“Tapuai i le Atua i le agaga ma le faamaoni”

By Rev. Petaia Setu 27 November 2016, 12:00AM

(Ioane.4:24)

Ua 180 tausaga talu ona liliu tapuaiga a aiga ma nuu o Samoa I le Atua Soifua. Ua faavae ai foi le faamoemoe ola o le tofa saili, ma le moe manatunatu o nai o tatou tua’a ua lagomau mai tiasa. O lo latou talitonuga ma lo latou faatuatuaga, e mai le Atua lea e toatasi,le lelei ma le manuia saoloto o Samoa I ona augatupulaga uma. O le naunauta’iga ia tumau ai le talitonuga tapuai o ona tagata, I le agaga ma le faamaoni. O le isi lea vaega taua o le fesilafa’iga a Iesu ma le fafine Samaria. Ia faailoa I le fafine le moni. O le malamalama, o le mea sili lea ona taua I soo se tagata. O ’e malamalama I le mea o loo e aga’i iai? O ’e malamalama i mea o loo e faalogo iai? Sa ou tau’a muamua I se isi a’u lauga, e ee lava le lotu, ese le faaolaina. Ia malamalama lelei lena mea. E le o le mapo lotu, a o le agaga lotu. O le ‘mapo’ lotu, o le faa-faresaio lena. E faatulaga mea uma o le lotu I manaoga o le faresaio. E faatulafono faiga uma o le lotu mo le mamalu ma le viia o pulega faa-faresaio. E matua nisi atoa se faaleagaga! O gafea la o lo tatou faatuatuaga tapuai e tali atu ai I le miti a nai tuaa ua mavae mo ni manuia o o tatou aiga ma a tatou fanau, pe afai ua le o le agaga e tapuai atu ai I le Atua? Vaai pe le o oe le isi lenaua leva ona taomia lou ola tapuai I pulega faafaresaio?

E tautu lava le fafine I masani a o latou tama, ma tapuaiga faa Isaraelu I Samaria, o le mauga o Keresema. A lē o le mauga, e le aogā. Fai mai Iesu, Funa e, tout e tapuai ma le le iloa. O manatu ia e taofiofi mamau iai le toatele. O matou tua’a; o matou tama; o matou matua; o la e o Pai ma Lafai I le galuega. Tatou te le ta’ufaaleaogaina le lotu. E pei lava foi o le loto o le fafine Samaria lea. Ae vaai lelei ma tatalo. Ia pupula ou mata Samoa. O nai o tatou tuaa ma matua sa mata’u I le Atua. Sa faamaoni ma alolofa I le Atua. Sa malamalama lelei ma iloa le Atua, ma ala paia e tapuai ai ma maua ai mafutaga mafanafana ma le Atua. O faapefea la nei aso? Vaai a’ai! Ua sala ou fausaga. Ua ‘apo e le alii o le lalolagi ane pulega. Ua fiu e tau faamasani I le Atua, ae pei le Atua ua mamao ese lava se mea o iai. E fai foi o le le malamalama o tagata, a ua ‘alo le faamalamalamaga o le Upu Moni. Ua le o le finagalo alofa ma le finagalo faaola o Le ana le talalelei, a ua faauiga mo le faamalieina o mana’oma pulega a le au tala’i o le talalelei.

O le faigofie ia o le auala a Iesu na maua ai le fafine. Faamalamalama ia malamalama. Ta’u iai le moni. O le moni, o le agaga lava le Atua. E leai sona amataga, e leai foi sona gataaga. A ’e tapuai la I le Agaga, ia mamā lou agaga; ia fiafia lou agaga; ia saoloto lou agaga; ia le pisia lou agaga I le mau faama’i lele o loo faalavelaveina ai tapuaiga I le Atua I Aso Sa uma. O iina, o loo taoto ai le ‘faamaoni’ o lau tapuaiga I lou Atua. Fai mai Iesu, ‘e tatau ona e tapuai I le Atua I le agaga ma le faamaoni.

Ia manatua foi, e le eseese le agaga ma le faamoemoe o tapuaiga a Samoa anamua, ma tapuaiga o aso nei o le talalelei. O le ‘Tapuaiga’ I aga faa Samoa, o tapu poo sa a aiga Samoa anamua I o latou atua. E faaeteete I tapu o le atua o loo tapua’i iai. E taofiofi I sa aua e tua. Sa soli tapu o le atua, e tua I mala ma ma’i; e le ‘asa ma puapuaga ma le toilalo. A fai tapui o talitonuga faa-tapuaiga a le atunuu, e tapui I le igoa o atua a lea aiga ma lea nuu. O iina foi e osofia ai e le palaai poo le fefe le soifua tapuai faa Samoa. Aua foi e iaile tapuai tuia, le tapui mamala, tapui oti ma isi mau tapui. Ua le gata la ina talia manu mai atua ia, ae faatupu mala foi pe soli ona tapu. Samoa, ua tatou manatu o le ‘fefe’, e a’oa’o ma faatonu ai a tatou fanau ia ‘alo ese ai I le amio leaga. Lea ua maikauina pea I pulega a nisi alalafaga, e tuli faamalosi ai le tagata I le falesa I Aso Sa, e ui a, e moe ai le isi. Ua lotu ona o le fefe! E alu I le falesa ne I mea ane ua sala! Samoa e, o le tapuaiga lea o loo a’oa’oina ai e Iesu le tina lea ma tatou uma, e le o le ‘fefe’, a o le agaga ma le faamaoni e talitonu ai ma faatuatua I le Alofa Tunoa o le Atua. 

