Talofa Samoa! Ua matou maitauina ma faailoa mai iai matou le faigata tele ona mulimulita’i tagata i lenei lava polokalame o “meaai atoatoa e gaosi mai laauaina” (WFPB diet). 

O le tali faigofie lava e le faigofie… E iai lona mafuaaga. Muamua, o le toatele o le mamalu o le atu nuu ua masani lava i le taumafa o meaai e tele ai le ga’o mai aano o manu , poo le faafeagai o le taumafa i meaai gaosi mai laauaina lea e le tele se gao e maua mai ai aua e gaosi mai laau.

Ua fiafia lava tagata i a latou mea tausami ma ua masani ai foi e pei lava oi latou o loo taumafa kofe, tapaa ma le pia e le mafai ona ola e aunoa ma ia vaega. E pei ona faailoa mai e tagata Amerika e le faigofie le aveeseina o siusiu pípí aua o meaai ua masani ai mo se taimi umi.

Ana leai le vaega taua lea e faailoa mai e le “taumafa i meaai atoatoa e gaosi mai laauaina” ma ua faamaonia mai e le tele o tagata e mafai ona foia ai ma toe faaitiitia ai le tino puta ma gasegase le pipisi ma puipuia mai ai le kanesa, e leai lava se aoga e taumafai ai e faaamautinoa mai le suia e le au mai suka ma tino puta ana fuamoa ma sosisi o loo inu ai lana ti ini fualaau aina meamata poo se ipu polesi faatasi ma fualaau aina suamalie ma se susu gaosi mai laau aina.

O le a tele ni luitau o le a faafeagai pe afai o le a tatou taumafai e fai se suiga o o tatou tagata nuu e mulimulitai i lenei faiga fou ma taumafai loa e avea ose masani.
Pe tusa ai ma le 10 tausaga talu ai, sa tuufaatasia ai e nisi o le au popoto se tusitusiga e faapea:

“Fai se suiga o lou tino talafeagai e ala i lou tilotilo i tagata o loo siomia ai oe.” O loo tuuina atu foi e lenei au suesue le lagolago i lagona ma talitonuga o tagata o loo siomia ai i tatou. O le taunuuga, afai o loo e nofo faatasi ma tagata tino puta o loo taumafa i meaai gaoa o le a faapena foi ona maua oe i le tino puta aua o loo tutusa lava mea taumafa o loo tou tausasami ai.

I le taunuuga o ana sailiiliga faatasi ai ma faamaumauga a le malo na ia maua ai e toa 6 mai le 10 tagata Samoa e maua i le tino puta, ma o le malosi e faaaluina i le taumafai lea e suia mai mafaufau o tagata o si o tatou atunuu ina ia latou taumafai e taumafa meaai le gaoa, e foliga mai ose taimi maimau.

Ae peitai na taua e se tasi o paionia muamua lava na mafai ona foia lona ma’i suka o Dr Joel Fuhrman na ia faapea mai: o le malamalama i le matautia o le aafiaga ogaoga ua e iai, e taitaiina atu ai oe ise naunautaiga e taofia ai aua o loo siomia oe e tagata soifua maloloina lelei. O se tasi o manatu natia i le avea ai o lou tagata ma tagata soifua maloloina ma talafeagai lou lapoa o le tápá lea o le lagolago o au uo latou te lagolagoina oe ma taumamafa faatasi ma oe ini meaai soifua maloloina lelei.

e ova atu ma le 4 tausaga  sa mafai ona aoaoina mai ai e le METI mai lo latou maitauina i le taumafai lea e fai se suiga o taumafa o tagata. Ae, o le le lava o le lagolago o aiga ma uo o le vaga pito sili lea ona faaletonu ma taitaiina atu ai i latou sa amata ma le fiafia i le polokalame ma iu lava ina le toe faaauauina le taumafa i meaai atoatoa e gaosi mai laau. Ma ua matua mataituina e le tatou faalapotopotoga lenei mafuaaga lea e mafua mai ona oni mafuaaga se lua.
Muamua: Afai e fai se faatasiga a nuu poo aiga e faigata tele le saunia ese oni meaai nao lau o laau mo i latou e le taumafa i aano o manu. Ma le lona lua lea e tele ina maua ai le toatele o tagata Samoa ona o le uiga lea o le aamu poo le ulagia foi oi latou ua mulimulita’i i lea polokalame ma faavaivaiia ai i latou pe a faatusaina i latou i rapiti ona o meaai o loo taumafaina!

