O la’u tala fo’i

23 December 2015, 12:00AM

1. Ua maua i Tala Fou e le o talia e le Ofisa Sili o Pulega a le Iuni Lakapi a Samoa le tala a le Samoa Observer e uiga i le tofia o se Faia’oga fou mo le Manu Samoa!

E tusa ai ma le tete’e a le Ofisa Sili o Pulega a le Iuni Lakapi a Samoa-fai mai e le’i mae’a taualumaga o le sailia o se Faiaoga fou o le Manu Samoa-ma o le Aso Lulu 23 o Tesema -o le a faalauiloa aloa’ia ai lea faaiuga pe a mae’a le fono a le Komiti Faatonu a le Iuni Lakapi a Samoa.

O le mau la a le Ofisa Sili o Pulega a le Iuni Lakapi a Samoa-e le sa’o le tala na lomia faasalalau e Samoa Observer. Ae peitai-sa le mafai e le Ofisa Sii o Pulega a le Iuni Lakapi a Samoa ona faamaonia pe teena lipoti e faapea o Namulauulu lea ua tonu o le a avea ma Faia’oga o le Manu Samoa.

E aliali mai la e tusa ai ma le Ofisa Sili o Pulega pe afai e sa’o-e leai se tofiga ua faia -vagana ai ua faalauiloa aloa’ia e le Komiti Faatonu.

O le fesili la- o le a le pogai e tau nānā ai nei mea mai le atunuu? Afai o le Iuni Lakapi a Samoa-o le a la le pogai e mafua ai ona le tali sa’o mai o le atunuu? Afai la e lei tofia Namulauulu-o le a le pogai e le ta’u sa’o mai ai?

O ai la lena e mana’o i ai le Komiti Faatonu e avea ma faia’oga? Afai la e le o manaomia ni tagata Samoa sa lakapi i fafo e pei o Namulauulu ma isi-aisea la e le tofia ai loa le Ta’ita’ifono e avea ma Faia’oga? E sili atu ona lelei lena i lo le tofi o se isi Faia’oga-ae faatonu uma lava iinei le mea e fai -e le Komiti Faatonu! O le a sou taofi? 

2. Ua matauina foi i Tala Fou o lea foi ua aumai ma le meaalofa a Saina i le Iuni Lakapi a Samoa! O le tulaga la ua aliali mai-afai ua leai ni mea faigaluega mo le lakapi-o lona uiga-o lea foi ua amata ona to le manava a le Iuni Lakapi a Samoa!

O le fesili la-o fea ni tupe a le Iuni Lakapi lava ia? Afai ua leai ni tupe a le Iuni Lakapi-o le a faapefea la ona totogi tama taalo ma maua mea faigaluega uma e tapena ai le Manu Samoa mo ana taaloga?

Ia manatua foi o le upu a le atunuu e te fiu lava e sasa le manu ua mate-ua matua pe mate lava! E lua lava la mea e fai-o le tofi o ni tagata e mafai ona faafoeina lelei le Iuni-poo le tuu loa ma le ta’uvalea ai o le atunuu! O le a sou taofi? 

3. Matauina foi i Tala Fou ua faaulu se tagi  a se Ekalesia i le Faamasinoga! O lea tagi e faatūtū i le Nusipepa o le ‘Samoa Today’ ona o se tala na latou lomia faasalalau i le tolu masina talu ai-ma tuua’ia ai le Failautusi Aoao a lea Ekalesia o Rev Dr. Afereti Uili.

O lea la tagi i le faamasinoga o loo ta’ua ai se alii faipisinisi o Patrick Boon ma le Patrick Boon Holdings Company Ltd. O isi itu tete’e o le tusitala o tala fou o Kirstin Toaimoana Ofisa ma le Faatonu o lea Nusipepa o Manū Asafo Maugatai.

Ua faaulu foi e le Komiti Faatonu a le Ekalesia se tagi e faasaga i itu tete’e ua ta’ua ona o le una’ia o ia faiga ua ta’uvalea ai le Ekalesia. O Semi Leuga Wai le Loia a le Ekalesia a’o Alalatoa Rosella o le Loia lea a itu tete’e o Kirstin Ofisa ma Manu Asafo Maugatai, ae o Patrick Boon o loo i fafo i le taimi nei.

O lea la mataupu sa i luma ole Afioga i le Faamasino Sili o Patu Tiava’asu’e  Falefatu Sapolu ananafi- ae ua toe tolopo i le aso 18 o Ianuari 2016….!Ia-o mataupu faapenei e fai sina ma’ale’ale talu ai-o le faasalalau lea o ni tala e le moni!

Afai la ua finagalo le Ekalesia e faatino lea tulaga-o se laasaga lea e matua talafeagai ai-ona e le gata ina afaina ai le Failauatusi Aoao a le Ekalesia- ae o le suafa o le Ekalesia Aoao lava ia.

E tatau la ona faamamā le suafa o le Ekalesia- pe afai e alofa moni i tagata lotu uma o le Ekalesia ua faataasina-talu ai faamatalaga e le faavaea a lea Nusipepa! O le a la sou taofi? 

4. Ua matauina foi i Tala Fou ua i ai foi ni tagata na faau’u mai se Aoga o Gagana! O lea la A’oga o Gagana e peiseai o le gagana a Saina lea o loo aoaoina ai? Afai la o lea-o le a faapefea lau lava Gagana o le Gagana Samoa?

Aisea ua le faapea ai ona fai se Aoga faapitoa e a’oa’o ai le Gagana Samoa lava ia? O le gagana Saina e le o se gagana a le lalolagi-masalo e na o Saina lava o loo tautatala ai. O lona uiga la-e leai se pogai e ao’oa’o ai fua i totonu o Samoa, aua e le pule Saina ia Samoa- ae o lea e oti le aoaoina o le gagana Peretania ma le Gagana Samoa-ae o lenei ua a’oa’o le gagana a Saina!

Afai la e maua ai ni galuega a tagata Samoa i Saina-ia atonu ua talafeagai lena faamoemoe, ae afai e le o se gagana a le lalolagi atoa-o le a la le mea e a’oa’o ai fua i Samoa nei ae leai se aoga! Ana faapea e a’oa’o nei gagana a’o le gagana Eperu, Eleni ma le Latina- ia ua matua talafeagai lelei lava-e saga malamalama ai le atunuu i le uiga moni o upu o loo faaaogaina i totonu o le Tusi Pa’ia poo le Afioga a le Atua! O le a sou taofi?

23 December 2015, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>