1. Matauina i Tala Fou le faatama’ia e le afi o le Maketi i Savalo i le po a malama ananafi! O le matau la i lea faalavelave-o le alofa o le Atua ua pogai ai ona leai se soifua e maumau ai! Ae o le vaai lava ia i ata pu’e o lea faalavelave-e matua mata’utia lava pe a fua i le anoano o pisinisi ma faleoloa sa faatino i lea nofoaga! O le taofi foi-ailoga o i ia se mea tasi na mafai ona faasaoina mai lea faalavelave.

E pei o le itu e faanoanoa ai-o nai tagata o le atunuu sa fai ai a latou pisinisi!

O le vaai la i lea afi-o le upu moni lava-e leai se mea o mafai ona faasaoina mai ai-pe a fua i le taimi na tulai mai ai lenei faalavelave. O lea la ua mu-ma o lona uiga-o le a matua valevalenoa lava lea nofoaga-ma o le a tu-matilatila ai foi i e malaga mai fafo-ma o le a leai foi se mea e mafai ona mapu i ai le atunuu e pei ona masani ai. Ailoga foi e toe afea e pasi lea nofoaga-aua o le a leai se malu o e sulufa’i i ai –o le atunuu!

A umi foi la ona taatia ai faapea lea nofoaga-e le taumate o le a sili mataga i totonu o le Taulaga. Ia-o le a la le mea o le a fai i ai? E o’o lava ona faatu i lea nofoaga le fale fou o le malo e pei ona fuafuaina? Ae afai sa fai ma toomaga o le atunuu e faae’a ma faatali ai pasi mo femalagaiga-faamata o le a le vave e mafai ai ona toe fausia se fale fou i lea nofoaga? Faamata la e mafai ona toe fai ai ni fale’aiga? O le a sou taofi?

2. Ua matauina foi i Tala Fou o lea ua tu-laueleele Parker i Samoa nei –aemaise ai foi o le toatele o le atunuu sa faatali i ai-aemaise ai o le tupulaga laiti! Afai la ua leva ona faatali Samoa i lenei faamoemoe-o lona uiga-e leai lava se tasi e le fia Samoa-leaga o lea ua lauiloa le tama a Samoa i le lalolagi-aemaise ai lava pe a manuia lana taumafaiga lea o le a faatinoina i Samoa nei! Ia-o le a alo Samoa e tapua’i ma tatalo-ae le soona pisa ma faalialiavale! O le a la lau mate? Afai o lau mate e malo le tatou tama-ia tapua’i ma tatalo ma faafoi le viiga i le Atua pe a manuia! O le a sou taofi? 

3. Matauina le savilivili o le faaiuga o lenei vaiaso ma e le taumate o loo i ai se mea o folifoli mai! A silasila i le suiga uiga ese o le Tau ua i ai nei Samoa-ua matua tulaga ese lava-o lea ua te’ate’a malie atu le vevela o le La ma ni ma’ulu laiti-ae o lea ua faagasolo mai foi se isi suiga!

O ia fou suiga e pei ona matauina atonu e afua mai lava i ni matagi malolosi o loo si’omia ai Samoa! i le taimi nei la- e le o matua leaga tele-ae o le tulaga le mautinoa e pei ona sa masani ai! Ia, afai ua fesuisuia’i mea uma i lenei taimi-ia atonu o ni taimi ia o suiga mo le lalolagi atoa ae le faapito ia Samoa!

O suiga la o loo sili ona tatou mana’omia-o ni suiga lelei ae le o ni suiga leaga! Afai la ua latalata mai le Palota-e ai le manatu o loo silafia uma lava e le atunuu mea o loo tutupu! Afai la o faamalieina i le tulaga o loo i ai nei-ia o lau faitalia lena- ae afai e te le o malie i ai pe le o manuia ai foi lou aiga-o oe lava e te faia le mea e tatau ona fai ina ia manuia ai lou aiga! O le a sou taofi? 

A’o tatou i ai pea i le tulaga faaletonu o le Tau ma uiga o aso-o le a se isi mea e mafai ona tua i ai le atunuu pe a toe tulai mai se afā? Faamata e mafai ona lavea’ina Samoa i le tulaga o loo i ai nei? E mafai ona faasaoina soifua o le atunuu mai matagi malolosi ma mala faale-natura? Afai la e leai-faamata la o i ai se isi mea e mafai ona tatou tua i ai? O le a sou taofi?