Lauga - “E molimau mea uma o le foafoaga”

By Rev. Petaia Setu 25 March 2018, 12:00AM

Ua fua a tatou faaiuga fai faale faamasinoga i le lava ma le lē lava o molimau. E faigata foi ona talia i le loto le sa’o pe afai ua le manino ma ua le malolosi ni  mau e lagolagoina ai se mataupu poo se mea ua fai. A o le aso lenei ma le molimauina o le Tupu, e le taitai uma iai molimau.

E iai foi ma molimau faaleoleo e tele pe afai e le malamalama pea ma loto tala va le tagata i le Tupu na faia le faaolataga tele. E le na o le au soo sa molimauina lenei aso. A o le motu o tagata; o lē ana ia le asini; o lavalava; o laau ma meaola. Afai foi e le lava, e alalaga mai lava o maa.

O le fesili – E molimau i le ā? Afai foi ua fai mai Iesu e alalaga maa, e alalaga i se ā? O le ā le mau? Ua iloga le aso lenei i ekalesia Samoa. O le Aso Sa o pama (laupama). O le aso o le malaga faa-tupu a le Tupu. O le aso na afio ifo ai le Tupu i le tamai asini. E le ona o lālā laau  ma lau o pama le autu o le Aso Sa lenei.

Tatou te faamanatuina foi le tautua a le asini. Samoa, tatou te molimau faatasi ma lau pama ma le asini i le Tupu na afio ane i luga o la laau ma lau pama na fola ai le ala. E molimau la o laau ma le tamai asini i lē o loo tietie i luga o le tamai asini, o le tupu. O le molimau lea – o le Tupu. E ā le tupu?

E taūa le upu a le perofeta o Sakaria sa ia faama’alo ai le afio mai o le tupu i le aso lenei. Ia alalaga fiafia fanau o Siona ma Ierusalema auā o le a alu atu lou Tupu ia te oe. Fai mai le perofeta, “o ia o le amiotonu ma le faaola.” (Saka.9:9). O uiga paia ia  ma le tausaafia e tatau i soo se tofi taitai. O le faamaoni, ma le alofa.

Auā o le faamaoni, e iloa ai le amiotonu; a o le alofa, e fanau mai ai le agaga faaola. O uiga ia ua vāvāō ai le asō. Ua le vaoia le fia tautala, le pese, ma le ’alaga, ua  toetoe lava ina a alalaga ai ma maa. Aisea? Se i faaleo le ’oli’oli! Le aso ua leva ona foli! Se i ta’u atu i le lalolagi le moni. O Iesu o le Tupu. Afai la ua faasili se leo o tagata (f.38), ua tatau. Ua mălie le loto.

Ua mā’ona le mana’o. Ua lasi vavega ma galuega ofoofogia ua faaalia ai lana amiotonu i tagata. Ua ola ia te ia tagata uma, o le Iutaia ma le Eleni. E le ina a pese Sakaria, o le amiotonu ia ma le faaola. O le Tupu o tagata atoa ma mea uma o le foafoaga. E le sao ai Satani (Luk.4:8-12); e usitai ai temoni; ua toe faatuina ai e na oti; e faalogo iai matagi ma afā; na te faamagaloina agasala; na te faamalie lo tatou galala, ma faamalolo i ma’i atoa uma lava! O ai la a le fia tautala ma ’alaga i le moni?

O vaivaiga masani ia o le tagata(f.39). E musu e vivii le amiotonu. E le o tagata lotu, a o le au failotu! Ia o le a faapefea ona molimau i le mea moni pe afai e le malamalama i le moni? E teena le faaeaea o tagata ia Iesu o le tupu auā na le i tofia ma faauuina e toeaiina. O le atalii o le kamuta. E le fanau se tupu i se fale o manu.

