O LA’U TALA FO’I

05 April 2016, 12:00AM

1. Matauina i Tala Fou se ulutala e faapea ua molia se avetaavale onā-ma o lea ulutala e faasino ise faalavelave tau taavale lea na tupu i Sogi-lea e aliali mai ua matua maumau ai lava ia taavale. O lea la tulaga ua uma ona faamaonia e le Fofoga o le Ofisa o Leoleo o Maotaoalii. Ia afai la ua mautinoa e Leoleo e mafua mai lea faalavelave i avetaavale onanā-o le fesili la-aisea ua tuu ai le latou polokalame lea sa masani ona fai i le po-o le siaki lea o avetaavale pe o feoa’i solo onanā-lea sa tuuina atu ai i avetaavale se paluni e feula-ona iloa ai lea pe o onā le avetaavale pe leai.

Ae afai la o lea ua faamaonia e Leoleo o lea faalavelave e mafua mai le onā-aisea la ua faamuta ai lea polokalame a Leoleo sa masani ona fai i luga o ala tetele? Afai la ua silafia e le Matagaluega o Leoleo le taua o lea auaunaga mo le saogalemu o le atunuu femalagaa’i-aisea ua tu’u ai?

O le fautuaga la i le Ofisa o Leoleo ae le fai a’i-faamolemole ‘aua le tuua fuafuaga ma tapenaga aoga mo le saogalemu o le atunuu! E mafua se fautuaga ona afai e saogalemu le atunuu-ona faaitiitia foi lea o le mamafatū o outou tiute fai! O le a sou taofi? 

2. Matauina foi i Tala Fou ma le agaga fiafia le faataunuuina ma le manuia o le taumafai ona nisi o le fanau a’oga e ala i o latou faauuga-aemaise ai foi nisi o le ‘au-matutua o loo naunau pea e saili le poto. Afai la e fai le fesili pe aisea ua naunau ai matua ina ia matua aoaoaina fanau?

O le tali-e leai se matua e mana’o e valelea lana fanau pe afai o  sisina lona afu i le tausiga o le aiga, faaaogaina o le fanau ma le faatinoina o isi tiute uma lava mo le aiga. O le faanaunauga faamuamua foi o matua-ia atamamai fanau-ina ia latou iloa ai-e leai se mea e tasi e pa’ū mai le Lagi! O lea e naunau ai ia popoto ma aoaoina le fanau tusa lava pe taugata le aoaoina. Ae ia manatua foi-fai mai le Tusi o le ‘ava i matua o le amataga lea o le poto! O ai e ana lena faaupuga? O lena ua outou iloa-ma afai o le finagalo lena o le Atua-o lona uiga- e mafai la e le Atua ona avatu ia te oe le poto lea na ia avatu ia Solomona!

O le poto o le a? O le poto e fai ai le amiotonu ma le faamasinoga-e pei ona tatou molimauina i le faaiuga na fai e Solomona i le mataupu a ni tina se to’alua lea na finau i se tamaitiiti! O lea e momoli atu ai le faamalo ia i latou uma lava ua faauuina-ae ia manatua-e le o le mutaaga lena-ma fai mai le upu-“o le mutaaga o le lagi! O le a sou taofi? 

3. Ua matauina foi i Tala Fou le mamafa o fuafuaga a le Ofisa o Leoleo ua faata’oto mo tamaiti a’oga ia e faatupu vevesi i totonu o le Taulaga! I se tasi faaupuga-o tamaiti a’oga ia e fia tama sifi i nofoaga faatali pasi ma le maketi i Fugalei! O le taua la o ia fuafuaga-ia iloa ai e ia tamaiti-o le tulafono e mo tagata uma lava-ma e leai se tasi e i luga atu o le tulafono-e o’o lava ia i latou!

Afai la ua tu’u e nei tamaiti le pogai na tuuina atu ai e o latou matua i latou i aoaoga-ae fai nei faiga faatautala i nofoaga faitele-o lona uiga la- e le o ofi i ulu o nei fanau le tautiga ma le afu maligi o latou matua i aso uma e tau faafetaui itu e lua-o lona uiga-o le saili o tupe toe fafaga ma totogi pili o a’oga-ae o atu tu’u le a’oga- ae fia sifi solo i totonu o le Taulaga! O le fesili la-faamata o faafetaia pe leai e nei tamaiti le tautiga o latou matua? Afai latou te le o iloa lea tulaga-ailoga la o se alofa moni lea mea o le afu o matua ae faatalale i ai le fanau? O le a sou taofi?

05 April 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>