Tali le Peresetene i tu’uaiga e fa’asaga i lona auai i le suesuega o le suafa Faumuina, Lepea

21 August 2017, 12:00AM

FAAMASINOGA 

O TALOSAGA 

SUAFA “FAUMUINA” 

O LEPEA 12 Me 2017 

TEENA O LE PERESETENE E AUAI I LE LAULAU A LE FAAMASINOGA O TALOSAGA MO LE ILOILOGA O LE FAAIUGA LC.5767 P1-P10 

 

Folasaga: Ole suega o le suafa Faumuina ole afioaga o Lepea ua faatulaga i lenei taeao, e i ai mataupu taua ou te fia tuuina atu ai se faamatalaga, mo le silafia e Itu Faamasinoga ma mo faamaumauga. 

 

Mataupu 1 - faamaninoina o le suega a le Faamasinoga 

 

o Talosaga: O le mataupu muamua, o le suega lenei, o le toe iloiloina o le Faaiuga LC.5767 P1-P10 ole aso19 Aperila 2010, e tusa ona tuuina atu ai le faatagaga i le aso 20 Ianuari 2017. O Lona uiga e lē o se mataupu fou, na mafua ai ona teena talosaga na tuuina mai, mo le faauluina o ni itu Faamasinoga faaopoopo. 

E i ai foi ie talosaga mo le faaeseese Itu a VaiTagutu Viliarnu Masoe ona ua finagalo e faatu o ia i le suafa Faumuina, peitai na teena foi, ona e lē o se suega fou, o le toe iloiloina ole Faaiuga 2010. O lona uiga, e na o nofo o loo faatulai i talosaga o le suega 2010, ma nisi mataupu felatai, e tagofia e le Faamasinoga o Talosaga. 

E faamalie atu ai, pe afai ua foliga o se suesuega fou i le toe tuuina mai o faamatalaga na poloaiina, ae lē fou, o faiga masani lava a le Faamasinoga pe a finagalo ai. Ae o le mafuaaga, ona e i ai Itu Faamasinoga i le suega I le 2010 na tuuina mai gafa, ae i ai foi Itu Faamasinoga e leai ni gafa. Na tapā ai, ina ia laugatasia uma Itu Faamasinoga i faamaumauga e tuuina mai, ma fesoasoani foi i suesuega ale Faamasinoga 

E Faapena foi le mafuaaga na toe tapā ai ni molimau lagolago i Nofo o loo faaiuina mai i talosaga, ona e i ai nofo na faatulai i le suega 2010 na tapena lelei mai uma tuiaga ia e lagolagoina ai nei nofo, na mafua ai ona tapā atu ia molimau, ina ia laugatasia uma nofo na faatutu mai i talosaga, i faamatalaga lagolago e tuuina mai. 

Mataupu 2 - teena o le auai o le Peresetene i lenei suega: Ae o le mataupu lona lua, e fia fai atu ai sau tala, mo le silafia manino e le paia maualuga o Itu Faamasinoga, aemaise I latou na tusi mai e teena lou auai i lenei suega, ona e i ai tusi ou te lei tali atu i ai, ae o le tele o nei tusi, o loo kopi le afioga i le Palemia ma le afioga i le Minisita o Faamasinoga, faapea le afioga i le Faamasino Sili ma afioga i Sui o le Komisi o Galuega a le Faamasinoga, ma le Resitara o Faamasinoga. 

E i ai foi tusi o loo kopi uma ai Itu Faamasinoga o lenei mataupu. Ou te leiloa le mafuaaga autu o le kopi o i latou na kopi, e na o le Atua lava ma Itu Faamasinoga e ana tusi e silafia. E taua ai ona ou tali faamalamalama atu ina ia manino avanoa faatulaga, faapea a tatou faiga faa-faamasinoga, i le talitonuga, a manino e faigofie foi ma tuumamā finagalo. Ae o le avanoa na faatulaga e le Faaiuga o le aso 20 Ianuari 2017, mo le tuuina mai o faaaliga e teena ai ni Faamasino i le auai i lenei suega, o loo aiaia i le fuaiupu 19 o lena Faaiuga, e faapea:

“Afai e i ani ni Faamasino e teena i le suega a le Faamasinoga o Talosaga, ia faailoa mai suafa ma mafuaaga o le teena i totonu o le 21 aso mai le aso o lenei Faaiuga. Ia manino mafuaaga o le teena, ma e i le Faamasinoga le faitalia e talia ai se talosaga fai fuafua i mafuaaga e tuuina mai.”

