Ave la’u fa’amuamua i o’u tiute fai
O Pese Brown o se tamā matua 65 tusaga le matua o le soifua o Lotofaga. O le maua ai o le la fa’atalatalanoaga ma le Fofoga o Samoa o lo’o faia lana galuega i lona fanua tele i gauta le togavao.
O se aiga e le faatatau i se lelei atoatoa ae faatatau ile ola faatasi.
O le fai e ave lana faamuamua i lona aiga o le ala lea o lona galue i lona maumaga ma nofo ai lava na’o ia.
“O a’u nei e leai se to’alua leai se fanau.
“O a’u ou te nofo to’atasi lava i nei ma ou galue ai,” o lana lea tala.
“Ia e tele lava le fanau o lo’o o’u galuega ai nei ma ou te ta’utino atu e leai lava se fa’afitauli o feagai ai nei m a’u.
“Ua ou masani lava i la’u galuega ma o lo’o o’u fiafia ai lava e fa’atino.
“Ua nao au a la, ma nai o’u tuafafine ma latou fanau e totoe aua o maotu matua ua fai i lagi le folauga.
“E faigata a le olaga ae matou taumafai lava e aua nei faavaivai.
“Lea ua manuia mea toto ma le ola falolo, ia e faafaigofie ai foi isi mea e fai i totonu o aiga.
“E le mativa a nisi ini meaai aua o lea e iai faatoaga a ae o le seleni a ile tele o taimi.
“E manaia foi a le tali ole manava ile talo aua e manaia le lololo ole pe’epe’e.
“O le tupe a o se mea e faigata ona maua.
“O le mafuaaga lena matou ou te galue ai lava aua foi le fa’amama aveag i nai o’u aiga.
“O lo’u fanaua e toto lava so’o se tuaiga meaai, ia olo’o maua foi nai ula i le ala vai. E le mativa i se mea’ai ma o lo’o lelei lava mea uma.
“Ia a maua a la lou penisiona, ou te alu muamua totogi le pili ole vai aua ou te le manao e faamotusia faafuasei atu le vai.
“E toatele a tagata e faafesili mai pe ou te le manao e fai sou tausi, ae ou fai ai, ia e leai, o lea e free lava le ola to’atasi ma e leai se tasi e fa’atiga ulu mai.
“O le Ali’i lava e mai ai le tali o le fai aiga ma le le fai aiga.