O Tafatafa-o le igoa lea o le nuu e soso’o ma Malaemalu i Falealili i le itu i sauté. O le nuu tuai o Tafatafa i luga o le sami-o loo i ai le “Vai’ula”-a’o uta e latalata i le alatele o le Malo i tua ane o le Aiga o Petersen-o loo i ai le “Ana o Tausulu”- e faigofie ona maua le Ana lenei.

O le Talatuu o le Vai’ula e faapea o le tama o Pouliulilegaga-o le atalii o Tuisamoa-lea sa avea ma atalii fai o Malietoa Faigā. O le tama lea na asiasi ia Malietoe Faigā i se tasi aso-ma na iloa ai le toatele o tagata sa la’u ane i luma o Malietoa e fai ai ona aso.

I le taofi o Pouliulilegaga-o le fai o aso o Malietoa i tagata ola-e le pogai ona o sona mana’o e taumafa tagata-ae ua na o se sasa i tagata ina ia latou iloa ai-o ia o Malietoa le Tupu o Samoa. Ua o’o i le isi aso, ona feiloa’i lea o Pouliulilegaga ma ni taulele’a se to’alua mai Savaii-na o mai e aumai se tasi o le latou aiga mo le aso o Malietoa. Na o mai lava nei taulele’a mai Savaii ma loimata ona o le saua o Malietoa.

E taunuu atu Pouliulilegaga-o fetagisi mai lava nei taulele’a-ona faapea ane lea o le tasi o i la’ua ia Pouliulilegaga-“Na ma o mai e aumai lo ma uso laititi mo le aso o Malietoa-aua ua o’o mai le faasologa i lo matou aiga.

Sa tali atu Pouliulilega-“aua le popole ae o loa e fati ane se launiu- e fili ai o ia e pei o se i’a-ma ave i luma o Malietoa. Sa fefefe taulele’a e fai lenei tonu-ae sa augani atu pea Pouliulilegaga-ia fai le mea ua ‘ou fai atu e fai.Ua avane loa le launiu ua fili ai le tama o Pouliulilegaga ma tausoa atu loa i luma o Malietoa. Ua malele atu le Malietoa e tatala le fili ma sa faapena loa ona fai.

Ua faate’ia le Alii ina ua silasila atu-o lona atalii lava lenei ua fili e pei o se i’a.

O le to’atama’i tele o Malietoa na alaga atu ai loa-“Sole, e lua ni atua e tapua’i i ai Samoa? Fai mai le mau a Tafatafa-o iina tonu lava na maua ai le igoa o le tama o “Luātua” poo le “Lua-atua.” Ua o’o i le tasi aso ona momoli mai lea o le mana’o o le Tuimanu’a ia Malietoa ina ia afio atu i le matematega.

Ona sauni lea o le malaga mo Manu’a a le Tupu o Malietoa. O le ‘au-malaga o Folasaitu, Folasalei’ite, Fata ma Maulolo-peita’i-ua faate’ia Malietoa ina ua silasila atu ia Pouliulilegaga i luga o le va’a. Ina ua taunuu le malaga, sa fai loa le ‘ava o le feiloaiga. Sa muamua ona alaga le Ipu i le Malietoa-ae le masani ai-talu ai le manatu faamaualuga o Tuimanu’a-o ia e maualuga i lo le Malietoa.

O le tama o Pouliulilegaga-sa nofo i le talātua-ma ina ua faalogo atu ua malele le ipu a le Malietoa-sa fesili ifo i lona loto poo le a fo’i lenei togafiti a le Tuimanu’a ua fai? 

Ua aga’i atu nei le Tautu-ava i le Tala o loo susῡ ai le Malietoa- e tau-aao atu lana ipu, ae sa faafuase’i lava ona oso atu Pouliulilegaga mai le talātua sa nofo ai, se’i le ipu mai le lima o le tautu-‘ava-ma inu loa. Talofa e ia Pouliulilegaga ma lona mata’alia. Ua na inu le ‘ava ma ua oti ai. E moni lava lona masalosalo i togafiti a le Tuimanu’a.

O le ipu na alaga mo le Malietoa-ua uma ona ave i ai le vai oona. Ua lavea’ina e Pouliulilegaga lona Tamā o Malietoa. O le mata’alia o Pouliulilegaga na maua ai lona faalupega o “Luatua Le Vave,” Ua vevesi le ‘ava o le feiloaiga talu ai ua maliu le tama o Pouliulilegaga ma ua to’atama’i tele Malietoa.

O lea na toe taliu faanatinati mai ai i Upolu Malietoa ma le ‘aumalaga-ma aumai lava le tino oti o Pouliulilegaga. Ua sau pea le malaga i le vasa ma ina ua vaaia laufanua o Falealili –sa afe loa i ai e ave Luatua Le Vave ia Tuisamoa e lagomau ai. Ua o’o le vaa i le aloalo ona folau ai lea aga’i i le maota o Tuisamoa e latalata i uta.

Ona latou afe lea i Tafatafa e asu vai, ona malele atu lea o Malietoa-e lelei ona faamalῡ le malaga ma faata’ele ai Luatua. Ona latou ave lea o Luatua ua faata’ele-ma ua latou ofo i le mea ua tupu.

Fai mai e faata’ele atu Luatua ae faasuati mai. E faapea le tala o le palapala mai le fofoga o Luatua-lea na liua ai le suavai e peiseai o le toto e o’o mai i le asŏ.

O le pogai lea o le upu o “Luatuanailevai’ula”ma ua ia te ia le igoa o “Luatualevave.” O le Ana o Tausulu i Tafatafa e toatele nisi latou te le o silafia-ae le mamao ese mai le alatele o le malo. Peita’i- e te ulufale loa i totonu ona e vaaia lea e lua ona maga, o le tasi vaega e aga’i i matῡ sasa’e i le sami se’ia o’o ina le mafai ona e toe savali ona ua faatumulia lea vaega i le suavai, a’o le isi vaega o le Ana e aga’i i uta ona muta ai lea.

O le tele o vaega pogisa o le Ana e tumu ai le manu o le “pe’ape’a-ia e felelei ese pe a ki atu moli-uila. O le vaega i matū o le Ana lea e loloto ai le suavai sa taumafai ni tagata totofu mai fafo -e ui atu ai ma ea a’e i le sami-e pei o le talitonuga o le nuu e tau i le moana.

Peita’i-e le’i taunuu lenei faamoemoe talu ai-ua le lava le ‘ea e manava ai.

O le fautuaga mo e fia silasila i lenei Ana-e ao ina lava tapena. Ia i ai ni moli-uila ma mea uma e tatau ai.