Māmā se ‘avega pe ā galulue fa’atasi

By Vatapuia Maiava ma Ilia L Likou 16 September 2016, 12:00AM

O le galulue fa’atasi  o Ali’i ma Faipule fa’atasi ai ma le pitola’au a Tinā ma Tama’ita’i o afio’aga ta’itasi o se itu taua lea o lo’o ave i ai le fa’amamafa a le afio’aga i Le’auva’a.

O le finagalo fa’aalia fo’i lea o le Pulenu’u o Le’auva’a, Vaifale Soe Tupa’i i le Fofoga o Samoa i le aso ananafi e fa’atatau i le galuega fitā na o latou feagai ai aua le fa’amatagofieina o le afio’aga i le Teuila o lenei tausaga.

O le molimau a le tinā i a Vaifale Soe Tupa’i, na mafaia mea uma ona sa galulue fa’atasi le afio’aga mo le taumafaia ai o le fa’amoemoe e pei ona i ai molī i le ‘auala ua so’o atoa ai le afio’aga.

“O le nu’u atoa lava lea na fa’atinoina vaega uma nei, e leai ma se tagata o tu ese mai ai,” Vaifale Soe Tupa’i

“Na fai lava nai saoga tupe aua lava lea fa’amoemoe e pei ona outou tagataga’i atu ai nei...ma  e masalo e $30,000 na alu ae le’i tu’u ai le ola o le paoa.

“Ia o lo’o i ai lava nai aiga o lo’o fa’asau ai le paoa...ma e ta’i sefulu moli ( a le aiga).

“E fai lava  i le loto malie o nai aiga (ta’iina o le paoa mai o latou maota ma laoa). Na ia fa’ailoa o le fa’atinoina o le galuega atoa lava na gafa ma matai ma taulele’a o le afio’aga ma na faigofie mea uma i le galulue so’oso’o taua’u o le to’atele.

E le gata la i nei galuega mae’ae’a lona fa’atinoina ae o nisi o galuega o lo’o tele ina fesoasoani ai le Pulega a Ali’i ma Faipule o le afio’aga i le tufatufaina lea o nisi o vaega mana’omia e pei o wheelchairs i tinā ma tamā matutua o le afio’aga.

“Ou te le’o ‘a’apa i tua i le tele o vaega, o le tele lava o fesoasoani o lo’o aumai i le Toomaga mo e Puapuagatia mo nai tamā ma tinā matuatua. “O nisi o vaega e talosagaina le nu’u nei aua lava le fesoasoani ai i le to’atela o aiga.

“E i ai le taimi e maua ai fesoasoani i ieafu ma lavalava e tufatufa mai e le To’omaga ia ona tu’uina atu lea  i nai aiga lima vaivai.

“E i ai le taimi e talosaga ai mo wheelchairs mo tagata matutua ia e maua mai lava , o nisi o taimi e omai foma’i mai fafo ia e maua fua fo’i le avanoa o tagata o si o matou nu’u nei e siaku fua ai.

 “E pei fo’i o fesoasoani o lo’o talosagaina mai e le Ofisa o Fa’ato’aga ia ua tele foi le alofa, na maua mai ai le  ta’i $700 ma fa’atau mai uilipaelo ma nisi o vaega mo le atina’eina o fa’ato’aga o le nu’u nei o lo’o i ga’uta.

By Vatapuia Maiava ma Ilia L Likou 16 September 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>