O manatu ia o tatou. Ae manatua foi Samoa e le i iai se failotu na faamamalu i le fanau mai o Iesu, ae na faamamalu e le povi, le ’oti ma mamoe! Auā foi o le Tupu! E le i alaala ai se aualuma auā se vaitaele o le tama ae na o mai mamao Makoi mai Iran ma meaalofa e iloa ai – o le Tupu! Pe tatou te faapulou le tamai moa, e ’ioio mai lava. Afai foi la e le fe’ei fiafia tagata, e alalaga mai lava maa. Ioe, e le tauilo le tupu.E le mafai ona gūgū le foafoaga e faailoa le moni ma le faamaoni o le Atua.

Lea foi sa faailoa ma tautino e Ioane i le au faresaio, e mafaia lava e le Atua ona faatupuina mai ni fanau a Aperaamo i maa nei (Mat.3:9). Ioe, e auauna mea uma lava o le foafoaga i le Tupu o tupu. O le Tupu e auauna i tagata. E alofa i tagata. Na te faaolaina tagata uma. Faalogo foi i le alaga o le aso lenei o loo faamauina e Mataio ma Mareko, “Osana” O le alaga mo le faaolataga. O le tatalo ina ia faatumauina pea le manumalo (ola pea) o le aiga o Tavita. Faaola mai! 

A o le a lau alaga? O lē fea aso e lagona ai lou leo? O nei, poo le Aso Faraile (Good Friday) tou te feei faatasi ai ma le au faresaio ma le au tusiupu? Pe e te gugu ai pea ma fai mea le tonu ua faatonuina ai oe ina nei mea ane ua e pa’u ma lou tofi o loo e eva ai?

Uso e, fai mai le ulu tala o se tasi tala tusitusia a le tusitala Samoa, e fai taliga o aupa. Ioe, e lagona e mea uma le moni ma le faamaoni o lē na faia mea uma. Ne i faatauvaa ia te oe le tagata ma’i, le tagata aupito itiiti, le tagata ese, ma lou siomaga. A o le faafetai a Iesu i lona Tamā, ina ua ia nanā ia mea i e popoto ma e atamamai, a ua faaalia i tamavalevale.(Mata.11:25).

E le mai tagata lagona faagaeetia o lenei aso. I le manatu o Mareko ma Luka, ua faaosofia e le Agaga o le Atua le olioli o le ausoo ma le motu o tagata e molimau i le mamalu o le Alii. O le mamalu e le i gata i luga o le asini, ae na oo i luga o le satauro sa faatautauina ai le Alii. O le viiga lea i mea aupito aluga. O le finagalo alofa i tagata. O le misiona lea a le Tupu. O ia o le faaola. O le Tupu na afio mai e maliu.

Samoa e, o fea lava o loo e iai, e lagona oe e le Alii. E le faatauvaa oe i le Tupu. O lona finagalo alofa ia faaolaina oe. O la ta molimau o le aso lenei, e tali e le Tupu i le Aso Faraile (Ioa.19:30). O le a la lau molimau i lenei vaiaso? Ae faapefea ona e molimauina le amiotonu a le Alii ae o loo e faasaga ese ma le Alii? E mafai ona e alagaina le moni o le Atua pe afai e le o le finagalo o le Atua o loo faatinoina ai ou tiute ma lau galuega?

Sena e, aua e te faa’ole’ole i le Atua. ’Aua foi le pepelo i le to’alua. Faamatala i lau fanau le alofa o le Atua. Faailoa i lou aiga le faamaoni o le Alii. Tautino i lau aulotu, i lau aufaigaluega, i le atunuu le faamoemoe o le Tupu ia te oe. Ia fai oe ma moni o le mau. ’Aua le fefe i tagata. ’Aua le palaai e tautala. ’Aua le gugu i le mea moni. ’Aua e te ’apo leo o le lalolagi, a o manuia o le lagi.

Samoa, afai e te tautino i lou gutu o Iesu o le tupu, o le tupu na maliu ma toe tu mo oe le tagata agasala, ma talitonu o le amiotonu ia ma le faaola, e faaolaina oe. Auā fai mai Iesu, a le feganava’i outou, e alalaga mai lava o maa. 

Ioe, e molimau mea uma o le foafoaga – o Iesu o le Tupu.

 

Amene

 

7737063/7783782

By Rev. Petaia Setu 25 March 2018, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>