O le a toe tatala le Kolisi o Avele

By Sarafina Sanerivi 18 May 2016, 12:00AM

O le a toe tatala le Kolisi o Avele faatasi ai ma le tuuina atu e le Kapeneta i lea a’oga o le avanoa mulimuli lava e tasi-e toe fai ai suiga mo ana agasala i aso ua mavae. O lea faaiuga na tuuina atu ananafi ina ua mae’a se fono faapitoa a le Kapeneta sa talanoaina ai lea mataupu. 

E sili atu i le selau tamaiti a’oga, tama tuai, matua ma faia’oga sa faatalitali ma le faanaunau i fafo ane o le fale o le Malo mo le faaiuga mulimuli.

O le vaiaso talu ai i le Aso Tofi, na tapā ai e Tuilaepa se ta’utinoga mai le Kolisi o Avele e faapea e le toe tulai mai amioaga mataga a tamaiti a’oga.Na ia faailoa atu i le fonotaga e faapea se’ia vagana ai ua ta’utino atu e le Kolisi o Avele e faapea o le amio a tamaiti a’oga o le a sui, a leai e sili ai ona tapuni tumau le a’oga.

O Ananafi na maua ai e le Palemia o Tuilaepa ma lana Kapeneta se ta’utinoga  ma na faamalieina ai i le folafolaga e faasino i le amio e sili atu ona lelei.

O se sauniga faapitoa o le a faia taeao i le itula e 9 i le taeao e toe tatala ai le a’oga, lea o le a auai le Palemia ma le Minisita o A’oga, Taaloga ma Aganuu. O le Pule o le Aoga o Lesaisa’ea Reupena Matafeo o se alii lea ua tumu i le faafetai.

“E tatau ia i tatou uma lava ona tuuina atu le faafetai i le Atua aua ua na faia le tele o mea lelei mo i tatou,” o lana faaaliga lea.

Ina ua mae’a le fono ma le Kapeneta ananafi-sa potopoto Avele i tua ane o le fale o le malo lea sa fai ai se sauniga itiiti e le Pule o le A’oga, faia’oga, matua, tamaiti a’oga ma tama tuai e faafetaia ai le Atua mo le tuuina atu ia Avele o le avanoa mulimuli e tasi.

“O le Asō o le amataga lea o se vaitau fou mo le Kolisi o Avele,” o lana faaaliga lea a’o taumafai o ia e taofi ona loimata i le faagasologa o le sauniga. “Ua leva ona tatou faatalitali ma tatalo ina ia taunuu mai lenei taimi, ma o le taimi nei e tatau ai ona tatou toe tuuina atu le viiga i le Atua mo Lona alofa e le mavae mo i tatou o lana fanau.”

E ui lava ina o se vaiaso e aupito i sili ona faigata mo i latou uma, ae na toe ta’ua e Lesaisa’ea e faapea e leai se aoga e toe tilotilo ai i tua.  “O se amataga fou lenei mo i tatou. Ua tatau ona aoaoina i tatou mai mea sese na tatou faia ananafi, ina ia mafai ai e i tatou uma-ona fausia se taeao lelei.” E talitonu o ia e faapea o le mea na tupu ia i latou o se vala’au lea e fafagu ai tatou uma.

 “O se avanoa lelei lenei mo i tatou uma e toe asia ai tiute ma matafaioi. O se faamanatu lea mo i tatou e faapea e tatau ona matua galulue ma le tiga ma galulue faatasi-ina ia mafai ai ona faafiafiaina  a tatou fanau i se lumana’i e sili ona lelei ma manaia.” 

Na ia faamanatu atu i tagata uma e faapea o faia’oga e le na o i latou ia e noatia i le amio a tamaiti a’oga. “Tatou te manaomia foi le fesoasoani a matua, Faife’au o Ekalesia faapea foi tamaiti a’oga,” o lana faaaliga lea. I lana saunoaga e uiga i le fono ma le Kapeneta, fai mai Lesaisaea ua talia e le Kapeneta aiaiga ma tuutuuga na latou faia.

 “Ua uma ona matou tuuina atu ia i latou la matou fuafuaga ma ua latou talia aiaiga. Na matou tuuina le upu ma matou malilie e faapea a toe tupu mai se mea, e le toe i ai se isi avanoa mo Avele.” E le’i mana’o o ia e faamanino mai le fuafuaga ma faiga e fo’ia ai na latou tuuina atu i le Kapeneta.

Ae ui o lea, fai mai a ia o loo tilotilo nei le a’oga e galulue faatasi ma ni kamupani se lua tau telefoni feavea’i  i totonu o le atunuu ina ia mautinoa ai –ia le toe tupu mai le mea na tupu. “Ma o loo matou faamoemoe foi o le a aoaoina a matou tamaiti a’oga mai lenei fuafuaga ma ‘ia ‘aua nei toe tupu mai lea mea.”

“E na o le 0.01 pasene o le a’oga o loo faatupuina nei faalavelave ma matou te faamoemoe ua aoaoina i latou mai mea sese na latou faia ma ia le toe faia.” Sa fesiligia Lesaisa’ea pe tatau ona latou faatagaina le 0.01 pasene e nonofo i totonu o le a’oga, ae fai mai ai na te le faia se faaiuga.

“Afai o i ai ni tamaiti a’oga i tua o loo faatupuina faalavelave, o le a matou tuuina atu lena itu i leoleo. O la matou vaai faatauaina o le aoaoina, ma matou te le manaomia se mea vagana ai le mea sili mo tamaiti a’oga ina ia mafai ai ona latou maua ni lumana’i e sili ona lelei.”

Ina ua fesiligia pe o le a sona lagona i le tulaga aoao, fai mai Lesaisa’ea e ui lava ina faigata, o loo tumau pea ona to’afilemu. Sa tumau pea lo’u filemu i le taimi atoa sa matou faatalitali ai mo se faaiuga mulimuli,” o lana faaaliga lea.

I le tilotilo i luma, fai mai Lesaisa’ea o se amata lenei o se lautusi fou mo le a’oga.”Sa le faigofie ae sa tumau pea le filemu ia te a’u, ma e faapena foi lo’u lagona i le taimi nei.” “O le a matou galulue faatasi nei ma matua, faia’oga, ACOPA tamaiti a’oga ma tagata ta’ito’atasi uma ina ia mautinoa ai e faapea e le toe tulai mai nei mea. Ua ‘ou matua fiafia lava ona o le Aso Lulu a’o o’u faamanatuina le isi tausaga ua faaopoopo i lo’u ola, o le a matou toe tatalaina faitoto’a o le Kolisi o Avele.”

By Sarafina Sanerivi 18 May 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>