Malu o le Malo ma pulega Ali’i ma Faipule

25 March 2018, 12:00AM

(OFISA SO’OUPU) Ua folasia i le Fono Aoao Faitulafono, fautuaga mai le iloiloga a le Komiti Fa’apalemene o le Vaega Tau le Va Fealoa’i, ina ia fa’ataoto se polokalame e fa’amalosia ai le faigapa’aga a le Matagaluega o Leoleo ma le Pulega a alii ma faipule.

O lea fautuaga o le a amanaia ai e le malosi’aga o pulega a alii ma faipule o so’o se afio’aga le puipuia ma le taofia o soligatulafono i totonu o nu’u ta’itasi.

O le malu puipuia o Malu o le Malo, o le naunauta’iga maualuga lea i le Komiti, ina ia o gatasi le finagalo o afio’aga, ma le fa’atinoga o tiute fa’atino o tiute faaletulafono a Malu o le Malo i taimi e talosagaina ai le fesoasoani ma le lagolago a afio’aga o lo o fitoitonu i ai nisi o mataupu ogaoga.

I le su’esu’ega a lenei lipoti, o lo o manino ai nisi o vaega e ao ona mata’ituina i lea feagaiga pe a mautu, aemaise o soligatulafono ogaoga, e a’afia ai le lotoifale fa’aletagata soifua.

O veaga taua e ave i ai le faamamafa e aofia ai:

“Fesoasoani i le to’agaogao o leoleo e mafai ai ona tulituliloa nisi o le au solitulafono ae fa’amoemoe i le pulega a alii ma faipule, ma avea o se auala e fa’alauiloa ai a’afiaga o tagata lautele mai soligatulafono o lo o ua fa’atuputupulaia i totonu o le atunuu, e pei o le totoina ma le fa’aaogaina o laau fa’asaina, faiga aiga mataga ma isi soligatulafono.”

O le manatu autu o lea fautuaga, ia mautinoa ua fa’aitiitia soligatulafono ogaoga e pei ona fa’amauina i luga, ona o le lagolagosua a le pulega mamalu a alii ma faipule, e aofia ai le fausia o ni tulafono e fa’atonutonu ai vaivaiga fa’aletagata soifua, aemaise o le amanaia ma le malu puipuia o le Matagaluega o Leoleo, i taimi uma latou te osofaia ai afio’aga ta’itasi, i le sa’iliga o le amiotonu e ala i se tasi ua solia le tulafono.

Ua fa’amaonia i le i’ugafono a le Fono Aoao Faitulafono a Samoa lea Lipoti fa’atasi ai ma fautuaga i le tausaga ua mavae 2017.

O lenei Komiti e aofia ai Sui Faipule o le Palemene, o Gatoloaifa’ana Amataga Alesana Gidlow (Ta’ita’ifono), Afioga Leaana Ronnie Posini (Sui Ta’ita’ifono), Afioga Ili Setefano Ta’ateo Tafili, Afioga Sulamanaia Fetaiai Tuivasa ma le Afioga ia Aumua Isaia Lameko.

25 March 2018, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.