O lea avanoa e teena ai ni Faamasino e lē tatau ona auai, na faagata i le aso 10 Fepuari 2017. Ae o le tusi muamua e teena ai a’u, o le tusi a le tofā Ulugia Aukuso ma le susuga Sua Misiluki (16 Fepuari 2017), sa kopi ai afioga i le Faamasino Sili ma le Palemia. O le teena lona 2, o le tusi (27 Mati 2017) a le tofā Toi Ilalio Ioane sa kopi ai afioga i le Faamasino Sili, Minisita o Faamasinoga, Sui o le Komisi o Galuega a le Faamasinoga ma le Resitara, faapea Itu Faamasinoga uma. O le teena lona 3, o le tusi (21 Aperila 2017) a le tofā Ulugia Aukuso ma le susuga Sua Misiluki, e teena ai a’u faapea nisi o Alii ma Tamaitai o le Faamasinoga. 

O le teena lona 4, o le tusi (27 Aperila 2017) a le afioga Tuia Pua Leota, afioga Tupuola Sola Siaosi ma le susuga Seufalemua Simone o loo kopi ai afioga i le Faamasino Sili, Minisita o Faamasinoga, Sui o le Komiti o Galuega a le Faamasinoga faapea le Resitara o Faamasinoga. O le teena lona 5, o le tusi (28 Aperila 2017) a le tofā Vaitagutu Viliamu Masoe, o loo kopi ai afioga i le Palemia, Faamasino Sili, Minisita o Faamasinoga, Sui o le Komisi o Galuega a le Faamasinoga ma le Resitara o Faamasinoga. 

O nei uma tusi e 5, e le’i tuuina mai i totonu o le taimi faatulagaina. Peitai, o le isi vaega o le fuaiupu 19 e faapea – “…e i le Faamasinoga le faitalia e talia ai se talosaga fai fuafua i mafuaaga e tuuina mai.” E ui ai ua maea le taimi faatulagaina, ae taua lo’u tali atu i mataupu o loo faavae ai tuuaiga faapea isi mataupu na afea e nei tusi, ina ia manino le faafofoga a Itu Faamasinoga, aemaise i latou e ana tusi na tuuina mai, i le talitonuga, a manino ma malamalama ona tuumalie lea o masalosaloga. 

O le mataupu o loo mafuli i ai le teena o a’u, i lo’u auai i le suega lenei o le suafa Faumuina o Lepea – ona o se ma faiā ma le tofā Lepou Petelo, e ala i lona tausi o Sina, le alo o Fepuleai Filitoga, lea e aumai i le tusi a Tuia Pua ma Tupuola Sola, faapea, e i ai se lafoga a le tofa Lepou Petelo i se latou feiloaiga – e ‘aua le popole o le matai o le Peresetene na fai e le tuaā o lona tausi”. Ae mo a’u lava ia, e lē o se manatu faatauvaa i aiga, ae o se sootaga e lē faatauina ai la’u amiotonu ma lē afaina ai le faatinoina o o’u tiute i lenei mataupu, e pei o isi uma mataupu ou te tagofia pe auai ai. 

O le vala muamua e faamanino, e lei faia e Fepuleai Filitoga, le tuaā o Sina le tausi o Lepou Petelo lo’u matai, ae o Fepuleai Filitoga na taofia lo’u matai. O loo i ai faamaumauga a le Ofisa o le Resitara e faamaonia ai, na taofi e Fepuleai Filitoga lo’u matai toe afio aveese, ae ou te lei alu i ai, o le faamatalaga sao lea ma le faamaoni. 

O le vala lona lua, e 3 Mau Tautoina na tuuina mai e Tuia Pua, Patu Sola ma Niulevaea Ropati e faamaonia ai le lafoga lenei a Lepou Petelo, e ‘aua le popole o le matai o le Peresetene na fai e le tamā o lona toalua’, ae o lea ua ou faamatala atu, e lē sao lea lafoga e foliga e noatia ai au i se faatinoga e tuufeagai ma taiala faa-faamasinoga. O se faanoanoaga tele, le tiuaiga mafaufauga fapea, e saofagā ma mafai e ni sootaga faapea ona faumalo ma fuli le alatanu o le faiga o faaiuga amiotonu a le Faamasinoga lenei. 

