E lē faigofie le olaga
O le leai ai o se eletise o se fa’afitauli tele lea o lo’o feagai nei ma Kilioga Kilioga, 35, le matua o le soifua i Maugafiafia.
Na ia fa’ailoa o le vaega tonu o lo’o i ai lo latou fale o lo’o ua matua’i mana’omia ai lava se eletise.
O le isi tulaga na ia ta’ua e pei o lea le nofoaga o lo’o ua aga’i ai le aiga aemaise ai pe a tutupu mai ni fa’alavelave fa’alenatura.
“Ia o lea le fale o lo’o i ai le taimi lenei ma o lo’o i ai ma le ma’umaga a lo matou aiga.
“E pei o a’u ia o le faifa’atoaga ma o lo’o o’u fesoasoani malosi lava mo le atina’eina o si o matou aiga i aso ma taimi uma o le soifuaga.
“O se itu lelei tele lea i lo’u iloa i ai, ae pei o lea lava le fa’afitauli o lo’o ua i ai nei, o le leai lea o se eletise.
“E lelei lava i po masina ae a o’o ina pogisa tele ma leaga le tau, ia e matua’i leai lava ma se fia fealua’i o se tagata.
‘O le o’o mai ai le eletise o le a fesoasoani tele ai aua le aga’i atu ai le lumana’i.
“O lo’u ia iloa i ai e faigofie mea uma pe a lelei ona fa’atino o mea uma.
Na ia fa’ailoa o le olaga lenei a le lulū ma loimata e le mafai ona fa’aeaina.
“O le uiga o la’u tala o tupe lava mea uma, e leai se tulaga fo’i le le e nofonofo ae sau le tupe ma le mea’ai e saili mai oe, e leai.
“E tatau lava ona galue malosi aua le atina’eina o aiga.
“O le itu mautinoa lava lea i lo’u iloa i ai, aemaise lava i aoga a le fanau ma le tausiga o aiga ua talanoa lava i nonogatupe mea e fai ai mea uma.
“A e le alofa lava oe ia ia olona uiga ua le avea lau fanau i le aoga, o la’u ia lu’i i matua ia aua le fa’avaivai.
“E tatou te fa’avaivai loa, e leiloa le mea o le a o’o ai mafatiaga a nai o tatou fanau i le lumanai.
‘Aemaise ai lava le tautuaina o nai o tatou aiga, ae se’i o tatou va’ava’ai ma le toto’a i nei aso.
“Ia ua faigata lava mea uma o le soifuaga e ao ona o tatou faia mea uma.
“E fua i le taugata o le soifuaga olo’o ua i ai nei, ua le toe faigofie lava nei aso.
“Ia o tatou fa’amalolosi pea aua o lea lava le soifuaga o lo’o ua tatou va’ava’ai atu ai le lumanai.