani Tupufia
Fa’aliliu e Maiava
A aulia loa le 80 tausaga o le soifua o se tasi, ona manatu lea o le to’atele, ua o’o i le taimi ua tatau ai ona ritaea ma malolo lelei.
Peita’i mo Fa’aso’otauloa Taulapapa Pati, o le toe fo’i mai i le Palemene e pei ona filifilia ai e lona itumalo i Faiga Palota Lautele, o le a toe tula’i ai mo le isi lima tausaga aua fa’ai’uga-fai mo le atunu’u.
E 201 palota na manumalo ai Fa’asootauloa i le palota mo le nofoa o le itumalo o Gaga’emauga Numera 2.
Na fa’ailoa e le toea’ina Sale’aula i le Samoa Observer ananafi, e moni ua matua lona soifua, ae talitonu o lo’o iai fuafuaga a Le Atua mo ia.
“O le tulaga masani lava, i le va’ai-fa’aletagata, e va’ava’ai i le tino ma foliga, peita’i e le fa’apena le silasila a Le Atua. E silasila Le Atua i lou fatu,” o lana fa’aaliga manino lea.
“Ua vala’auina a’u e Le Atua, ‘ou te ‘au’auna mo lo’u itumalo. E leai se tasi e te’ena se vala’au mai Luga ma o se tulaga ua matua fa’afiafiaina ai a’u nei, ma tatalo fo’i ia nofo-filemu ma fealofani tatou uma.”
Na ulua’i ulufale Fa’aso’otauloa i le Palemene i le 1991 – 1996, ma avea ai ma Minisita o le Matagaluega o Puna’oa Fa’aleNatura ma le Si’osi’omaga.
E tolu paea’iga sa iai i le Palemene, na avea ai ma Minisita Lagolago mo le Soifua Maloloina fa’apea le Minisita Lagolago mo le Matagaluega o Tina ma Tama’ita’i, Atina’e o Nu’u ma Agafeso’ota’i.
O faiga-palota o le 2006 na pau ai ma le toe filifilia ai mo le tofi o le itumalo.
“Sa iai lava fautuaga na o’o mai, e tatau ona toe ‘ave sa’u talosaga i lena taimi, ae na ‘ou te’ena,” o le toe to-manatu lea o le ali’i-matua.
“Na ‘ou fa’apea, e toe oso fo’i le la ma ua fa’apena lava. Ua fiafia o lea ua ou toe iai i totonu o ‘Upufai.”
E pei fo’i o le tele o isi itumalo, o atina’e masani lava e pei o le suavai-taumafa, o tali-galu, o a’oa’oga ma avanoa faigaluega, o lo’o ‘ave tulimata’ia e le sui fou o Gagaemauga Numera 2, lea e aofia ai Sale’aula i Savai’i ma Salamumu i Upolu.
Na ta’ua e Fa’aso’o, o le a galue lava e fua i mana’oga o lona itumalo.
Na toe manatu fo’i Fa’aso’o ma fa’apea, e tatau lava ona iai pea o se Itu e agaia le malo.
E moni fo’i ua tele suiga ua iai i lenei vaitaimi, ae na toe fa’amanatu pea e Fa’aso’o aso ua mavae, sa to’a-sefululua ai faipule na mo’omia e fa’avae ai se vaega fa’a’Upufai.
Peita’i, ua suia nei lena numera i le na o le to’avalu.
“Sa i se mea o le 12 i le 14 sui na mo’omia i lena taimi e fa’atu ai se vaega fa’a’Upu fai e agaia le malo,” o lana fa’aaliga lea.
“Atonu ua pa’u i lalo le numera pe a manatu i le taua tele o le iai o se Itu Agai, e ui o le taimi nei, ua leai.”