O loo tauaveina nei e le Faalapotopotoga a le METI le faigata, pe a faatinoina Semina e faailoa atu ai le leaga o le taunuuga e oo iai pe afai latou te le utagiaina lenei polokalame ma filifili e le fia mulimulitai I le “taumafa atoatoa i meaai e maua mai laau aina”.
O le a le mea e mafai ona fai e le METI, e ese mai i le laufofoga ataata, e avatu ai se fesoasoaniga i nei tagata e leo lagolagoina e o latou aiga?
E manatua ai se tasi o tala faafiafia loto ua leva atu ae le mafai ona faagaloina. I le vaitausaga o le 80 sa fuafuaina ai e le Matagaluega o le Soifua Maloloina se auala e aveesea ai pe foia ai le lepela i Samoa e faaaogaina ai ituaiga fualaau fou sa tuuina maim o i latou o loo maua i lea gasegase. Sa faailoa mai ai e le Soifua Maloloina Faalevaomalo (WHO) e le mafai ona aoga fualaau nei pe afai e le inuina e aso uma i totonu o le 6 i le 12 masina e faalagolago i le ogaoga o le lepela o loo iai.
Ona tulai mai ai lea ose fesili e faapea, e faapefea ona faamautinoa mai le inuina e nei gasegase o fualaau, ae o le toatele oi latou e le faamoemoeina, e le fia inu fualaau ma ua tau mamao ese mai foi o latou aiga ma uo ona o tulaga o le gasegase?

Ao avea ai au ma Pule Sili o le Matagaluega o le Soifua Maloloina i lea taimi, faatasi ai ma le lagolagosua o lou toalua ua faiilagi le folauga o Matatumua Maimoaga lea sa avea ma taitai o le Sosaiete o le gasegase lepela, sa maua faalauiloai se polokalame ua taua o le “Samaria agalelei”, lea sa ma valaauliaina ai gasegase taitasi e latou te tuuina mai se suafa o se tasi e faatuatuaina ma faalagolago iai e avea ma Samaria agalelei e gafa ma le faainuina o fualaau i aso taitasi. Sa maua faatinoina ni semina mo nei gasegase faatasi mai ma “Samaria agalelei” ma faatonuina ai le inuina o fualaau i le taimi faatonuina ma faamaumau i lalo.

Sa faamanuiaina le polokalme o le “Samaria agalelei” ina ua maua i faamaumauga e 98% gasegase lepela sa tausisia lelei le inuina o fualaau i le taimi faatonuina. I le faaiuga sa avea ai le gasegase lepela ose faamuamua mole atunuu o Samoa.

I le taimi nei la, ua fautuaina ai e le METI gasegase taitoatasi e mananao e auai i le polokalame o le “taumafa i meaai atoatoa e gaosi mai laau aina” ina ia sailia se tasi e avea ma “Samaria agalelei”, e mafai ona la auai faatasi i le savaliga o le polokalame seia oo lava ina toe faafoisia le malosi. I le taimi o le semina e auai faatasi le gasegase ma le ua avea ma Samaria agalelei ise aoaoga fetufa’ai lea e faatuputeleina ai le malamalama e uiga i vaega tau soifua maloloina e ao ina tausisia ma fesoasoani ai iai latou ina ia faia loa lo latou filifiliga ina ia mulimulitai I lenei polokalame aua le toe faafoisia o le soifua maloloina.

O le auala lea, e le gata ua iai se tasi e toalua ma le gasegase i le suia o lea vaega o le olaga, ae fesoasoani foi e puipuia le gasegase mai le lē lagolagoina e le aiga. O le polokalame o le Smaria agalelei ua mafai ai nei ona siitia le tulaga o gasegase ua mulimulitaia lenei polokalame mai le 15% sa iai muamua agai i le 44% ua iai nei.

O semina i vaiaso taitasi a le METI ua faatuputupulaia ai le fuainumera oi latou ua liua, ma o nisi oi latou nei ua avea ma faataitaiga sili i totonu o o latou aiga ma nuu i le suiga fou ua iai nei le taumafa ma le maloloina ua mafai ona maua mai ai. Ua avea i latou oni taitai sili i o latou nuu lea e mulimuli ane fesoasoani e avea Samoa ma malo Soifua Maloloina.

O le tatou lesapi mo lenei vaiaso 

Salati fualaauaina suamalie.(Polesi + susu so good +fualaauaina suamalie)

Esi pula 

Fai pula

Polesi atoatoa

Susu(so good)

Tinamoni.

Vaai ni esi pula lelei se lua ma se taifa’i se tasi. Aua nei vaivai tele pe malō tele foi. Vaevae le esi ile vaevaega masani ona tipitipi lea o le aano lea ua pula ma tuu i totonu o le apa, tipitipi foi fa’i pula ma tuu i totonu o le apa, faafefiloi le esi ma le fa’i ona ave lea iai o sina tinā moni aua le tele fua ile tele o le fa’i ma le esi. Faapena foi ma le polesi lea e kuka mo le lima minute, ave iai sina vine ma se susu o le so good pe faakuata le pepa susu e fuafua lava e oe.  Siaki po ua lelei ona taumafa loa lea.

MOLIMAU

TUIASAU UELESE PETAIA

O le ogatotonu o le 2014 ao aafia ai a’u i se ma’i,  tale ua faigata ona te’a ma ua faapopoleina ai a’u ma ou alu ai loa ile falema’i o Tupua Tamasese Meaole. 

