LAUGA - “Manū o maua le asō”

By Rev. Petaia Setu 29 January 2017, 12:00AM

O upu e faalogo ai pea i toeaiina ma loomatutua, o le malaga faiaga, ā le timu’ia e fasia. E toloi lava e tatou mea uma i le taimi mulimuli. Ae taūa foi le fuaitau faa palagi, Time and tide waits for no man.

O le upu a le tusitala nei i ona tagata (Eperu), o le faufautua ma timai faamalosi ina ia maua le taunuuga lelei sa le i mafai ona maua e o latou tua’ā. Ua ia faamanatu le upu na fetalaia mai ai le Atua i lana auauna o Tavita e faapea, O le aso nei afai tou te faalogo ai i lona siufofoga, ’aua tou te faamaaa i o outou loto…. (Sal.95:7-19) 

Ua taumafai le tusitala o le Tusi nei o Eperu e tulei atili ma faafaigofie lona faamatalaina o le tulaga maoa’e tuma’oti ma le silisili ese uiga lava o Iesu. Afai o le Iesu lea i le manatu o le tusitala, o lona uiga, e manaomia la le talitonu atoatoa (complete trust) ma le usiusitai lelei (complete obedience) i le Alii.

A misi ma mea ia pei ona faailoa e Tavita, o le a fetai’ai ma ni puapuaga matautia. O le fafagu i soo se Eperu kerisiano, ina ia tumau ma mauaa i le faatuatua, ae ’aua ne’i faamaaaina o latou loto ina ne’i faapei o o latou tamā i ona p o le Esoto sa faa’ono’ono ai i le Atua ina ua faaosoosoina i le vao (Eso.17:1-7); Nume.20:1-13). O lesoni ia o loo faamatalaina le tetee ma le finau vale o le fanauga a Isaraelu i le Atua. O le muimui ma le saga taulagi mai pea o Aikupito, na i’u ina sesē atu ai ma si toeaina o Mose. Na fai atu le Atua ia Mose e tautala atu i le papa. Ae ona o le ita tele o Mose i le loto maaa o le nuu na nofo ai ma ta le papa i lona tootoo. Na tafe mai ai le vai. Peitai, o lona faatinoga o le faatonuga a le Atua i lona ita, o le faailoga o le le talitonu ma le le usitai. E le i faatagaina e le Atua lana auauna o Mose e taitai lona nuu i le laueleele na folafolaina.

Uso e, ’aua ne’i galo ia te oe, ua avea foi lo tatou naunau ia lelei se mea, ma ala tatou te le iloa ai, ua iai faatasi ma lo tatou sesē. O se mea ua faatauvaa ia te oe, a o loo faataūa e le Atua. O se mea itiiti lava na fai atu ai le Atua ia Mose, tautala i le papa. ’A ua sesē ai Mose i lona ita. E le i faitaulia e le Atua le tele o tausaga o le auaunaga; poo le tautigā ma le pologa sa tau tapena mai ai galuega lelei o le faaolataga! A o le talitonu i le Atua ma lona mana, ma le usitai i le Atua ma ona ala. Mai le 20 tausaga agai i luga o tagata o le nuu, e le i oo se isi le nuu o le folafolaga; vaganā Iosua ma Kalepo. Fai mai le Atua, Na ou tauto ai i lo’u ita, Latou te le sao atu lava i lo’u malologa (Kanana) Sal.95:11). Samoa o le mea tāua lava o loo i’ī, o le le talitonu ma le le usitai o Isaraelu, na aveesea ai faamanuiaga a le Atua mai ia i latou na fa’i a olioli ma ola saoloto ai.

O la le Tusi nei i ona tagata, Ia outou, ne’i mamulu ese atu ma outou nei faamanuiaga pe afai tou te le talitonu ma outou le usitai, faapei ona le maua foi e o outou tua’a anamua. O le lu’i a le aposetolo, “Manū o maua le avanoa; manū o maua lou ola i le “aso nei”, ave sa’o i le Atua le mea o loo mana’o mai ai o ia.” O le “asō” o loo tā’ua i le matua, o le umi ua iai lou ola i le aso lenei. Manu o maua lou ola. Ioe, manu o ’e ola. Ave nei loa i le Atua a o le i faai’ua ou aso i luga o le fogaeleele. Samoa, ua iai fautuaga taua tele mo tatou i le malaga o lenei tausaga 2017.

(1) O le ofo mautinoa a le Atua i tagata uma. Faapei ona ofoina atu e le Atua faamanuiaga ia Isaraelu i le laueleele na valo’ia, ua ia ofoina atu foi ia te oe faamanuiaga mautinoa o le ola e silisili atu nai lo le olaga ua aunoa ma le Atua.

  (2) O le ausia o ia faamanuiaga a le Atua, e manaomia ai mea ia e lua:

(i)Talitonu: E tatau ona tatou talitonuina le moni o mea uma ua fetalai mai ai le Atua. Ia tuu atoa iai o tatou loto ma o tatou faatuatuaga i ana folafolaga.

(ii)Usitai: Faapei ona manatu Paulo ua avea Keriso ma mea uma i mea uma, ua faapea foi ona faamălieina atoatoa i tatou ma tatou maua le fiafiaga sili i le faalagolago ma le usiusitai i le Alii lo tatou Atua.

(iii)O mea ua ofoina mai e le Atua, e iai lona mutaaga. O lona laina tuaoi, o le umi ma le puupuu o lou ola. E le iloa la e oe ma a’u le taimi e faagata ai. Fiafia tatou e ta’uta’u taeao; ae, mo tatou, e leiloa pe oo mai taeao (Iako.4:14) Pau a le mea lea tatou te iai, o le asō. Samoa e, o le ofo ua folafola mai e le Atua mo oe ma lou olaga, ua tatau ona e talia i le aso nei. O lou loto e talitonu ai ma lou loto e usitai ai, ua tatau ona tuu sa’o lava i le Atua i le asō. Uso, tatou te le mailoa pe iai se taeao mo oe pe uma tā’ua i le asō.

Samoa e, e le mafai ona tatou folau faasamasamanoa e aunoa ma ni faafitauli. O upu masani a toeaiina, ua iai le maa tui ma le maagao ma le maa faalavea aao. O lape ia o malaga. E le mafai ona e iloa atu faamanuiaga ua ofoina mai e le Atua i lou olaga pe afai e fetōtōa’i ona e laa i le ala. O le laa mautinoa o le asō, e malama ai ata o le aso fou. A o le aso fou o loo faama’alo mai i le lesoni, o le ausia o le malologa. O le tu laueleele i faamanuiaga na ofoina mai e le Atua. Ae na o lenei ona aiaiga Samoa, ia talia Iesu Keriso i lou olaga; talitonu. Ia faalogo i lona siufofoga; usitai.

O le faamanatu a se tasi fatu pese,

                Trust and obey, for there’s no other way,

                To be happy in Jesus,

                 But to trust and obey

Uso e, ’aua le tuua taeao. ’Aua le toloa avanoa. Ne’i e mele faamanuiaga, ona tusa lea o oe ma le fanauga Isaraelu na feoti i le toafa.

Fai mai le faamalosi’au a le tusitala o le Eperu, O le asō. Manū ’o ’e ola.

Manū o maua le asō

Amene

7737063/7783782

By Rev. Petaia Setu 29 January 2017, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>