O le “agaga ma le faamaoni,” o sa tausi ia tapuaiga Kerisiano. O tapu ia, ‘o loo saili iai le Tama I e o loo tapuai faapena ia te ia (f.23). O tapui (Eso.20:1-17), e pei ona toe  faamanino atili mai e Iesu Keriso (Mat.22:37-39),  o le auaunaga lea e faatinoina sa ma tapu o le tapuaiga I le Atua. I le, ua le atoatoa faatino la tatou pito laau lea I lo tatou Atua, ona ua faoa tapu ma sa o tapuaiga I le Atua, sa mamalu ai aiga I taimi o toeaiina; sa pa’ia ai le ekalesia o le tino lavalea o Keriso, a o fai Iesu Keriso mu Ulu.

Ua leai se saolotoga tapuai o le fanau a le Atua. E foliga mai ua le lotu ma taufaamatau i  le au fia tapuai. Ole Agaga ma le Faamaoni, o le faamamafa lea a lo tatou Alii o Iesu Keriso. Pau a lenā. O le faigofie ia. Silasila i nei ona po, ua fesuluai solo le lafu mamoe. Ua tele le mau faamamafa. E le gata ina sola ai le agaga tapuai i taimi o tapuaiga, a ua fai ma faafitauli mamafa i le galuega. O mea na le faatagaina e le Atua, ae nainai e le auaunaga faafoliga i le Atua. (2 Tupu.5: 20-24).

O lo tatou olaga ma le talitonuga e ala ia tatou tapuaiga i le Atua, e tatou te faanonō iai i manū ia e fai ma tini o miti a tua’ā. E olioli ai fanau ma aiga; e pati lima ai tapuaiga. Ae a soli tapu ia, ona le gata lea ina sisi’o ma pepelo solo, ae ua le sao mai le tapui mageso, tapui papala, tapui oti tuu faasolo (2 Tupu.5:25-27)

Le ekalesia e, ua papanu a tatou tapuaiga i pulega faa-faresaio. Ua leai se Agaga o le Atua. Ua tele le mau Aua. Ua le manino le mau Sa. E amata mai lava ile tumua’i e oo i matiutiuvae o tagata lotu ua pipii ai le Aua ma le Sa. E oo lava i meatotino a le tagata lotu, ua aiāina e le pulega faa-faresaio.

Lou atunuu e, e pele le tapuaiga faa Kerisiano i soo se tagata Samoa. A o la’u lenei e fai atu, ia e tapuai ma le mautinoa. Ia e iloa le faamaoni o loo e vivii ai i le Atua i lou ola tapuai. Aua le faia toa’i. ia e malamalama i ala ma faiga ua finagalo le Atua e saili mai ia te oe.

O le Agaga ma le Faamaoni, e sa’o aile gutu, sa’o ai le loto. E maua ai le saolotoga ma le olioli. E ute iai le tapuaiga ile Atua.

Aua le vaoia lou gutu e vivii atu ai i le Alii – Aleluia! Tatala lou loto ina ia e iloa le faamaoni o le Atua – Amene! Aua afai e te tautino i lou gutu i le Alii o Iesu Keriso, ma talitonu i lou loto ua toe faatuina o ia e le Atua nai e na oti, e faaolaina ai oe. Ioe, o le loto e talitonu ai, e oo mai ai le amiotonu; a o le gutu e tautino ai, e oo mai ai le ola (Roma.10:9-10). O le malosi, i le ma le mana lava lea o le talitonuga faa Kerisiano i le soifua tapuai o tagata uma i le Atua o Tapuaiga.

Samoa e, soia le faamamafa o le mauga ma le fale; a o loe loto ia sa’i ma louloto ia mamā. Aua e te maitauina le tino ma mea ua pipii i le tino; o  mea na a le eleele. O mea a le Atua, o le agaga ma le faamaoni. E saili mai lava Ia, i ē tapuai faapena ia te Ia.

O le Atua, o le agaga lava ia; o ē tapuai ia te ia, e tatau ona tapuai atu ai i le agaga ma le faamaoni.

 

Amene

By Rev. Petaia Setu 27 November 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>