O LA’U TALA FO’I

12 May 2016, 12:00AM

1. Matauina i Tala Fou se ulutala e faapea- ua teena e le Faamasinoga se talosaga. O lea la talosaga-o se talosaga a se ulugalii fai-pisinisi mai Peretania-o le igoa o lea alii o Nicolas Giannos ma le tama’itai o Rosita Stanfield-ia na o mai i Samoa nei -fai ai se faiga tau faasese e maua ai tupe!

O le talosaga la e lea ulugalii i le Faamasinoga-ia tuu atu i la’ua e toe fo’i i Peretania se’i asi o la aiga-ona toe fo’i mai ai lea. O le faaiuga la o lea talosaga-na teena e le Faamasino Sili-Lana Afioga Patu Tiava’asu’e Falefatu Sapolu.

O lea la faaiuga-ua matua sa’o atoatoa-aua ana talia e le Faamasinoga- o lona uiga-e le toe o’o mai i Samoa nei. O se lapata’iga foi lea i le lalolagi atoa aemaise ai lava tagata faimea pi’opi’o faapenei-ina ia ‘aua lava nei fia tofotofo ia Samoa!

Aisea? Leaga foi ua foliga mai-o le alu alu lava o lea papalagi ua fia maua se tupe-afe mai i Samoa nei-fai ai ana faiga! Masalo ua filifilia e Papalagi Samoa nei e fai ai a latou faiga-ona ua latou iloa lelei-o Samoa nei-e le mafai ona falepuipui ai se tasi na te faia ni faiga pi’opi’o-ma atonu e faavae lo latou taofi ona-o lea foi e faitau miliona ma miliona tupe a Samoa na maumau i faiga pi’opi’o a le Malo-ae le o faasalaina ai se tasi o le faiga-malo.

A tatou toe foi la i le talosaga a lea alii Papalagi  o Nicolas Giannos ma Rosita Stanfield-ia faafetai o lea ua faasa ona toe fo’i i Peretania e tusa ai ma le la talosaga i le Faamasinoga-ae afai la e faatino le faamasinoga o lea alii ma lea tamaitai-ae faamaonia-o lona uiga la-ua la solia tulafono a Samoa-o lona uiga la-ailoga e mafai ona faasalaina i la’ua i le Falepuipui!

Ae o le fesili ‘anoa lava e tatau ona maua i ai se tali-“A faapefea la faiga pi’opi’o a le faigamalo ia ua uma ona faamaonia e le Pule ma Su’etusi Sili-toe faamaonia atili e le Komiti a Alii Ofisa o le Palemene?

I se tasi faaupuga-o afea e ono molia ai le faigamalo e tusa ai ma latou lava ia faiga pi’opi’o? O le a sou taofi? 

2. Ua matauina foi i Tala Fou e faapea ua teena e se tasi sa avea muamua ma Minisita o le Kapeneta ona moliaga e pei ona faia e le Ofisa o Faiga Palota e faasaga i se ta’utinoga sese na ia faia mo le Faiga-Palota Lautele o le 2016.

O lea la Minisita muamua o le Kapeneta –o le Afioga a Le Tagaloa Pita. O le ‘auga atoa la o lea tagi -e faasaga i le le faia o sana monotaga e pei ona aiaia e le Tulafono o Faiga-Palota-ae o le faaaliga a Le Tagaloa-“na te le faia se tautua” vagana ai isi matai.

O lea la mataupu-ua toe tolo i le aso 11 o Iulai 2016. Ae o le fesili taua lava-o le a tonu lava le ituaiga o Tautua o loo aiaia i totonu o le Tulafono o Faiga-Palota? Ia manatua lelei-o le aganuu ma le faa- Samoa-e anoano ituaiga o tautua.

O le “tautua tuāvae”-o lona uiga o le laulau o le taumafataga a le matai-ma nofo i tua ma le ‘apa fafano. O le “tautua matavela”-o le nofo mamao mai -ae tautua mai i le matai ma le aiga. O lona uiga- poo fea lava e te nofo ai ma tautua mai i le aiga.

O le Tautua Matavela la e mafuli i ai le toatele o tagata Samoa o loo nonofo i fafo ma lafo mai tupe e tausi ai matua ma le aiga ma mea tau le ekalesia. O lona uiga la-a tu’u la i ai ma le tautua toto-o le a la le isi mea e mana’omia?

O Tulaga Maualuluga o Aiga ma latou Tama poo Tama ma o latou Aiga-e leai ni monotaga a latou Tama e faia-o le mea lena a Aiga o le Tama! O le faapea mai la e o’o foi i Tama a Aiga (tulou) e fai a latou monotaga-o le fautuaga-faamolemole-tu’u lena mea e matua sese lava i Sini-ma e leai se aganuu faapena a Samoa.

O le mea lea-‘aua le avanea polokiki e faafefiloi faatasi ma le aganuu-leaga o le aganuu-e leai se isi lava malosi na te pulea-leaga ua uma ona faataatia ona faavae popo! O le a sou taofi? 

3. Matauina o lea lava o le a faataunuu le fusuaga a Joseph Parker ma Carlos Takam-ma o lea la ua fai mai Joseph Parker-‘o le a tu’u i ana moto na te faia faamatalaga uma lava mo lea fusuaga.

O le matau la i lea alii-o se alii tino malosi ma e matua ia Joseph Parker-ma e aliali mai foi-ua leva ona taalo o ia i lea taaloga o le fusu. E ui lava la ina aliali mai e la’ititi Joseph Parker i tausaga-ae a pa’ia loa le taaloga lenei o le fusuaga-e le taua na mea!

Ia- e ui lava o le taimi muamua lea o le a ta’a’alo ai ma Joseph Parker-ae o le mea ua mautinoa ua leva ona tapena le alo o Samoa mo lea faamoemoe-ma e le o manatu māmā foi i ai-aua o le taimi muamua lea e mafai ai ona ulufale atu ai Joseph Parker-i fusuaga tetele a le lalolagi-lea o loo fau ai ma sasaga le tamaoaiga!

O le a la sou taofi?

12 May 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>