Fa’aalia le mitamita fa’a-Samoa i atunu’u i fafo

By Vatapuia Maiava 04 August 2016, 12:00AM

E tumau lava e le-mafai ona ‘ave’esea, le mitamita o so’o se tagata-soifua pe a o’o ina fa’atino fa’afiafiaga fa’aleAganu’u a lona atunu’u, ae maise lava a’o iai i atunu’u ‘ese. 

A’o ai se e le-mitamita i lona fa’asinomaga; pe e te siva ma fa’afiafia, pe na o le nofo lelei ma usi le maimoa. 

I fa’afiafiaga talu ai nei i le Aso Fa’apitoa a le Iunivesete o le Pasefika i Saute (USP) i lona nofoaga i Laucala, na talosagaina ai tama’ita’i ma ali’i-a’o’oga mai Samoa, latou te taualugaina fa’afiafiaga o lea aso, ia taofia ai le ‘au-matamata mai le vave ta’ape e le’i taitai uma le aso. Ae le o se mea fou lena mea.

Na matua fa’afiafiaina le ‘au-matamata i siva mata’ina a tama’ita’i Samoa, o le fitifiti o fa’ataupati a ali’i ma atili fa’afiafiaina i pese su’ifefiloi, o pese fa’aleAganu’u, o pese fa’anei-ona-po a’o fai le sasa.

E le’i tele lava i se pito, le fa’afiafiaina o tagata Samoa fa’apea isi mai isi motu o le Pasefika sa maimoaina ia fa’afiafiaga. 

“Na matua mata’ina fa’afiafiaga o lenei tausaga,” o le fa’aaliga lea a se tasi o fanau-a’oga, o Jeremiah Lafaele o lona tausaga mulimuli lenei i Fiti, ina ua fa’atalanoaina e sui o le Samoa Observer. “I tausaga e tolu sa ‘ou iai, ‘ou te iloa o se tausaga ‘ese lenei ona o le agaga fa’aSamoa lena ia te a’u nei ma o se mitamitaga fo’i lea ona o le va’aiga ma fa’alogona sa  iai i lea aso.

 “Na matua iloga le taualuga o lea aso, na matua alo ai le Asosi a Tamaiti-A’oga Samoa e sa’a-fa’aoti le utu a le faimea ma sasae le mata o le aitu i lea aso.”

Na fa’ai’u le fiafia i le fa’anoanoa mo le ali’i o Jeremiah, talu ai, o lana toe fa’afiafia lea mo Aso Fa’apitoa fa’apea a le Iunivesete. 

“O se fa’anoanoaga fo’i ia te a’u nei aua o le Aso Fa’apitoa mulimuli lea mo a’u, aua ua silafia lelei lava e tamaiti Saoa uma, o le Aso Fa’apitoa lea, o se aso tele tele mo le Iunivesete ma le Pasefika,” o lana fa’aaliga lea. 

“O le aso lea e matua fuli ai lava e fa’aali ma fa’alauiloa lau lava aganu’u e ala i mea-taulima, o tusitusiga ma gaulega fa’atino ae maise o fa’afiafiaga i tausaga uma. O se aso e tulimata’ia e le to’atele aua e matua matagofie mea uma o le a va’aia ai.   “O se tulaga fo’i e fa’anoanoa ai aua o le a ‘ou le toe ‘auai i lea fa’amoemoe tele i lena tausaga a-sau, e matua tu-vaelua ai i le tofi e si’i-matila le atunu’u ma avea ai fo’i ma se tasi e lauiloa lautele pe a mae’a fa’afiafiaga ia.”

Na ta’ua fo’i e Jeremiah, na matua alalaga le tumutumu sa iai ina ua mae’a le fa’afiafiaga a Samoa.

“Pei e valea tagata,” o lana fa’aaliga lea.

 “Na fe’ei ma tau’alaga leotetele ona o le matou faia o nai tifiga fo’i ma taga a teine sasa’o o Beyonce ma JLo.

“E le’i tu’umamaina fo’i e naite le fa’atinoga o le momosi a tausaga Samao, a’o tama fo’i i taga ma gaioiga, na matua ofoofo tetele ai le ‘au-matamata. Sosola fo’i naite ma mata Samoa ma le mea atoa i lena aso ma matou matua mitamita ai ona Samoa ao-uliuli mao’io’i.” 

 “Ma e mafua nei lagona uma, ona o le fa’ananau ia faia o se fa’afiafiaga aupito matagofie mo Samoa. I le amataga e le’i faigofie ae o matou nei o Samoa e fiafia e fa’afiafia, e fai fiafia lava i taimi uma e faia ai a’oga ma fa’ata’ita’iga ma isi tapenaga uma.” 

By Vatapuia Maiava 04 August 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>