Teena e le Faamasinoga se talosaga

By Pai Mulitalo Ale 12 May 2016, 12:00AM

O se ulugalii lea na faasalaina ona o lo la taulamua i le faia o se faiga pi’opi’o e maua ai tupe i totonu o Samoa ua teena le la talosaga e tuua ai le atunuu.

O lea faaiuga e tusa ai ma le talosaga a Nicolas Giannos ma Rosita Stanfield, na tuuina atu e le Faamasino Sili, Lana Afioga Patu Tiava’asu’e Falefatu Sapolu ananafi. I fafo ane o le Fale Faamasino, na matua faitioina e Mr. Gaiannos lea na matua ita tele-lea faaiuga fai mai e le fetaui ma e le amiotonu. 

O le talosaga a lea to’alua ina ia tuua le atunuu sa tuuina atu e le la loia, o Leota Raymond Schuster. O lea talosaga na faaulu i le lua vaiaso talu ai, sa talosagaina e Leota le Faamasinoga ina ia faatagaina ana paaga e toe fo’i atu i Peretania Tele e vaai o la aiga.

O ananafi, na talosagaina ai e Leota le Faamasinoga e faapea o ana paaga ua leva ona toesea mai o la aiga mo se taimi umi e o’o mai i le taimi nei, talu ona taofia i la’ua mai le tuua o le Malae Vaalele i Faleolo i le tausaga talu ai.

Na ia tuuina atu se ta’utinoga e faapea la te toe taliu mai i le taimi mo le fofogaina o Talosaga mo le Toe Iloiloina o lea mataupu ia Oketopa. Ae peitai, na matua teena e le loia o le Ofisa o Moliaga a le Atunuu, o Leona Su’a, lea talosaga.

O lana finauga fai mai e leai se mea e mafai ai ona faamaonia le toe fo’i mai o Giannos ma Stanfield. Fai mai lea Tama’ita’i-o le taimi lava la te o ese ai mai Samoa, e le taitai ona toe fo’i mai-talu ai e leai se la mea o i totonu o Samoa e toe fo’i mai i ai.

“O le ono toe fo’i mai o i la’ua-o se vaega aupito i maulalo lea o le fua,”o le faaaliga lea a le tama’itai o Ms. Su’a. E ui lava ina sa le mafai e ia ona faamaonia pe o i ai se feagaiga a Samoa ma Peretania Tele e toe faafo’i mai ai tagata pagota, ae tusa lava pe o i ai se feagaiga e tasi, o lana finauga fai mai o se taumafaiga lenei e matua taugata lava ma e matua tele le taimi e alu ai.

I totonu o lana faaiuga, e lagolagoina e Lana Afioga Ms. Su’a. “O se mataupu lenei e uiga i faiga tau faasese lea e matua taua tele i le fesili tau le mautali atu ma le faatuatuaina,” o lana faaaliga lea.

“O le faasalaina ona o faiga tau faasese e afaina ai lo la toe foi atu. O le faafitauli tau le sola ese e matua maualuga lava.” Na toe ta’ua e le Faamasino Sili o Patu e faapea e leai se feagaiga a Samoa ma Peretania tau le fefaafo’ia’i o pagota –ma afai la te le toe fo’i mai, e leai se isi faiga e toe aumai ai i la’ua. Na teena foi e le Faamasinoga se talosaga a Leota ina ia toe sui aiaiga o le faanofo-vaavaaia o ana paaga, ia o loo manaomia ai i la’ua ina ia saini faalua i le Ofisa o Leoleo i le vaiaso.

I fafo ane o le Fale Faamasino, na matua teena e Giannos le faaiuga, fai mai e le fetaui..Na molia Giannos ma Stanfield ma faamaonia e nofosala i le faatinoina o se faiga uiga ese i totonu o Samoa.

O Giannos, o se alii faipisinisi mai Eleni faatasi ai ma Stanfield, o se tamaitai Samoa ua leva ona nofo i fafo, na sau i Samoa ma le faamoemoe e faamaopoopo ni tagata teutupe i totonu o le atunuu ma teu a latou tupe i totonu o le UFUN Club ma folafola mai ni tupe se tele e toe maua ai mulimuli ane.

Na molia faatasi Giannos ma Stanfield ma Faatoafe Mati Silao i ni moliaga se valu o le maua o ni mea i se faiga tau faasese e tusa ai ma le fuaiupu 172 o le Tulafono Tau Soligatulafono 2013. Na molia foi Giannos i isi moliaga ta’itasi e lua tau faamaumauga sese tau tupe e tusa ai ma le fuaiupu 198 o le Tulafono.

I le faaiuga o faamatalaga molimau mo moliaga, na faaalia e le loia mo le itu tete’e se manatu e leai se mataupu e tatau ona tali atu ai e fai ma sui o le toatolu ua tuua’ia-e tusa ai ma ia moliaga uma. 

O le faaiuga a le Faamasino Sili i le aso 8 o Oketopa 2015 e faapea e leai se mataupu e tatau ona tali atu ai e tusa ai ma Faatoafe Mati Silao ua molia i le itu i mea taitasi e valu o le maua mai o mea e ala i faiga tau faasese –ia na mafua ai ona molia o ia.

O na mataupu e faasaga ia Faatoafe sa faaleaogaina ma leai se faasalaga mo ia. O le faaiuga foi a le Faamsinoga e faapea e leai se mafuaga e tatau ona tali atu ai i le itu ia Giannoa lea ua molia ma Stanfield foi lea ua molia faatasi ai-i ni moliaga se lua o le maua o ni mea e ala i faiga tau faasese.

Ona totoe ai lea o moliaga tuufaatasi e ono o le maua mai o ni mea e faasaga ia Giannos ma Stanfield ma ni moliaga eseese se lua o le faasese o le tausiga o tusi e faasaga faapitoa ia Giannos.  I le tuuina atu o lea faaiuga, fai mai le Faamasino Sili o Patu: “Ua ‘ou maua o i la’ua e to’alua ua molia o Mr. Giannos ma Mrs. Standfield e nofosala uma i moliaga faaopoopo o loo totoe tau le maua o mea i faiga tau faasese

By Pai Mulitalo Ale 12 May 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>