Fa’atasi suli o Vaioleti Saena
Po’o fea lava le itu o le lalolagi tatou te feta’aloloa’i ai, e tatou te manatua lava o tatou aiga moni, na o tatou ola ma soifua ane ai.
O lea le fa’amoemoega tele o le fa’atasiga o fanau ma fanau o le tinā i a Vaioleti Saena, o Tuanai.
E 15 alo o le tinā.
O le Aso Sa na se’i mavae atu nei na fa’amae’aina ai lea fa’amoemoe ma o se itu taua tele i a’i latou o le mafai lea ona fa’atasia mai le tele o tausaga.
O lo latou talitonuga, a nonofo fa’atasi ma fegalegalea’i o le manuia fo’i lea o aiga i le agai atu ai le lumana’i.
O le sauniga lotu amata ai lea fa’amoemoe lea na tatalo fa’amanuia ai se tasi o alo o Vaioleti lea o lo’o soifua mai pea i a President Fafai ma talosia ai taualumaga uma o le fa’amoemoe.
Na ma’ea ona aga’i lea o le aiga atoa i Tafatafa mo le lima aso lea na tele ai nisi o vaega na tu’ufa’atasia e le aiga aua lava lea aso taua mo i latou.
O le to’atele o suli na auai na autova’a mamao mai lava i Niu Sila, Ausetalia, Amerika mo lea fa’amoemoe taua.
E o’o mai i le asō ua 647 i latou na soifua mai le tinā i a Vaioleti Saena.
O lo’o ua i ai le fa’amoemoega tele o le aiga i le toe fa’ataunu’uina o se isi tu’ufa’atasiga tele a lo latou aiga i nai tausaga i le lumanai.
O le agaga maualuga ia maua pea le nonofo fa’atasi aemaise o le malamalama lea ole tasi tagata i le tasi tagata aemaise o le manuia o augatupulaga o lo’o i le lumana’i.