Ae afai e fesiligia – ‘pe mafai ona ou taofia tagata e fai ni saunoaga faapea?’, o le tali e lē mafai. E pau a lea o le mea e mafai ona ou faia, o le faamatala atu, e lē sao ia talitonuga ma lafoga faapea na fai e Fepuleai Filitoga lo’u matai, ma tautino atu i luma o lenei Faamasinoga mamalu ma le maualuga o Itu Faamasinoga, e lē faapena ona faatino ou tiute faa-faamasino e tusa o lau tautoga, e tusa o masalosaloga o le afioga a Tuia Pua ma i latou. 

Ona afe lea o se tala i le sootaga ma le tausi o Lepou Petelo. E i ai lo matou sootaga, e matou te matai faatasi ma le tuaā o Sina o Fepuleai Filitoga ma lona tuagane o Fepuleai Joe, o le isi lea tino o le suafa Fepuleai i le itupaepae o Taualogomai i Saleaula. Ae o lea sootaga, pe o le 8 i le 10 tupulaga i luga atu. O le molimau, matou te lē fetausiai. O le taeao nei, o le faatoa faa-4 ai lea, ona ou vaai atu ae silasila mai Lepou Petelo. 

O le fevaaiaiga muamua, o le tuumalo o Fepuleai Filitoga na ma fetaui ai o’u iloa o Lepou Petelo ona sa Faipule, o le fevaaiaiga lona lua e i ai le fiafia ua leva sa fai i se tasi aiga i Tulaele e lolotu faatasi ma le Aiga o Lepou Petelo, ou te masani ai sa ou i ai, ou te savali atu o saofafai mai Lepou Petelo ma Sina, sii mai aao sii atu foi lou lima ma ou alu. O le fevaaiaiga lona tolu, o le aso 16 Ianuari 2017 lea na suesue ai le mataupu lenei, ia ma le fevaaiaiga lona fa, o le taeao nei aso 12 Me 2017.

O tausi o Lepou o Sina, faatoa faalua ona ou vaai i ai i lou olaga. O le aso na o atu ai e fai le nofo a lona tuagane o Fepuleai Joe, ma le fiafia i Tulaele lea na ou taua. I ia fevaaiaiga e leai ni talanoaga. E matou te lē feasiasi foi pe tauosi i ni faalavelave, vagana le tuumalo o Fepuleai Filitoga lea na ou taua na i ai Lepou Petelo. 

O le fesili – ‘e i ai sou malosi pe mafai, e vaoia ai ni lafoga faapea a le tofā Lepou Petelo?;, o le tali e leai. O le isi fesili – ‘e faamaonia ai ea so’u lē amiotonu, ona o ni lafoga faapea a le tofā Lepou Petelo?’, o le tali e leai foi. E mafua ai le fesili mulimuli – ‘e tatau ea ona aua le faatinoina o’u tiute na tofia ai a’u ma ou tauto ai, ona o ni masalosaloga o nisi i ni lafoga a le tofā Lepou Petelo e lē mafai ona ou taofia?’, o le tali foi e leai. 

O le uiga lea o lau tala, o le sootaga ma Lepou Petelo, e lē o se tagata e afaina ai pe faalavelaveina ai le faatinoina o ou tiute i lenei mataupu, ma lau tautoga na faia i luma o le Atua ma Samoa i le aso 1 Aukuso 2016 – “ou te faia le mea tonu i ituaiga uma o tagata e aunoa ma le fefe poo le faapito, alofa poo le loto tigā.”

 

1. Ulugia Aukuso ma Sua Misiluki:

O le teena muamua o lou auai i le suega lenei, e Ulugia Aukuso ma Sua Tolumaanave Misiluki, ona o lo la finagalo ua see ese le Faaiuga a le Faamasinoga o Talosaga Toe Iloilo, na tuuina atu ai le faatagaga e toe Iloilo ai le Faaiuga a le Faamasinoga Muamua, ma mataupu o le suega a le Faamasinoga Muamua. Pau lea o le tusi na ou tali i ai, e leai ni talosaga apili i faaiuga e tuuina atu ai le faatagaga e toe iloilo ai se Faaiuga. 

