Pagātia i le leai o se suāvai

By Vatapuia Maiava 14 September 2016, 12:00AM

O le aso ananafi na maua ai e le Fofoga o Samoa le fa’atalatalanoaga ma le tinā i a Isapela Talisua, 62 le matua o le soifua mai le afio’aga o Vailele-Uta.

Na fa’ailoa e le tinā le tulaga mana’omia ai o lona aiga o se fesoasoani ona o le utiuti o le fa’asoa ma le taugatā o le tau o le soifuaga e pei ona ua i ai nei.

“O le taimi lenei ua fai lava si taugatā o le soifuaga i lenei vaitau,” Isapela Talisua.

“Ia e pei ona outou taga’i ma silasila atu, ia ua uma lo’u fale…o lea ua muta ai fo’i ma le tupe ia.

 “O le taimi lenei o lo’o o’u mana’omia se laupapa mo le folaina o lo’u fale, ma e le gata i lea o lo’o ou mana’omia fo’i  se tane vai.

“E pei o le vai, ia o le olataga lea a tatou o le vai…ona ua faigata tele le mea lea ua i ai, ona ua mamao i lalo le vaitafe,  ia ae o le mea lena o lo’o mana’omia ai se fesoasoani.

O le maota o le tinā ma le aiga e le’i leva ona fausia aepeita’i e le’i taitai ona ma’ea nisi o vaega ma o lo’o matua’i mana’omia ai lava se fesoasoani.

“O le taimi lenei o lo’o mana’omia fo’i nisi apa e fa’atelē atu ai lo’u fale i tua i o, aua o si o matou aiga fo’i e to’atele fo’i fanua.

“O le taimi lenei o lo’o i ai le tama lae faigaluega i luga o le va’a fagota, ae pei o fuala’au lava ia e taumafai atu e tōtō ina ia maua ai sina seleni mo le atina’eina o si o matou aiga

“Ia peitai ane, e le tutusa ai pea aso o le vaiaso, a tele lava se tupe e maua i le vaiaso…pe na’o se selau talā. 

“Ae e tele fo’i alagatupe latou e fa’asoa ai le selau talā, o le mea e totoe , ia ua fa’aaoga mo le tausiga o le aiga ma le fanau. 

“Ou te mana’omia a le fa’aleleiina o vaega nei , ina ia ola maloloina le fanau, ia fa’apena ona tutupu ifo ma va’avaa’i fo’i i ai mo le atina’eina o lo matou aiga.

O le tulaga pagātia i le suāvai, o nisi o taimi ua aga’i e ki vai mai nisi aiga.

“O le taimi nei o lo’o i ai le aiga i ga’uta o lo’o aumai ai le suāvai e faaogaina.

“O le tele lava o taimi ua o i lalo i le vaitafe, ia ma na o le vai lava e la’u mai e fuafua lea mo le faiga o mea’ai , o le ta’e’ele ai, aua e le mafai ona ta’e’ele i lalo ona o lo’o fa’aaogāina e nisi o le vaega o lo matou nu’u i tai, ma e pei o le faigata lena.

“O le taimi nei o lo’o mana’omia lava le mea tau festilaisa mo le fa’alelei o le palapala, aua a leai ia ua le ola lelei fo’i mea tōtō, e pei o le mea lena o lo’o o’u mana’omia, o le taimi lenei o lo’o fai lava si to’atele o le fanau ma le aiga.

O lona talitonuga – “O le  tulaga lava ia i le soifuaga o lo’o i ai lenei vaitau , a lē lelei le atina’e o aiga ma fa’ato’aga e leai se ola fiafia.

“E pei o le tulaga lena , o lo’o mana’omia ai lava le fesoasoani.

“E leai se isi mea e fa’apea o fesoasoani mai ai le malo i lo’u aiga, i afā na uma atu nei ia na  tau atia’e lava e a’u ma si a’u fanau le aiga.

By Vatapuia Maiava 14 September 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>