Sa ou le talitonu ile fai mai o le foma’i ia te a’u ua ou Limonia, ma se tala out e le i mafaufauina. Ina ua maea o’u siakiga masani sa mautinoa ai ua ou aafia ile ma’i suka. 

E tusa ai ma faamaumauga a foma’i sa faailoa mai ai ua o’u aafia ile faama’i lenei ile tausaga e 2011. 

Ese mai ai i a’u fualaau tui (antibiotics) mo le Limonia, le tele ma le anoanoa’i o le ato fualaau mo le ma’i suka. 

Sa faatonuina foi a’u e tatau ona ou resitala ile falema’i mo le au suka ina ia aumai fua ai a’u fualaau mo le suka e tauala mai le polokalama a le malo mo ma’i suka. 

“O le faaauauina lava lea o fualaau mo le olaga atoa” ole tala lea sa toe fafagu maia lo’u mafaufau. 

Ou te le manao e faaauau le mea lenei mo lo’u olaga atoa…….

Aepeitai ole a la’u mea ole a fai e mautinoa ai, ou te le toe faaauauina ai le inu pea o nei fualaau ile olaga atoa…….

Peita’i ane , ua o’u mauaina le tali!

Pe a ma le masina sa ou suesueina ai se ituaiga taumafataga sa ou faalogo iai i le isi o’u tausoga fai mai e te’a ai le ma’i suka. 

Sa o’u manao e fai ni faamaumauga mo lenei foi ituaiga taumafataga fou i luga o le televise a’o o’u vaaia le televise ale Ekalesia i lena taimi. O le faalauiloa a le METI i Meaai Atoatoa e Gaosi mai Laauaina

Ua ou filifili e sili atu lo’u alu ile METI ile taeao e sosoo ai nai lo le inu o fualaau nei. 

O le aso na sosoo ai, na ou amata ai loa ile Taumafataga lenei. E leai se aano o manufasi, leai se oloa e gaosi mai le susu, taofi figota mai le sami. Leai se fuamoa. Leai se Ga’o. Na o fualaauaina lava.

Ua amata foi ona ou fai a’u faamalositino masani, o le savali.

Ina ua maea vaiaso e lua, ua pa’u o’u pauna e 20.

Ae o se tala sili ona lelei ua toe te’a  lo’u ma’i suka. 

Ua silia nei ma le tolu tausaga talu ona ou folau i lenei suiga lelei. O le mea moni e le faigofie, ma e avea o se lu’itau tele lenei i aso taitasi.

O lo matou aiga, e pei lava ona taatele i aiga Samoa, e tasi lava le ulo e kuka ai le taumafataga a le aiga atoa. 

E faigata tele nei ituaiga mea, e pei ona masani ai, afai lava o le vaemoa le kuka la e fai, e tausasami uma ai lava le aiga.

O se faafitauli faigata tele lea, o lou taumafai na o oe, ae leai se lagolago a le aiga.

E ui lava ua vaai mai le aiga ile aoga o le polokalama, ae e iai lava manatu ia i latou e  le o se mea tumau.

E le moni pe afai ou te faapea atu sa ou le faamaoni i lenei polokalama.

Aepeita’i sa ou aoaoina le kukaina o fualaauaina i auala eseese e faaaoga ai le sogasogā ina ia manogi manaia taumafa ma tofo lelei, o le a faigofie ona e fiafia ile kale fualaauaina, falai fualaauaina e aunoa ma se ga’o e kuka ai, e oo lava i lau luau e kuka faatasi ma le aniani saina, fiu, aniani samoa ma le apa baked beans! Ma le fesoasoani malosi a le tama o lega e ave i totonu o soo se taumafataga.  

Fesoasoania mai iai ma le malosiaga o le vai fiu, tipolo, ma le lega o le tali lena ole tigā ole faaī ma lou tale!

O le mafuaaga tonu lea ole mulimulita’i ai o nisi o le aiga, ona ua latou molimauina le aoga o nei taumafa, ma ua latou faata’ita’i loa ile manaia o lenei suiga. 

E oo lava i a’u uo sa amuamu mai pe a ou ai i se fualaauaina suamalie po o se fualaauaina fai sua foi i taimi o ni faatasiga tetele po o ni aiga foi. 

O le vaega aupito sili ona taūa: ua leai se ma’i suka sa ou maua ai, atoa ai ua le toe inu ina ni fualaau o le suka ile olaga atoa. Ua le toe tautau’a mai foi ma se totomaualauga.

O le tele ma le anoanoa’i o nisi faama’i o tatou aafia ai e mafai ona togafitia i Meaai Atoatoa e Gaosi mai Laauaina. O lenei taumafataga faatasi ai ma le faamalositino: e mafai ona fesoasoani ile mafaufau, atoa ai ma le  tino ua maloloina lelei i ni auala e te maofa ai!