Ua foa’ina e le Sinalei Reef Resort se siaki tupe e $8,000 i le Goshen Trust Mental Health Facility.

O lenei fesoasoani e ala mai i le fa’ailogaina o le 21 tausaga lea sa faia ai se fiafia tele a le faletalimalo i Siumu i le vaiaso na te’a nei.

O le Fa’atonu o le Faletalimalo, Sose Annandale, sa ia ta’ua o lenei tinoitupe o se fesoasoani mo lenei fa’alapotopotoga e fa’ailo ai lo latou loto fa’afetai ona o lana tautua o lo’o ua iai nei.

“A’o iai pea i le fa’amanatuina o le 21 tasuaga o tautua pea le Sinalei i le atunu’u aemaise ai o tagata tafafao maimoa mai fafo, sa matou to manatu i se fa’alapotopotoga e faia ai se matou foa’,” o lana saunoaga lea.

“Sa matou manatu i nisi o fa’alapotopotoga, ae peita’i sa autasi uma i le fa’alapotopotoga lenei ona e tasi lenei o fa’alapotopotoga o lo’o tauivi pea i le tele o tausaga e ui ina tau leai ni tupe e fa’atino ai le tele o manaoga.

“O le fiafia sa fa’atautaia, o se va’aiga matagofie tele, ma sa vala’aulia fa’apitoa lava se tasi o faili lauiloa mai Ni’u Sila ina ia omai e fa’afiafia i le matou fa’amoemoe.

“Fa’afetai ai i le Atua ona sa maua lava le lagi lelei o lea aso, i le mae’a ai o le afā o Gita, ae sa masalosalo lava le loto pe fa’apeī foliga o le aso o le a iai.

“Pau lava le tulaga sa iai o matou tickets, sa le’i mafai ona matou ausia se seleni sa matou tilotilo iai ona o le afā ma o lea ua le mafai ai ona ‘ausia le fuainumera o le fesoasoani sa fa’amoemoe iai.

“Ae o le asō o lea ua matou o’o mai, matou te taua’aoina atu lenei meaalofa laititi maa o matou alofaaga.

“E le o se fesoasoani telē ae tau ia o se mea iloga ai lo matou loto fa’afetai ona o galuega lelei o lo’o tou faia pea i totonu o lenei fa’alapotopotoga, ma matou fa’afetai atu i lou tausiga lelei aemaise ai o lou finau pea ina ia saogalemu nai o tatou tagata ua le atoatoa le malosi o le tino fa’apea ai le mafaufau.

“Tau ina ia fa’amanuia le Atua ia te oe aemaise ai o le pulega o le fa’alapotopotoga i la’asaga uma o lo’o feagai ai ma lenei fa;alapotopotoga i lenei tausaga.”

O le fa’atamā o le fa’alapotopotoga o le Goshen Trust Mental Health Facility, le afioga ia Tui Atua tupua Tamamsese Efi sa ia fa’afetaia le pulega a le Sinalei ona o le mea’alofa.

“Fa’afetai atu ia Tuatagaloa ma Sose mo lenei mea’alofa ta’ua,” o lana saunoaga lea.

“O se ala mamao na tauasa mai ai le Goshen mai lona tau amataina, ae ui i lea ona o le finau o tagata o lo’o galulue i lea ofisa, lea ua matou ausia mai ai lenei taimi.

“O le fa’alapotopotoga lea ua iai i se tulaga lelei, ona ua iai le tomai masani aemaise ai o le poto ma le atamai e va’ava’ai lelei ai i latou olo’o nonofo i totonu o lenei lotoā aemaise ai o le taumafai lea ina matou fa’afeiloa’iina uma manaoga o latou o lo’o iai.

“O se galuega faigata e le faigofie i le taumafai lea e fa’amalie uma manaoga o latou o lo’o iai i lenei nofoaga.

“O le isi itu o le taumafai lea ia malamalama ma fa’amanuiaina, ina ia mafai ona matou tu’uina le filemu i loto o tagata mama’i o lo’o latou fia maua le filemu, ina ia latou iloa o lo’o iai tagata o lo’o alolofa ia latou ma taumafai atu e fesoasoani ma fa’afeiloaiina o latou manaoga i aso uma.

“O lea ou te talanoa atu o se tagata ua loa tausaga o auai pea i lenei fa’alapotopotoga, ae e le mafai ona ou faiatu ua ou malamalama lelei i uiga o nai nei tagata, ae pau le tulaga lea ou te fa’ailoa atu o lea ou te iloa lelei le galuega o lo’o fai e latou o lo’o galulue i lea nofoaga i aso fai soo.

“Fiafia lava le loto i le maitau atu o lo’o outou amanaiaina lenei fa’alapotopotoga.”