O le faifaiva lava o lo’o tausi ai le aiga
E taua le fai faiva aua o se olaga o lo’o maua ai seleni a le toatele o tagata ae le gata foi iina, o le i’a o se meaai e lelei mo lo tatou soifua maloloina.
O Saula Atina’e o se faifaiva e malamalama lelei lava i lea tulaga ma lona aoga mo tagata Samoa.
E 65 le matua o lona soifua ma sa ia taua ile Fofoga o Samoa, o ia e fagota aua se tupe maua mo lona aiga.
“O a’u sa uma a’u galuega ile tulaga lima ma na amata mai a iina ona ou ola ile olaga fai faiva,” o le tala lea a Saula.
“E fa’atau a’u ia, pa’a, pusi aemaise ai le i’a.
“A faatau a pa’a, pe fa pa’a ae $20, e faapena foi la i pusi e fa, e $20 foi.
“O lenei galuega a la e sue ai tupe mo le aiga aemaise foi le aoga a le fanau.”
Sa taua e Saula e to’aiva lana fanau ae ua maliliu le toalua lea la ua totoe le toafitu.
“O le faifaiva a la lea matou te feola ai.
“Ou te alu atu a la i Apia e faatau pea ou a’e mai ao isi taimi e fai mai oka a tagata ia te au, o mea faapena a la ou te galue mai a ile Aso Gafua fa’ato’a malolo foi lea ile Aso To’onai.”
E taua tele i lenei alii le olaga faifaiva aua o se tupe maua lelei e tausi ai lona aiga.
E moni lava ua tele le au faifaiva i lenei vaitaimi ae e silafia a e oe faatau atu, e alugia foi ia ma isi figota mai le sami e te faatauina atu i tagata.