 

2. Toi Ilalio Ioane:

O le teena o a’u e le tofā Toi Ilalio Ioane ona faapea o so’u sootaga i nisi o suli o Uilaefā i le suafa Mataia e i ai le afioga i le Palemia, faapea le tofā Toloafuaivalelei Falemoe Leiataua, tofā Lealailepule Rimoni Aiafi ma le afioga Fepuleai Ameperosa Roma. Ua maea ona ou faailoa i le afioga i le Faamasino Sili, e leai so’u sootaga faalē-aiga i le suafa Mataia o Vaimoso ma le suafa Faumuina o Lepea. O a’u ou te sau mai Savaii, o le Iva le tamā, ae Saleaula le tinā. Vagana le afioga Fepuleai Ameperosa ma te tausoga, o le atalii o le tuagane o lou tinā, e nofo i le tamaitai o le suli o Uilaefā.

E i ai foi tuuaiga a le tofā Toi Ilalio Ioane, o le afioga i le Palemia na tofia au i le tofiga lenei o le Peresetene, ia faapea ma se sootaga faa-polokiki ma le afioga Fiame Naomi Mataafa. Ou te ioeina o si ou tama o se tagata lagolago malosi i le vaega faaupufai a e HRPP ao soifua peitai, e leai se maopoopoga poo se faattinoga faa-vaega faaupufai na ou i ai. Ae o le tofiaina o le Peresetene, e tofi e Lana Afioga Mamalu O Le Ao o le Malo i le fautuaga a le Kapeneta, i le tau lalaga a le afioga i le Faamasino Sili ma le Komisi o Galuega a le Faamasinoga. 

 

3. Tuia Paepae

O le vaega tele o le teena o a’u e Tuia Pua ma i latou, o lea ua afea le mataupu i le sootaga ma Lepou Petelo. Ae o le isi mataupu, o se tuuaiga faapea matou te suli faatasi ma se tasi o latou molimau i le suafa Leaupepe o Fasitoouta, ma o loo fuafua la’u nofo i le suafa Leaupepe o lo matou tino ma le latou molimau. Ae o le Mau Tautoina na tuuina mai e le susuga Leuluaialii Gaui Pelenatete Tuia Faumuina, ua sui le faaupuga i se talitonuga ou te agavaa e umia le suafa Leaupepe, ma ona e i ai le ma sootaga i le suafa Leaupepe e masalomia ai sou faaituau. 

O le mea muamua, ou te lē masani i le susuga Leuluaialii, lua e leai sa’u nofo o fuafua i le suafa Leaupepe, o la e matai ai lo’u uso. Tolu, ou te leiloa pe silafia e le susuga Leuluaialii, o le suafa Leaupepe e tele itupaepae ma fuaifale. O au ou te suli mai i le fuaifale o Tapulaaia. E leai ni suafa faapea o Leuluaialii i lo matou Aiga i Tapulaaia. I le ma le isi, e matua leai se mafuaaga e faamalosia ma faaosofia ai a’u ou te faaituau i se tagata ou te lē masani ai. E matua leai foi so’u faamoemoe e fai lena tulaga, tainane poo le a le latalata o se sootaga. 

 

4. Ulugia Aukuso 

O le teenaina lona lua o a’u e le tofā Ulugia Aukuso ma le susuga Sua Misiluki ona o le sootaga ma nisi o Itu Faamasinoga, ma ua maea ona ou talanoa atu ai i le mataupu lea ma Lepou Petelo. Ae pau lava le tulaga i lē silafia e le tofa Ulugia Aukuso, e sili mamao atu lo’u iloa o le tofa Lepou Petelo. Ai ua galo i le tofā Ulugia Aukuso, e masani ona ma o atu ma lou uso ma tafafao i lona fale piliati i Tulaele i aso ia. O le molimau, e i ai si tei o le tausi o Ulugia Aukuso na sau mai Niu Sila, faatauoloa ai i le faleoloa o le tofā Ulugia Aukuso, ua matua si ana tama e faaigoa ia te a’u, ae le o a’u, o lau tama lea ma te o soo. 

E oo foi i le susuga Sua Misiluki, ai foi ua galo i le alii pese tautaua nei, e masani ona matou eva i le loto o Lilia i aso la. Ae o lenei lava ua molimoli mai le sootaga ma le tofā a Lepou Petelo ae ma te lē talanoa, ae o laua nei, sa masani ona talanoa. Ua tele ai nei mau tusi ma i latou o kopi ai, ua alu ai le taimi o Ulugia ma Sua e tufa ai, ae galo ai le aso e faagata ai faamatalaga e aumai. Ia ae o lea lava na oulua talosaga mai, ma ou talia lelei.

