TALATUU O LE MOTU O OLOSEGA

By Fuimaono Na’oia Faasavalu Touli F. Tupua 24 April 2016, 12:00AM

O iinei foi e i ai le nuu o lea lava igoa i le itu i sauté o le motu e faapea sa nofo ai Tuiolosega. O lona itu i matū e igoa o Silitai; ma o luga o le tafa o le mauga o Piamafua, o loo i ai Siliuta -o lona maualuga e 300 mita.

O igoa o isi nuu o Vaiapi, Tafalau, Pouono ma One. O le itu foi i matū ma le itu i sauté- o loo i ai le a’au o Ofu, ae latalata i le itu i sasa’e o le talafatai o Olosega.

O iinei la e faafuase’i ai ona tafatō i lalō ae faasaga ai  Piamafua ia Ofu lea e tu mai luga o le isi tolotolo, poo “Nuutoā” lea sa nofo ai le Toa o Pa’ō ma tau-ma o lona talaaga e maua i le tala ia i le Pusi Temoni o le sami o Lefuailagī.

E tusa ai ma faamaumauga a Misi Tana-o lea igoa e afua mai se ulugalii o Olo ma Sega; poo e afua mai le (sega) mai Fiti,lea sa felelea’i solo ma sola i uta i totonu o le ‘olo. O Tatatuu la a Samoa o loo ta’ua ai e faapea na mulimuli ola mai Olosega i loTa’ū ma ‘Ofu.

Ma o iinei- i le va o Olosega ma Ta’ū; na pa a’e ai se mauga-mu mai lalo o le sami O le pitonuu la lenei o Olosega e igoa o Vaiapi.

O ona upu ta’oto e faapea- “Tulouna le Talamoa-lea e faasino i le Maota o Tuiolosega ma le Malae; Tulouna Oe le Olosega poo tulafale; Tulouna le Alala o le Tuiolosega;Tulouna le Usoalii o Vo’a ma Fetui; Tulouna Satui o le Fofoga o le Malae ma Malemo; Tulouna Oe le Toga; Tulouna Ape ma Niuatoa; Tulouna lau Tofa Tivao; Tulouna Olosega i Luma ma Ona Ao; Tulouna le Aumaga a le Olosega; Tulouna Alo o le Tuiolosega; Tulouna Alo o le Usoalii; Tulouna le Aumaga a le Toga; Tulouna Tama a le Pule; Tulouna le Aualuma a le Olosega; Tulouna Taape ma ona Tei; Tulouna Alo o Pule;Tulouna Oe le Sili; Tulouna lou Alala La’olagi; Tulouna le Usoalii o Muasau ma Moala; Tulouna Oe le Tootoo o Lolo; Tulouna le Aumaga a le Sili; Tulouna Alo o La’olagi; Tulouna Alo o le Usoalii; Tulouna Tama Tootoo; Tulouna le Aualuma a le Sili; Tulouna Tailua’ai ma ona Tei; Tulouna Alo o Usoalii; Tulouna Tama a Tootoo. 

FONO MA LE ALOFI O LE TUIMANU’A –E fono le Faletolu pe afai o le a aofia Manu’a. Ona tutū lea o savali i Manu’a atoa. Ona filifili lea e le Faletolu o ni to’oto’o e aveina le Savali poo le Faamau poo le Alālamua, pe o Fofo poo Atiu.

Ona alu lea o le Savali. E tolu Savali- e alu le tasi i Fitiuta-alu le isi i Ofu ma le isi i Olosega.Ona nonofo lea o le Faletolu ma sauni ni mea faatali a’i. Ona o’o lea i le aso o le a usu ai le fono.

Ona tulai lea o le Tootoo o le Faletolu pe a amata le fono, ona faatali lea o le mea ua faamoemoe le Faletolu e fai. Ona tulai lea o le Tootoo o Fitiuta ma fai lana lauga; faapea foi le Tootoo o Ofu, ae mulimuli le lauga a Olosega ma Sili.

Afai ua finagalo le Faletolu ma le Manu’a o le a tapa le ipu a le Tuimanu’a ma faaali Sa o le Ipu; ona fao fale lea o le Fale’ula-ma fai le alofi tele e tapa ai le ipu a le Tuimanu’a.

