O le matafaioi a le malo
O le tamā i a Fagafa Luafalealo o Fasito’o-Uta na ia ta’ua le tulaga pagatia o lo’o ua feagai ma le tele o nisi o aiga ga’uta o le afio’aga ona o le leai ma le utiuti o le suavai maua.
Na ia fa’ailoa o le amataga mai ai na i ai lava se tasi o aiga na o latou fa’alagolago ai mo le suavai maua aepeita’i e le’i umi lea tulaga.
“Ia e pei o lea le tulaga na mafua ai loa ona aumai le tanevai se’i taumafai ai le fa’aletonu e pei fa’ailoa atu.” Fagafa i le Fofoga o Samoa.
“O a’u e 11 tagata o si o matou aiga, ia a e va’ava’ai la i ai i le numera lea, ia e le faigofie ona ua o tatou iloa uma lava le tulaga faigata, a leai se suavai o lona uiga ua leai se ola.
“Ia e le tau ta’u atu le tulaga o lo’o feagai ai ma le tele o aiga i uta nei, e pei ona fa’ailoa atu muamua ia o le suavai lava le fa’afitauli.
“O le itu mautinoa mo le silafia e le mafai ona maua le suavai ona e le a’e le vai i le vaega o lo’o matou i ai ona e fai sina mati’e.
“Ia na fa’atalosagaina le malo i le tulaga lea ona o le tele o aiga, e le tele ni a latou tupe e mafai ona fa’atau mai ai tanevai.
“E fa’afetai ai ona e i ai le polokalame a le Mamona na mafai ona maua mai ai tanevai lea ua fa’aaoga e le tele o nai aiga.
“O le uiga o la’u tala e leai se aoga e te sau ai fau lou fale manaia, ae leai se suavai e fa’alagolago ai lea tulaga.
“Ia ae le gata i lea o le maua o le tane vai, ae o fea e aumai ai le suavai e fa’atumu ai?
“E faigata tele, ona o le tele o taimi ia ua o tatou iloa uma le aoga o le suavai i so’o se fa’atinoga tatou te faia i lea aso ma lea aso.
Na ia fa’ailloa fo’i o le isi fa’afitauli o lo’o feagai ai nei o le fa’aletonu o auala.
“Ia e alu atu lava le leaga o le auala tau lelei i Aleisa, ma o lo’u iloa i ai o le matafaioi lea a le malo e tatau ona toe silasila toto’a i ai.