 

5. Vaitagutu Viliamu 

O le teena o au i le tusi a Vaitagutu Viliamu Masoe ona o le mataupu i le sootaga ma Lepou Petelo lea ua maea ona ou talanoa atu ai. 

Ae o le talitonuga o loo faavae ai le teena malosi o au e Vaitagutu Viliamu Masoe, ona faapea ou te “lē agavaa”, ma e “lē lava sou iloa” e tagofia ai le mataupu lenei, fai fuafua i isi Peresetene pei o le afioga i le Faamasino Sili, afioga Tagaloa Sale Kerslake, afioga Lesatele Rapi Vaai ma le afioga Vaepule Vaemoa Vaai. E taua ona ou tali manino atu ona o loo kopi afioga i le Palemia, le Faamasino Sili, Minisita o Faamasinoga, Sui o le Komisi o Galuega a le Faamasinoga, na faamaite ma lagolagoina le tofiaina o a’u i le tofiga Peresetene. 

O le mea moni, e sa’o lelei Vaitagutu Viliamu Masoe e ‘lē lava so’u iloa’, pe a faatusatusa sou vaivai ma le tofā a le afioga i le Faamasino Sili ma afioga i Peresetene ua taua suafa, sa faia ma o loo faia le galuega. O lena foi le naunautaiga ina ia tele se iloa pei o le silafia o afioga i Peresetene ua taua. Peitai, ou te lē matamuli ai, aua o uiga lava ia o le soifuaga, e sili atu lava le silafia o ē na muaimalae i loo i latou e mulimuli mai i soo se galuega. 

Peitai, ua faamavae le afioga Tagaloa Sale Kerslake, ua ritaea le afioga Lesatele Rapi Vaai, ae i ai sootaga vavalalata o le afioga i le Faamasino Sili ma le afioga Vaepule Vaemoa Vaai i lenei mataupu, e lē mafai ai ona tagofia e se isi o i laua. Afai ai ou te lē faia, e ono umi se taimi e faatalitali ae tau saili se isi Peresetene e faia. 

Peitai, o le siligia e Vaitagutu Viliamu Masoe o lo’u agavaa i lenei galuega, e 2 molimau ou te fia tuuina atu e agai ai le finagalo lenei o Vaitagutu Viliamu Masoe – ‘ou te lē agavaa’. Muamua, mai ia Aukuso 2016 na tofia ai a’u, e tau mai i le taeao nei, ua 9 masina ma aso e 12, ae ua 177 ai lenei i le suafa Faumuina o Lepea, ia le aofai o mataupu ua ou tagofia ma auai. E 131 mataupu sa suesueina ma faia faaiuga i le talia ma le teena o faatagaga e toe iloilo ai Faaiuga, ae ua 45 mataupu i le Faamasinoga o Talosaga ua ou taitai ai. I lena 45, ua 39 mataupu ua fai faaiuga, ae 6 e lau faaiuga i le vaiaso o muamua ma ona tua. 

O le molimau lona lua, e silafia e le Lagi, e mamao ma lo’u faatauvaa e tofia a’u i lenei tofiga, o le mafuaaga foi lena ou te lei talosaga mai i ai, o upu tautino na. peitai, na musuia e le Atua le finagalo o le afioga i le Faamasino Sili na faamaite, ma tuuina atu ai le fautuaga a le Komisi o Galuega a le Faamasinoga i le Kapeneta, ma lagolagoina ma tuuina atu ai le fautuga i Lana Afioga Mamalu, Le Ao o le Malo. O i latou uma ia (vaeatu o latou paia ma mamalu) na lagolagoina ma tofia au i lenei tofiga. E toatolu le Komisi o Galuega a le Faamasinoga ma le 13 o le Palemia ma le Kapeneta, ma Le Ao o le Malo, e 17 tagata (tulou o latou taulagi) na talitonu o loo ia te a’u le agavaa e mafai ai le galuega lenei, tainane sou faatauvaa ma le vaivai, i le fesoasoani mai o le Atua. 

 

Mataupu Taua:

1. Fuaina o le amiotonu – e mafai?

Ua maea ona ou tali faamalamalama atu e tusa ma tuuaiga ma masalosaloga na faavae ai le teena o a’u i lo’u auai i le suega lenei, ae paga lea, e le faigofie lava ona faatalitonuina nisi finagalo. Maimau e pe ana i ai se ‘fua amiotonu’, tai pei se fua foi lea e siaki ai tagata Malaga e ii mai pe a iloa e le amiotonu se Faamasino, ia matua faatautino ma faamalie ai Itu Faamasinoga ae lei faia se suega. Peitai, e leai se tatou fua faapena. 

