Ua mou malie atu le aganu’u - Salailefulu
“Ua va’aia ma le fa’anoanoa i nei aso ua amata ona mou atu le olaga fa’aaloalo na sau a’i Samoa.” Lē finagalo o le tamā matua i a Salailefulu Lavata’i, 76 le matua o le soifua o Atoi Fagaloa.
I le fa’atalatalanoaga i le aso ananafi na ia ta’ua ai o se tasi lea o vaega o le aganu’u na masani ai Samoa ua amata ona mou malie i le va’ai.
“O le tulaga lava ia e pei ona ua i ai nei Samoa ua matua’i saosaoa lava le soifuaga o lo’o ua tatou i ai nei aemaise o le tele ai o suiga mai fafo.
“I a te a’u lava ia pe a fua atu i aso ua alu, e ese le tulaga o lo’o ua i ai nei, ua le mafai e le laititi ona fa’aaloalo i le tagata matua.
“A fua atu fo’i i le tulaga i le fa’aaogaina lelei i le gagana ia ua lagona lava le fa’anoanoa ona ua tauau ina mou atu ona o’i tatou lava.
“Ua amata ona galo ma ua pei e foliga mai o se ma’i o le a tele se afaina i le lumana’i pe a le vave fai ai se fuafuaga.
“E le una’ia fua i a te ai lea tulaga, o i tatou lava ina ua o tatou amata ona fa’agalo vaega taua nei na soifua ma ola mai le tele o aso ua alu.
“E pei o tupulaga talavou o lo’o o’u iloa e a’u ua tele le a’afiaga i le itu lava lea i leai o se fa’aaloalo ma le gagana.
“Ua le iloa ona fa’atino ni fe’au fa’a-samoa aua ua tele i le u’uina o telefoni ma omiomi i taimi uma.
O lona talitonuga o totonu lava o aiga le mafua’aga o so’o se fa’afitauli ua i ai nei le tele o vaega o le aganu’u i le fanau.
“O lea lava le tulaga, aua fo’i e sese loa le fa’atonu o le matua, oti uma mea uma, o le ituaiga lea fo’i le le ese le fa’atonuga e fai nei.
“E o’o atu taeao ua ese fo’i le fa’atonuga e fai i le isi atu...e pei o lea lo’u iloa ai le taimi lenei.
“Ua leai se una’i malosi o matua ina ia mafai ona failotu fa’atasi ma tamaiti le afiafi ma fai lelei ai se upu.
“Ua pule lava le tamaititi ia i le mea e fa’asaga ai...ma ua leai se feso’ota’iga lelei i totonu o aiga.
“Aua i a te a’u ia po le a ma le a, ae o le aiga lava le fa’apogai o so’o se manuia ma le leaga o fanau o le asō.
O lona talitonuga, o aiga lava e toe foufou ai so’o se fa’afitauli i le soifuaga ma le fa’aletonu ua amata ona alia’e mai le aganu’u.
“E pei o lea lo’u ia iloa ai le taimi lenei, a lelei ona toe tapu’e le olaga o fanau ua i le asō i le aganu’u aemaise o le fa’aaloalo, o le a le taumate le tali o a taeao.