Ona fai lea o le alofi ma faamamalu-ua nofo lelei tagata uma; ma ua sao faalelei foi le Aumaga-ma ua leai se tagata e toe tula’i i fafo. Ona fai lea o le ‘ava e se tasi o alii, ona fai lea o le pule e se Tootoo, ona tuu lea i le ‘aumaga latou te maina i fafo.

Ona fai atu lea o se tasi o Tootoo-“Siitia maia i le fale o le alofi. Ua tofia se tasi itu o le ‘aumaga latou e tautuina le alofi. Pe sefulu poo le luasefulu tanoa ua tutumu i ‘ava o le alofi. Ona usu lea o le alofi ma pati le ‘aumaga.

Ona togi lea o le tufa-pe o Sapua poo Saite. Afai e sefulu tanoa-o tau asu foi ia e to’asefulu- e sii faatasi a latou ipu ma tauasu le ‘ava. Ona o uma lea o le aumaga ma le Taupou e aami le ipu.

Ona o’o lea i le fale o i ai le Ipu-ona tago lea o le taupou ua ui le ipu ona ulufafo lea, a’o le aumaga ua amata ona ta’ei o vaa, fasi manulele ma pua’a ma tatu’u i lalo niu.

Ona o’o lea o le taupou i le saofaiga ma ui ane i tua o le Tuimanu’a ma tuu mai le ipu ia Tuimanu’a, ae sau i totonu o le fale. Ona toe tuu atu lea i ai e Tuimanu’a le ipu-ona ia sapaia lea ma ulufale ma le alofi.

Ona ave muamua lea i le Matua-Tū, ona fefo’ifo’ia’i lea i tanoa ma asuasu solo ai le ipu. Ona faato’a ta’i ai lea o le Ipu a le Tuimanu’a; ona taute lea o Tuimanu’a ae alu le teine i fafo, ae tufa e le alofi ma uma ai.

A faae’e la le Ao o le Tuimanu’a- e muamua ona solo faa-malaga e Tootoo e to’alua; ona pito atu lea i ai o Tuimanu’a, ae mulimuli atu le toatele. A o’o atu i le mea o i ai le Fale’ula, ona tulai ai lea.

Ona to ai lea o le mua, toe to le mua se’ia o’o i le faa-lima ona faato’a tuu ai lea. Ona fai atu lea-“Ulufale ia o lau Afioga ma le Faletolu. Ona ulufale lea-ua fai le ‘ava. Ona fai atu lea o Tootoo, toe to le mua.

Ona tu lea o le Tautu ua tapa le ipu. Ua savali atu le Tautu-ona tu lea, ae sau le tasi ua nofo i luma o le alii na te talia le ipu ona faatoa tuu atu ai lea o le ipu i le Tupu. Ona taute lea o le Alii-ae sau le tasi ma le vai –ua vaipa ai le tagata lea o loo nofo i luma o le Tupu.

Ona fai atu lea o Tootoo i le Atualii o le Faletolu-‘O le a tu’u fono o le ‘ava i Tai-ona tulai lea o le Atualii ua sisi le fu’a, ae la’u a’e atu ua fono ai le ‘ava. O mea nei e sa i lo latou nuu ona o le faaaloalo i lo latou Tupu.

E le faaigoaina le moa o le moa, ae ta’u o le manu; e le ta’ua foi le launiu o le launiu-ae ta’u o le ‘laupopo’; a latou lalagia se laufa’i-e le atuagia ae tu’uli. A fai a latou taufolo-e tali i lau-taamu, aua e sa le laufa’i; a fai foi a latou umu-e le vavalua ‘ulu vagana ai le ‘ulu a le Tupu; a fai a latou ‘ava- e leai se ipu e tapaina-vagana ai le Tupu.

E leai foi se upu “Afioga” i Manu’a vagana ai le Tupu. A finagalo le Faletolu o le a fefataa’i le Tupu-ona fata lea tu’u i Faleasao; ona fata foi lea e Faleasao ona tuu lea i Fitiuta, tuu i Olosega, fata e Olosega tuu i Ofu-fata e Ofu ona tuu lea i Ta’ū; afai foi e sao –ua faafetai aua o lea mea- e tutupu ai taua.

By Fuimaono Na’oia Faasavalu Touli F. Tupua 24 April 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>