Ae o le natura foi o faamasinoga, e le fesoasoani i le faatalitonuina o tagata o loo fai ni faaiuga amiotonu, ona e le mafai ona manumalo uma ni finauga feteenai. O ai lava la le Itu e manumalo le latou finau, e talitonu e amiotonu le faaiuga. Ae o ai foi le Itu e le faamanuiaina le latou finau, e manatu lava e le amiotonu le faaiuga. 

O le tilofia ma le upuia lea o le Faamasinoga, e le mafai ona aveesea, o le faafafa tauave a le Faamasinoga o Fanua ma Suafa. 

 

2. Taualumaga Faa-Faamasinoga 

Ua taoto foi a tatou faiga faa-faamasinoga, afai e lē faamalieina se Itu Faamasinoga i se faaiuga a le Faamasinoga Muamua o Fanua ma Suafa, ona faaulu lea o talosaga toe iloilo, lea e i ai le mataupu i le taeao nei, ina ua tuuina atu le faatagaga e pei ona fai ai le suega ma le faaiuga ia Ianuari o le tausaga nei. 

Afai foi la e i ai nisi e le fiafia i le faaiuga i le faaiuga a le Faamasinoga lenei, o loo i ai avanoa ua faatulaga ia tatou Tulafono e mafai ai ona tagofia e le Faamasinoga Maualuga ni talosaga e tuuina atu i ai. Ae afai foi e le faamalieina lava, e i ai foi avanoa ua faatulaga ia tatou Tulafono e mafai ai ona tagofia e le Faamasinoga o Talosaga ni talosaga e tuuina atu i ai. 

 

3. Upu Mulimuli 

O upu tuuaso, ou te fiafia tele pe a ou le faia lenei mataupu ona o le tele o a’u galuega o loo taumafai, ma ou te maitau atu i lenei taeao, i le Itu Faamasinoga o loo taitai ai le afioga Tuia Pua o loo molimau mai ai le tofā Ulu Vaomalo, o le uso o le tamā o lou toalua, o se sootaga vavalalata tele, e lē tatau ai ona ou auai i lenei suega. 

O le mea moni, ua fai si leva talu ona ma nonofo ma lou toalua, ou te leiloa e i ai se latou sootaga faapea i le mataupu lenei, e lē gata ina e lei fai mai ai, ae ou te lē gata ina e lei fai mai ai, ae ou te lē o vaai foi i ai faamaumauga o faaiuga ma taualumaga o lenei mataupu ua leva ona ou suesue i ai i tapenaga mo lenei suega, manū ua leva ona ou faasee ese mai ai. 

E ui ai lava la i se lagona, e le avea foi se naunau moni e faatino o’u tiute, e foliga a ou sosofaina ai lo’u auai i lenei suega, e atagia ai e i ai sou vaivai o tulituliloa i lenei suega. 

O upu tautino – ou te faamaoni ma tausi i la’u tautoga i mataupu uma ou te tagofia ma auai. O la’u tautoga na faia i luma o le Atua, ma Samoa i le aso 1 Aukuso 2016 – “ou te faia le mea tonu i ituaiga uma o tagata e aunoa ma le fefe poo le faapito, alofa poo le loto tigā”, i le fesoasoani mai o le Atua. 

Ua umi lau tala, ae taua avanoa ma le malamalama, aua e tutupu pea lagona ma masalosaloga. O le mea sili ona taua, ua outou faafofoga i sau tala, aemaise o Itu Faamasinoga na tusi mai, ona e toatele i latou sa kopi i a latou tusitusiga e le mafai ona oo atu i ai sau faamalamalamaga, ia aemaise mo faamaumauga mo le lumanai. 

Ou te faamalulu atu ai i le paia maualuga o Itu Faamasinoga o lenei mataupu, i le lē mafai ona faaauauina o le suega a le Faamasinoga o Talosaga ua faatulaga i lenei taeao, ona o mafuaaga ua taua. 

O le a tolopo lenei mataupu sei maua se Peresetene e mafai ona taitaina le Laulau a le Faamasinoga o Talosaga e suesueina lenei mataupu. 

 

Fepuleai Letufuga Attila 

Manutoipule Ropati 

Peresetene 

12 Me 2017 

21 August 2017, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>