Fia maua se suavai
Ua silia le 30 tausaga o feagai le aiga o Kiliono Ioane o Tapatapao ma le leai o se suavai.
Na ia fautuaina le Palemia, Tuilaepa Sa’ilele Malielegaoi ina ia fautuina le Pulega o le Suavai mo se fesoasoani talafeagai mo lo latou pitonuu mai le oge vai.
O se fa’afitauli ua loa tausaga o feagai ma le tele o aiga i lea vaega o le atunu’u.
“E mo le silafia ai e le mamao tele atu le tanevai a le Pulega a le Suavai ma lo matou aiga, ae pei e fai lava sina pagatia o le itu oo lo’o ua feagai ai nei ma i matou nei.
“O se itu mautinoa e matuai faigata lava o le soifuaga pe a aunoa ma le suavai lenei olaga o lo’o o tatou soifua ma ola ai.
“O vaega uma lava e fa’alagolago i ai lenei olaga e pei ona silafia ai, o le suavai lava, e fai le eletise a leai e mafai lava ona ola e aunoa ma se eletise.
‘Ae a leai loa se suavai ia ua tupu mai mala.
Na ia ta’ua o lo’o ia malamalama i le isi tulaga faigata ona o i latou e nonofo i luga o le mauga.
“E pei ona silaifia ai ia e fai sina mati’e mai o lo matou fale nei ma le tulaga laugatasi, masalo o se tasi lea o fa’afitauli i lo’u iloa ai e faigata ai tele vaega nei.
Na ia ta’ua o se tasi o vaitafe e lata ane o lo’o mafai ona aoina mai ai le suavai mo lo latou fa’aaogaina.
“Ia ua atili ai le faigata ona o lea ua i ai ma fanau o fanau, e pei o lea e fa’atalosagaina atu ai lava le Palemia mo se fesoasoani vave lava mo i matou.
“O lenei lava vaitau ia ua taugata lava le soifuaga, ma o le agaga lava lea e talosagaina ai le malo mo se fesoasoani talafeagai lava.
“O lo’u iloa i ai ia ua faigata lava nei aso ae faigofie mea uma ona o lo outou agalelei mai.